Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Тема дня

СЕВЕРО-ВОСТОЧНАЙ ШОССЕТЬ ЭЗГА КИСЬ—ПАНЧФ!

Республикань Оцюнясь китькстазе, што ня объект-тнень тиемаснон коряс задачась путневсь тяфта, штоба тиемс синь сяда оцю качествань, кемотть кизонди. Удалась тиемс нюрьхкяня пингста. Тяконь мархта савсь ряцок анокламс проектно-сметнай документация нинге 3 объектонди, конат лувфт аварийнайкс, и вешендемс  проекттнень финансированияснонды источникт. Тяфта лиссь, што пцтай сембе ярмаксь—600 миллион цалковайсь—(тняра марстонь питнесна путепровоттнень и седть) максфоль федеральнай бюджетста.

 

«Мялезе отмечамс строительхнень ответственностень марязь и оцю качествань работаснон и азомс благодарностень валхт Россиянь Президентти Владимир Путинонди Саранскяень эряйхненди тя пяк эрявикс проектть эряфс ётафтоманц ширенц кирдеманкса. Поздравляндасайне ошеряйхнень тя магистральть, кона сотнесыне 200 тёжянь ломань мархта кафта оцю микрорайоттнень, эзга арнемать ушедоманц мархта».

 

Мордовиянь Оцюнясь отмечазе, што тядде республикаса планц коре арьсекшневи ётафтомс ки лангонь оцю объемонь работат—6 миллиартт цалковаень питнес. «Тяфтама объемт нинге вестевок ашельхть,—мярьгсь Владимир Волков.—Тяконь лувксса строявихть 100 вайгяльбень кувалмоса кит «Безопасные и качественные автомобильные дороги» нацпроектть рамкаса. И конешна, сяда оцю мяль минь шарфттама китнень петемаснон лангс. Тяда башка, кармай мольфтевома кить строямац Строительнай ульцяса Победа ульцять эзда ушедомок Светотехстройса Гожувскяй ульцяти молемс Химмашса—седть строямац Инсар ляйть пачк, кона ни ушетф, аделави тядде. Тяфта жа тяни аноклави Коммунистическяй ульцяса сеттнень петеманкса заявкась.

 

«Дивандафты, но Саранскяйть ули кода азомс «седень ошекс»—миньцонк эздост 27!—мярьгсь Саранск ошень округонь мэрсь Петр Тултаев.—Сембе синь планц коре петевихть. И азома благодарностень валхт минь Оцюняньконди Владимир Дмитриевиченди сянкса, што сон лама тись финансированиянь получаманкса, штоба петемс ня объекттнень»,—поладозе Петр Тултаев.

 

Кода отмечазе «СК Мостостройть» руководителец Андрей Ташкаев, пяк важна, што дорожнай объекттне ульсть сёлкфт эсь пингстонза, сяс мес 2№ путепроводсь ульсь каладома лангса. Несущай конструкциятнень таштомомасна и опорань стойкатнень эса лазфсь вятель трагическяй случайхненди. Путепроводть строямац стакалгофневсь сянь мархта, што алганза ётай Саранск-Нижний Новгород машина кинь магистральсь, и работатнень ульсь кода вятемс аньцек 2-3 част шити технологическяй ваймама пингть. Но сякокс, работань мольфтемань графикть удалась ладямс стане, штоба тиемс семботь курокста. Кода надияфтсть строительхне, од сеттне кармайхть служама 50 киза, кда тиендемс теест капитальнай ремонт 20-25 кизонь ётазь.

 


14.05.2020 №18
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин