Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

Мороснон эса народоньконь ваймоц

Инголи велень эрь кудса ульсть морай ломатть, конат пуромкшнельхть илять марс и морсекшнельхть кувака народнай морот. Тяка пингть, кажнайсь эздост заняфоль эсь кядьтевсонза: кие стась-кодась, кие котф лангс сёрмадсь, кие кштирдсь. Инсарскяй райононь Кацятов (Кочетовка) мокшень велеса кунардонь пингста сявомок ульсть семьят, коса пяк лац морасть сембе. Синь и арасть васенце морсикс войнада ингольдень кизотнень пуроптф хорса. Нят ульсть аф фкя кизонь ломатть, ётксост учительхть, дояркат, свинаркат, разнорабочайхть. Но сембе синь фкя лаца пяк кельгозь мороть,  макссезь морамати марнек ётка пингснон. Хоронь васенце участницатнень еткса ульсть ёмла классонь тонафтыхне П.А.Борисова, Т.Ф.Ермакова и К.В.Асташкина. Синь, кода лятфнесазь велень эряфкшу ломаттне, и арасть коллективти пуроптыкс.

 

Ся кизотнень Кочетовскяй школань директоркс ульсь А.В.Архипов. Алясь сонць пяк лац морась, сяс най кирнезе учительхнень ширеснон художественнай самодеятельностень концертонь анокламста. Кие мяляфтсы ся пингть, тячемс лятфнесазь, кодама мялень салай концертт аноклакшнесть хорса морсихне. Велень клубсь фалу пяшксель ломаньда. Самодеятельнай артисттнень кштимаснон-морамаснон ванома ломаттне мольсть кода оцю илас. Хоронь участникне аф аньцек морсесть народнай морот, но и путнесть емла спектакльхть, лувондсть стихт, юморескат, нльне няфнесть акробатическяй номерхт.

 

Васенда вятиец коллективть ашель. Пуромкшнесть мокшаватне репетицияс, тияк аноклакшнезь выступлениянь программать. «Мяляфтса, мзярда велень шуфтонь аф оцю клубсонк кайгсь мокшэрзянь народнай морось, тейнек-арам, стенатневок шерьхксть, а вальмя клянцекне, сяконь ватт, лазовольхть»,—лятфнесы хорть пуроптыензон эзда фкясь К.В.Асташкина.

 

Васенце вятикс Кочетовскяй народнай хорти арась Р.Г.Климкина. Раиса Григорьевна ульсь профессиональнай хормейстеркс. Сон вятезе коллективть 1964 кизоть самс. Мокшавась пяк ламоти тонафтозень морсихнень. Пингстонза самодеятельнай артисттне получазь музыкальнай грамотать коряс васенце содамошитнень. Ся пингста сявомок хорть репертуарсонза фалу ульсть крхка смузь мархта мокшэрзянь морот, конат азонкшнесть народть эряфонц-ащефонц, коензон-обуцянзон колга. Эста ни коллективсь арась содафокс. Кацятовонь морсихне сидеста улендсть концерт мархта шабрань велетнень эса. Кочетовскяй  хорть лемоц кайгозевсь республикать келес.

 

Од ваймопожф нолдась коллективти сонь лия вятиец А.Т.Асташкина. Анна Трофимовна пяк лац содазень мокшэрзянь койхнень-обуцятнень, сядынгольдень народнай моротнень, тяка пингть, старандась сувафтомс эзост мезе-мезе одня. Сон тись обработка комозьда лама мокшэрзянь народнай моронди, конатнень ёткса «Ош паксенясь», «Вири молян», «Комля», «Роман Аксясь», «Каляда», «Срхкада, кудат, срхкада» и лиятне. Мокшавась маштсь верондафтомс велень артисттнень творческяй асушиснонды, кошардозень аф виздезь няфтемс эсь пряснон. Азома сявок, што Анна Трофимовна сонць морась баянца, мезсь сядонга мазопнезень  хорть концертонзон.

 

1979 кизоня Кочетовскяй хорти максфоль «народнай» лемсь. Анна Трофимовна гордостень марязь няфнесыне диплопнень, конатнень мархта казьф коллективсь. Синь сатомасост мокшавать оцю путксоц. Тячи А.Т.Асташкина пенсияса, но хорть мархта сотксонза ингольцекс кемот. Катк тяни сон аф лисенди коллективть мархта сценать лангс, сянкса лама тиенди репертуаронц козякофнеманкса, кочкси артисттненди музыкальнай произведеният, сонцьке сёрматкшни морот. Синь коллективсь морсесыне сембе концерттнень пингста. Стане жа хорть репертуарсонза аф кржа морода, юморескада, сценкада, конатнень сермадозь коллективть пуроптыенза К.В.Асташкина и Т.Ф.Ермакова. Синь «Ляназ» и «Тядяняй» моросна Инсарскяй районца арасть «народнайкс», лямбоста синь васьфневихть оцю сцена лангсовок.

 

2008 кизоста сявомок коллективть вятьсы С.П.Азыркина. Светлана Петровнань саманц мархта хорсь арась тяниень пингоннекс. Репертуарсонза, кунардонь пингонь  мокшэрзянь морода башка, эвондасть тяниень пингонь композиторхнень произведениясна.

 

Кочетовскяй народнай хорть сатфксонзон колга можна азондомс пяк лама. Тяфта, 1999 кизоня «Мордовию славлю свою» народнай творчествань республиканскяй фестивальса, кона лемтьфоль Мордовскяй автономиять пуроптомста 70 кизонь топодемати, участвовандаманкса  хорсь казьф «Лауреатонь дипломса», теенза максф «Мордовия Республикань Государственнай премиянь лауреат» лемсь. Мокшэрзянь музыкальнай фольклорть содафокс тиеманкса и Мордовия Республикать виияфтомаса оцю путксонкса Кочетовскяй народнай хорсь 2000 кизоня казьф  МР-нь Государственнай Собраниять Почетнай грамотасонза. Тяка кизоня коллективсь ульсь Венгрияса, коса примась участия Финно-угорскяй нароттнень VIII Международнай фестивальсост. 2003 кизоня хорсь няфтезе морамаса эсь маштомошинц Тверской областьса, а 2004 кизоня ульсь гастрольса Германияса. Тяда башка, коллективсь аф весть ульсь концерт мархта Москуса и Московскяй областьса.

 

Эрь кизоня Кочетовскяй народнай хорсь примиси участия «Шумбрат, Мордовия!» народнай творчествань республиканскяй фестивальса, коса сон аф весть казьфоль «Лауреатонь дипломса» и питни казнеса. Кепотьксонди, меля коллективти максфоль 300 тежянь цалковаенди сертификат костюмонь рамаманкса. Артисткатне надияйхть, што ня ярмакне маластонь пингть улихть нолдафт тевс.

 

Тячи «Мокшаваня» кочетовскяй народнай хорса морси кефкие ава. Етксост улихть кода пенсионерхт, стане и работай ломатть. Аф ваномок эрь шинь заняфшиснон лангс, синь аф сашендови кошярямс пуромкшнемс марс репетицияс, лисендемс сценать лангс. Морамась—тя синь кельгома тевсна, кона эжнесыне ваймоснон, максси вийхть-эрьгат. Арьсетяма коллективти творческяй од сатфкст, катк сон сяда товга кепсесы мяленьконь седиень токай мокшень мороса, ванфнесы культураньконь.

 

О.Колединова.

 


14.05.2020 №18
 
 
 

 
НОВОСТИ
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин