Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

«ПОБЕГ В НЕБО»

Но сембода лямбоста лятфнеса ся васедемать, мзярда мон, эста нинге прокс од журналистсь, прямой эфирса корхнень Советскяй Союзонь Геройть, лётчикть Михаил Петрович Девятаевонь мархта. Тя ульсь 1989 кизонь сёксенда. Студияв эста кочксевсть журналистт, режиссёрхт лия отделхнень и редакциятнень эздовок, сембонь ульсь мяльсна няемс эсь сельмосост, кулемс эсь пилесост легендарнай летчикть войнать колга лятфнеманзон. Хуш минь и корхнеме инжить мархта эсь кяльсонк, сякокс сембонди шарьхкодевсь, кодама аф тёждя ки савсь ётамс Михаил Петровиченди войнань кизотнень и Победать сатомдовок меле. Эфирти нолдаф колмогемонь минутась эста ётась, тейне-арам, пяк курокста. Сяс минь корхнеманьконь песта надияфтоме—васьфтемс Геройть мархта нинге аф весть, тиемс съёмкат сонь шачема-касома Торбею моданц лангса, сёрмадомс лятфнеманзон идькс пингонц, ялганзон и мала ломанензон колга. Но кати перестройкань пингсь, кати лия кодама туфталонкса, арьсеф планоньконь эряфс ётафтомс ашезь удала, мезенкса тячемс пяк ужяльдян, эсь лацон сюцян эсон. Пяк кенярдень, седиезон арась лад, мзярда кулине, што содаф российскяй режиссерсь Тимур Бекмамбетов и «Базелевс» кинокомпаниясь ушедсть съёмкат художественнай фильмати, кона лемдеви Михаил Девятаевонь подвигонцты. Фильмать кафта рабочай лемонза: «Девятаев» и «Побег в небо». Тя кеняртьфти кулять квалма минь гайфтеме Казань ошу, коса эряй М.П.Девятаевонь цёрац Александр Михайлович и максоме кой-мзяра кизефкс фильмать анокламанц квалма. Корхнеманьконь сёрмадыне диктофонц, вов кода сон лиссь.

 

—Александр Михайлович, шумбрат! Мархтот корхтай Саранскяйса лисенди «Мокшень правда» республиканскяй газетать журналистоц Николай Лобанов. Минь мяленьке сяда лама содамс фильмать квалма, кона лемдеви тонь аляцти,  Михаил Петровиченди. Мзярда ушедсть съёмкатне, коса синь мольфтевихть, кодама актерхт налхкихть рольхнень эса?

 

—Шумбрат, Николай! Газетантень колга лама кулендень, колганза аф весть азонкшнесь алязе, няфнесь эсонза печатлаф очеркт, статьят, азкст подвигонц колга. Сяс мон сюконян теенть тя цебярь тевонкса, алязень колга лятфнеманкса, арьсян сембе коллективти творческяй од сатфкст и васендакиге кеме шумбраши. Пингсь аф тёждятнень эзда, но минь кирдьсаськ. Тяни фильмать колга. Видец, тяддень февраль ковста «Базелевс» кинокомпаниясь ушедсь съёмкат «Побег в небо» художественнай фильмати, коса азондови алязень колга, кода сон аф пелезь шавсь врагть эса, кода прафтозь сонь самолётонц, кода   повсь пленц и кода тоста сон ворьгодсь. Съёмкатне мольфтевихть Ленинградскяй областьса, аф ичкозе Кронштадт портть-ошть маласа, Котлин островса. Вастсь пяк ладяй фильмань сюжетти, ся событиятненди, конат ульсть алязень эряфса.

 

—Фильмань анокламась аф тёждятнень эзда. Эряви лама декорация, оборудования, арни и лиенди техника, массовкас сядот ломань. Кодама тиф ушеткссь, мезе няфтсть съёмкань васенце шитне?

 

—Сембось ащи режиссерть эзда. Тимур Бекмамбетов тевонь содай, оцю опыт мархта ломань, специалист. Сатомшка лятфтамс сонь тяда ингольдень работанзон «Ночной дозор», «Ирония судьбы. Продолжение», «Ёлки» и лия фильматнень и шарьхкодьсак, кода ответственнайста сон тиендьсы эсь тевонц, мзяра творческяй арьсеф мяль сувафни работаса, штоба фильмась удалаль, кельговоль ваныти. Снимандаф васенце эпизоттне, кадратне тусть монь мялезон. Лама няендень войнать колга фильмада, но алязень колга сюжетсь васенце минутастокиге пичетьфти, сельмоведьфтома ваномс аш кода. Осал, вийфтома, китькскянь-китькскянь щамса военнопленнайхне фкя-фкянь кирдезь жувата лаца панцевихть вастста-вастс, пяксневихть лагернай помещенияс. Ламонцне эздост сельминголе кулсихть.

 

—Александр Михайлович, мяленьке содамс, кие налхксы главнай рольть, кие тонь фильмань аляце?

 

—Алязень роленц налхксы содаф российскяй актерсь Павел Прилучный. Актерсь од, войнань кизотнень алязтивок  тяфта жа ульсь 25 киза. Тейне-арам, режиссерсь ашезь эльбяде, сявомок тя рольти Павел Прилучнаень. Сон и шамаска ладяй, и семботь кадраса тиендьсы вишкста, смелста, маштозь. Тяфтамоль характероц и алязень, мезьс аф кярьмоди—тисы тевонц педа-пес, курокста. Аф стак корхнихть—мордватне упрямай ломатть, кодама ба стакас-сталмос афольхть пов, фалу мушендыхть вийхть, стакаста  лисема вастт. Тя мяльть пяк лац кемокснесы алязень, кона ворьгодсь врагть пизоста, примероц.

 

—Тон лятфтайть народоньконь лемонц, сонь характеронц фкя ширенц, а фильмаса ванысь шарьхкодьсы, што Михаил Девятаев мокшень плямаста, косонга тянь квалма азови?

 

—Шарьхкодине кизефксцень, Николай. Конешна, тянь лангс сяда лама шарфневи документальнай фильматнень и очеркнень эса, мзярда васенце вастти путневи геройть биографияц идькс пингста сявомок сирешити пачкодемс. Тя фильмась художественнай, сонь лият вешфксонза, васенце вастса ся подвигсь, конань алязень лаца мирса нинге кивок ашезе тиенде. А кда мяльс сявомс ся фактть, што салаф вражескяй самолетса ульсть од оружиянь анокламать коряс секретнай документт, тя геройшить, подвигть нинге сядонга касфтсы питненц, тисы сяда оцюкс. Внимательнайста ванысь тяфтаковок шарьхкодьсы, кодама народста-плямаста ульсь алязе, вдь фильмаса аф весть лятфневихть сонь позывноенза: «Мордвин», «Мордвин», кода тон марясамасть, кодама серьса лият? Макст эсь колгат содамс…» Пади, нинге мезе эвондай съёмкань пингть, арьсетяма тя кизефксть лангса.

 

—Тон мярьготь, Александр Михайлович, арьсетяма. Шарьхкодема стане, што тон семботь лац содасак, мезе тиендеви съёмочнай площадкаса, аф ширеста ваны ломанят?

 

—Видец, сембось ётни сельминголен. Тя фильмати мон главнай консультантан. Най кеме соткст кирттяма режиссерть, операторхнень, звукорежиссерхнень, актерхнень, продюсерхнень мархта, ванондсаськ сембе полафткснень сценарийса. Тон максоть кизефкс алязень юронзон коряс темати, мон тяни сяда лама карман арьсема, кода семботь тянь сувафтомс эряфс, кодама вастса нинге весть лятфтамс мокшень народть лемонц. Пади, тя кармай пленца улемстонза, коса алязе мялямсонза мрдафнесы идькс пингонц, ся мазы моротнень, конань морсезь теенза сонь бабац, тядяц, конань кулендезень велеряйхнень эзда. А пади, лия кодама вастса тянь колга азови. Мезсь нинге лятфтама, фильмась кармай цветной, вертикальнай форматса, васенце вастти путневи качествась.

 

—И мекольцесь, мезе мяленьке содамс, Александр Михайлович, мзярда экранц лиси тя фильмась, кодама пинге нолдаф сонь анокламанцты?

 

—Планц коре фильмась аноклави сай кизонь тундати. Кода ни азыне, ушеткссь тиф аф кальдяв. Но тячиень обстановкась и кинонь отраслясонга тись полафткст, сембе съёмочнай группась карантинца. Надиятама, тя стака пингсь, равжа шитне, туцятне курок туйхть эздонк, лядыхть фталу. Сембось арай эсь вастозонза, ламотне кярьмодихть эсь кельгома тевозост, сяда лямбоста кармай эждема шинясь, живолгоды-эреклай перьфпяльсь, сембе ня полафтксненди ули пефтома кенярдема. Войнань пингть аф сяда тёждя ульсь ломаттненди, но сембось теест кирдевсь, сяськовсь. И миньге кужесонк кармай праздник, кармайхть морот, кштимат, шачихть од семьят, итть!

 

—Спасиба, Александр Михайлович, азондомацень, цебярь валхнень-арьсематнень инкса. Тейть и семьяцти арьсетяма шумбраши, паваз и оцю мяльса учсаськ кельгома Героеньконь, тонь аляцень Михаил Петрович Девятаевонь колга фильмать!

 

—И теенть оцю сюкпря, мес газетасонт лама азонттада войнань участникнень, тяфта жа монь алязень, подвигснон колга. Уледа шумбрат!

 

Н.ЛОБАНОВ.

 


25.05.2020 №
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин