Мокшень народнай мора

Е.В.Калташкинать лац содасазь национальнай щамонь кельгихне. Тя мастерицать кядьса стаф панарса, сапоняса щафт аф аньцек миньцонк эряй мокшаватне, но и Москувоннетневок. Елена Васильевнань тернесазь Москуса ётафневи сембе мокшэрзянь илатненди. «Мордовское землячество» Межрегиональнай общественнай организациясь кирди соткст машты кядь мокшавать мархта. Елена Васильевна аноклакшни эрь илати мокшень мазы щамонь козя выставкат. Стамада и сюреса сёрмадомада башка сон тиенди ожнаста крганят, килькшт, котци мокшень цюлкат-почконят, каркст, наряжакшни мокшекс някат. Лиякс мярьгомс, аш тев, коса афолезе сафта тя машты кядь ломанць.

 

Героиняньке эрь кизоня примси участия «Шумбрат, Мордовия!» Народнай творчествань республиканскяй фестивальса. 2015 кизоня сон арась фестивалень лауреатокс. Елена Васильевнань лама дипломдонза, грамотадонза. Меля мокшавась получась благодарственнай сёрма РФ-нь Президентть видеса Мордовия Республикань представительствать эзда, конань эса теенза азфтольхть сюконямань валхт мокшэрзянь культурать ванфтоманкса-виияфтоманкса.

 

Мастерицань тевда башка, Е.В.Калташкина кельгсы мораманц, гармониять корява кштиманц. Лама киза сон морсесь Сире Сомай велень «Марлюня» фольклорнай коллективса. Мархтонза корхнемста шарьхкодевсь, конашкава сон пара вайме и лямбе седи ломань.

 

Вов мезе мокшавась азонды эсь колганза:

 

—Стамань и сюреса сёрмадомань тевти кельгомась тейне ётась тядязень эзда. Мон нинге одста ушедонь мокшень щамонь стакшнема. Аф кельгса стак ащекшнемазень. Нльне Шкаень оцю праздникнень пингста монь кирдемшказе аш, пчкясь озалень стама машинказень ваксс, кядне аф ащевихть тевфтома. Тялонда велень ломанць ваймоси перень тефнень эзда, эвондакшни сяда лама ётка пингоньке, конань мон стак аф ётафнеса. Кепотьксонди, тялонда сёрмадонь сюреса авань кафта панархт, стань кемгафтува мокшень сарафан и кефкие илань сапоня, кодань ветенц цюлкат-почконят и ниле каркст, кочкань ожнаста кемонь крганят, наряжань мокшекс кемонь някат. Вдь кизонда тейне аш мзярда стамс-сёрмадомс. Минь мирдезень мархта касфттама перень сёрот, кирттяма жуватат. Тяда башка, кизонда семьяньке касонды кемгафксува ломаньц. Ветецьке уноконьке ётафнесазь ширесонк кизонь каникуласнон, сашендыхть отпускс шабаньке.

 

Елена Васильевнань Шкайсь казезе нинге фкя асушиса, мокшавась сиредембяльхть ушедсь сермадома родной кяльса стихт.

 

Газетаньконь тячиень номерсонза макссаськ Е.В.Калташкинать стихотворениянц.

 

Седись терди МЕКИ ВЕЛИ

 

Шачень-касонь

 

Мокша ляйть трваса,

 

Тяса эрян, ковга ашень ту.

 

Азса видеть, улень и лияса,

 

Сяда цебярь васта

 

ашень му.

 

Улихть стамот,

 

конат тусть кунара,

 

Конат велень

 

стакать эзда пельсть.

 

Тяни велесонга

 

эряфсь пара,

 

Уштыхть газса,

 

кранцта шуди ведсь.

 

Кда одкс пингце тонь

 

ошса ётась,

 

Тяни мяльце меки вели самс.

 

Аньцек ашат тяса

 

кинди васьфтемс,

 

Аньцек аяш коза тейть

 

сувамс.

 

Ширемсь

 

тядянь-алянь строяф кудсна.

 

Сери тишесь кяшезе

 

кинять.

 

Тяза сави путомс

 

лама трудта,

 

Штоба вальмав

 

валдопнель шинясь.

 

Седись терди

 

шачем-касом крайти,

 

Тядянь-алянь

 

калмонятнень лангс,

 

Штоба таргамс

 

танцтиняста ваймоть,

 

Хуш аф ламняс идькс

 

пингти мрдамс.

 

Т.ВЛАДИМИРОВА.