Алёна ЭРЯКШЕВА: «МЯЛЕЗЕ СОТОМС ЭРЯФОЗЕНЬ СЦЕНАТЬ МАРХТА»

Алёна Эрякшева эряй Темников ошса, тонафни Темниковскяй 1№ школаса. Тядде шумордасы 9 классть, а сяда тов ёрай поступамс Л.П.Кирюковонь лемса Саранскяень музыкальнай училищать вокалонь отделениязонза.

1№ школада башка, тонафни музыкальнай школаса, морай фортепианоса и гитараса, а стане жа касфнесыне содамошинзон эстрадань вокалть коряс.

Алёна пяк кельгсы мораманц, вов ни лама киза (сценав васенцеда лисемац ульсь кунара, эста нинге ёмланяль) аф ащи озадонь седихть рузонь, мокшень, казаконь, лия моротненди. Сон лисендсь сяськикс «Весёлые нотки» конкурсса, сатнесь диплом «Темниковская свирель» фестивальть Гала-концертсонза. Сембоц 40 лама дипломоц фестивальхнень и конкурснень эса участиянь примаманкса.

«Морама ушедонь 6 кизоса Темников ошень ДК-са и ся пингста сявомок фалу примсян участия ётафневи пуромкснень, пялькстоматнень эса»,—мярьгсь Алёна корреспондентоньконди.

Музыкась арась теенза кельгома тевкс, сяс мархтонза и ёрай сотомс эряфонц. Тяда башка, морамать пяк кельгсы Алёнать тядяц, Оксана Васильевна. Сон Донской казачка, шачемас коре Ростов-на-Дону ошста. Алёна и Оксана Васильевна сидеста морсихть марса, примсихть участия конкурснень эса. Меля сатозь васенце вастть «Семьясь козя талантса» конкурсса.

А.Эрякшевать акац тонафни М.Е.Евсевьевонь лемса Мордовскяй государственнай педагогическяй институтса, конань курок шумордасы.

Семьянь азорсь Александр Николаевич—Темниковскяй райононь Лесные Сияли велеста мокшаля. Темников ошса, коза ся пингти Ростов-на-Дону ошста эряма ётась Оксана Владимировна, синь и арасть содафокс, а меле пуроптсть кеме семья.

Мрдатама Алёнать васенце выступлениянцты. Эста 6 кизоса кайги вайгяль стирнясь няфтезе прянц районнай сценать лангса «Весёлые нотки» конкурсса. Васенце тонафтыкс теенза тя тевса ульсь С.П.Майорова. Меле А.Эрякшевать тердезь тонафнема музыкальнай школав. Мархтонза работась (фортепианоть коряс) преподавательсь С.В.Пархаева. Эздонза стирнясь тонадсь разнай жанраса морама.

Сяда тов ульсь «Задоринка» ансамбльсь, конань руководителец Н.Л.Ерошина. 2015 кизоста сявомок Алёна «Весёлые нотки» вокальнай студиянь солисткаль (руководительсь Е.В.Висюлькина).

Эстраднай вокалть коряс маштомошинц, целайнек асувонц Алёна сядовок виияфтозень Искусствань школань преподавательть М.М.Доронинать мархта занятиятнень вельде.

«Шёл казак», «Васень паламась», «Зажгите свечи» и ламоц лия моротнень А.Эрякшева морсесыне оцю мяльса. Кули тя или тона концертть ётафтоманц колга, получай тердема конкурсс или фестивальс—аноклай мора тематиканц мяльса кирдезь.

Мзярда кизефтине, мезень колга сембода пяк арьси, сон эстокиге отвечась: «Поступамс музыкальнай училищать вокалонь отделениязонза и сотомс эряфозень сценать мархта».

Оцю спасиба Алёна азонды тядянцты. Оксана Васильевна сембоса кирнесы асу стиренц ширенц: и щапт выступлениянди стай, и морси иденц мархта.

Мзярда содафтонь А.Эрякшевать мархта и кизефтине, кие сон национальностьс коре, стирсь отвечась, што мокшаваня. Виде, кле, мокша аньцек алязе, но сембе сяка мокшаванян, вдь и шачень Мордовиянь инь сире ошса—Темникавса мокшетнень ёткса.

Од морсить ули нинге фкя кельгома тевоц—сон лентаняста тиенди панчфт, панчфонь пусмот. Пяк мазыста тя сембось лисенди.

Самоизоляциянь режимть пингста Алёна, а стане жа тядяц Оксана Васильевна, тевфтома кудса аф ащекшнихть. Вдь ули кода тонафнемс од морот, лятфтамс сятнень, конат ни нолявсть тевс. Тяда башка, Алёна аноклась и сёрмадсь видеовыступления военнай темас, кона сотф Великай Победать 75 кизонь топодеманцты.

Катк пяшкодевихть сембе арьсематне, од «тяштеня»!

Т.АЛЬШИНА.