Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Владимир ВОЛКОВ: «ВЛАСТТЬ ГЛАВНАЙ ЗАДАЧАЦ—ЛЕЗДОМС СЯ ЛОМАТТНЕНДИ, КОНАТ ПОВСТЬ ЭРЯФОНЬ СТАКА ПАЛАС»

 «Кафта ковда ламос ни минь работатама оцю анокшинь режимса, апак учсек эвондаф ламода чрезвычайнай условияса,—совещаниять панжемста мярьгсь Владимир Волков.—Тя положениять эзда сизесть ломаттне, сизесь экономикась, таколфты кизефкст эвондакшнихть трудонь рынкаса. Сяс тяни васенце вастти лисендихть ломаттнень и бизнесть ширень кирдемаснон коряс кизефксне. Эряви сяда курокста, бюрократияфтома пачфтемс адресс коре лезксть стака  прябалас повф отраслятненди и системообразующай предприятиятненди. Властть главнай задачац—лездомс ся ломаттненди, конат повсть эряфонь стака палас, конатнень эвондасть оцю карьхцьсна, юмафтозь работаснон и доходснон. Возможностеньке тянкса улихть, и синь эздост аф кржа. Россиянь Президентсь В.В.Путин азозе, што странаса примафт аф эсь лацонь решеният. Нинге вестевок тяфтама оцюдонга оцю ресурст ашесть ноляв экономикать и ломаттнень ширеснон кирдеманкса».

 

Совещаниянь васенце кизефкссь ульсь лемтьф медицинскяй и социальнай работникненди дополнительнай пандоматненди. Кода отмечазе  республикань Оцюнясь, Мордовиясь региоттнень ёткса васенцетнень лувксса кемокстась эрявикс соглашеният и пачфтезень нолдаф средстватнень медучреждениятненди, мезсь отмечафоль и Федеральнай казначействать руководстванц ширде.

 

«25 тёжянь цалковайста сявомок 80 тёжянь цалковайти молемс пандоматнень, конат кемокстафт Россиянь Президентть мархта, получазь тёжянь пяле мархта медицинскяй специалистсь,—мярьгсь Владимир Волков.—Тяда башка, март ковста сявомок миньцонк макссевихть региональнай доплатат (8 тёжятть цалковайста сявомок 20 тёжянь цалковайти молемс) врачненди и медперсоналти. Марнек федеральнай и республиканскяй стимулирующай пандоматнень получазь 4550 медицинскяй работник, тяконь лувксса 1100-да лама врач, скорай помощень 660 работник. Тянкса нолдаф 213 миллион цалковай».

 

Мартста и апрельста медикненди сембе пандоматне максовсть эсь пингстонза. Но, кода отмечазе В.Д.Волков, медицинскяй работникнень ширде сашендыхть тя темать коряс кизефкст. Тяфта, мекольдень колма шиста ульсь примаф республикань Оцюнять «пси линиязонза» 20 тяфтама звонок. Владимир Волков путсь Мордовиянь здравоохранениянь министрть Олег Маркинонь инголе задача—виияфтомс медицинскяй учреждениятнень эса разъяснительнай работать, пачфтемс информациять эрь сотрудникти. Тяда башка, республикань Здравоохранениянь министерствати и социальнай страхованиянь фондть отделениянцты эряви пяк внимательнайста малаткшнемс медработникнень эряфснон и шумбрашиснон обязательнай государственнай страхованияснон колга Россиянь Президентть Указонц эряфс ётафтоманцты. Кода азондозе МР-нь здравоохранениянь министрсь, тячиень шити 17 медицинскяй работниксь, конат коронавируснай  инфекцияса пациенттненди медицинскяй лезксонь максомста синць сярятькстсть тя вирусса и арасть мзярошка пингс аф трудоспособнайкс, получасть 68,8 тёжянь цалковаень выплатат.

 

Компенсация пандовсь кафта медицинскяй работникнень, конат кулость, семьяснонды. Тяфта жа республикань Оцюнясь башка мяль шарфтсь эсь пингстонь пандомать лангс и социальнай обслуживаниянь организациянь работникненди.

 

Республикань власттнень башка контрольснон ала ащихть идень мархта семьятнень и работафтома лятф ломаттнень ширень кирдемаснон коряс кизефксне. Россиянь Президентсь В.В.Путин 11 майста примась решения максомс 10 тёжянень лувксса пандомат 3 кизоса иттнень эзда  сявомок 16 кизосотненди молемс. Тя мерась пяк эрявкстсь. Тяни мольфтеви активнайста заявлениянь примамась. Тяфтама пандомат Мордовияса получайхть 100 тёжяньда лама идь, тянкса нолдави 1 миллиартта лама цалковай.

 

Тяда башка, 5 тёжянень цалковай получайхть семьятне, коса улихть 3 кизоти молемс итть. Тяфтама пандомат получай 19 тёжянь семьясь.

 

Тяфта жа васенце июньцта сявомок ушедовихть пандоматне 3 кизоса иттнень эзда сявомок 7 кизосотненди молемс. А ломаттне, конат юмафтозь работаснон 1 мартта меле, апрельста сявомок июнти молемс получайхть работафтома лядоманкса пособияти дополнительнайста 3 тёжятть цалковай эрь идть инкса. Республикаса тя ширень кирдемань меранкса ули кода пшкядемс 2 тёжятть ломаненди, эздост 850 ломанць оформляндазь ни ня пандоматненди документтнень.

 

Кода азозе МР-нь социальнай защитань, трудонь и ломаттнень заняфшиснон коряс министрсь Игорь Князьков,  1 апрельста сявомок 21 майти молемс занятостень центратненди пшкядсть 7 тёжятть ломань—тя колмоксть сяда лама. Тячиень шити Мордовияса официальнайста лувондови работафтома лятф 8124 ломань.

 

Совещаниять пингста тяфта жа ванондовсть экономикать и бизнесть ширенц кирдеманц коряс кизефксне.

 

Расчеттнень коряс, прябалас повф предприятиятненди государствать ширде пандоматне (МРОТ-онь размерса эрь сотрудникти) республикаса ули кода получамс 7 тёжяньда лама малай и средняй бизнесонь субъектонди 20 тёжянь работникснонды. Од мератнень коряс, конат азфт 11 майста, примаф стакас-сталмос повф отраслянь ёмла и средняй предпринимательствань предприятиятнень, индивидуальнай предпринимательхнень и социально ориентировандаф НКО-нень тяддеть омбоце кварталонц инкса страховой взносснон и налогснон списандамаснон коряс решения. Примафт стане жа самозанятай ломаттнень ширень кирдемаснон инкса решеният, лездомс теест тиемс панжадокс предпринимательскяй тевснон, и получамс ширень кирдема государствать ширде.

 

Тяфта жа путф задача—виияфтомс од кредитнай программать коряс работать, кона водендаф занятостть ширенц кирдеманкса. Корхтамась мольфтеви 2 процентонь алу зарплатанди кредиттнень колга.

 

Совещанияса стане жа лятфтафоль, што республикаса аноклаф ограничениятнень валхтомаснон коряс мольфтемань план. Но Мордовияса мзярс нинге тевса оцю анокшинь и самоизоляциянь режимсь сятненди, кие аф работай, и кинди 65 кизода лама.

 

«Кода няеви, ламотне, аф шарфнихть оцю мяль карантинонь режимть лангс, хуш и мекольдень пингть COVID-са урмаськодыень лувкссь кирсь, но синь марстонь лувкссна лядонды оцюкс. Тяконди, кассь пневмонияса сярядиень лувкссь. И нят пациенттне стане жа путневихть стационарс пчкафневома. И кда пневмонияти шоряви COVID-19-сь, ломанць эстокиге пови стакаста сярядихнень лувксс. А тя пяк пелькс». Кда мелянь майста республикаса лувондовсь пневмонияса сяряди 266 ломань, тяни эрь шиня больницяв повонды тяфтама урма мархта 100-да лама ломань. Врачне, здравоохранениянь сембе системась работайхть мезе ули вийсна.

 

«Минь няйсаськ, што мекольдень кафта шитнень коронавирусса 70 сярядить эзда эрь колмоцесь—нят аф работай пенсионерхт. Сят, конатненди эряви ащемс кудса, самоизоляцияса или больничнайса,—мярьгсь Владимир Волков.—Сяс мярьгондян сембе эряфкшу ломаттненди ащемс карантинца. Тяни мольфтеви пневмониянь эпидемия. И кельме, вармав ушесь тянди вятни. Лафча иммунитет мархта сире ломаттненди тя пяк пелькс».

 

«Коронавирусонь пелькссь лядонды нинге оцюкс. Сяс оцю православнай праздниксь—Тройцясь, кона тядде кармай 7 июньцта, тейнек васьфтема уликс ограничениятнень сембе ширде ванфтозь»,—мярьгсь Владимир Волков.

 

Владимир Волков лятфтась нинге работай предприятиятнень эса санитарнай вешфкснень кемоста ванфтомаснон колга. «Ня вешфксне аф лафчепнемат аф тяни, аф сай пингть. Главнайсь тяниень пингть—аф нолдамс инфекциять оцю трудовой коллектифненди. Мярьгондян Правительствати и райононь оцюнятненди виияфтомс контрольть санитарно-эпидемическяй вешфкснень ванфтомаснон мельге и ётафтомс проверкат сембе работай предприятиятнень эса».

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022