Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Наша семья

МАШТЫХТЬ ПОКОДЕМА, МАШТЫХТЬ И ВЕСЯЛГОТКШНЕМА

Мирттне-рьвятне кафцьке шачсть-кассть лама идень семьяса, коса шабатнень тонафтозь трудть кельгома, фкя-фкянь мархта ладязь эряма. Иван Ивановичень тядянза-алянза касфтсть 8 итть. Евдокия Петровна работакшнесь  совхозса телятницакс. Иван Тарасович—трактористоль, тюрсь фашисттнень каршес Великай Отечественнай войнаса. Примась участия Сталинградскяй битваса. Сон кафксть ранендафоль. Мокшалясь И.Т.Барашкин врагть каршес афкуксонь геройкс тюреманкса казьфоль боевой наградаса.

 

Татьяна Ивановнань тядянза-алянза, Екатерина Петровна и Иван Васильевич Мититтне, стане жа эряфоньберьф виень апак ужяльтть трудендасть совхозса, шачфтсть-касфтсть 6 шабат. Екатерина Петровнанди тядде топодсь 80 киза.

 

Мрдатама Барашкиттненди. Татьяна Ивановна профессияс коре бухгалтер, тонафнесь Инсарскяй аграрнай техникумса. Работакшнесь школьнай столовайса пидикс-паникс, велень клубса—заведующайкс, художественнай руководителькс. Тяни ваны Лфна велень Культурань кудть арушинц мельге, работай тоса урятцикс. Мокшавать пяк мазы вайгялец, сон кельгсы мораманц, сцена лангса выступандаманц. А мирдец, Иван Иванович, асу баянист. Синь кафцьке морсихть «Марлюня» фольклорнай велень ансамбльса. Иван Ивановичень нинге ёмланяста салазе мяленц музыкась. 6 кизоса родителенза теенза рамасть гармония. Сон тонафнесь морама гармонияса, а меле—баянца, Николай оцю брадонц лангс ванозь.

 

Барашкиттне эсь асушиснон мархта весялгофнесазь-мазопнесазь велень клубса ётни сембе илатнень, мероприятиятнень. А конашкава весяласта васьфнесазь мирттне-рьвятне пялост сай инжихнень, шачема шитнень, праздникнень. Кудсна пяшкотькшни моронь вайгяльса, гармониянь корява кштимаса.

 

Барашкиттнень 2 шабадост и 5 уноктост. Стирьсна профессияс коре бухгалтер, цёрасна—музыкань учитель. Синь семьяснон мархта эряйхть Инсарса. Уноксна пцтай фалу улендихть бабаснон-атяснон мархта. Сембода оцюти, Романонди, 16 киза. Сон тядде тунда васенцеда варжазень виензон видемань-сокамань тевса. И тянкса маряй гордость марнек семьясь. Ангелинати 15 киза. Стирнясь лац тонафни. Щаванц-щятянц лаца кельгсы мораманц. Выступандакшнесь Кочетовка велень «Мокшаваня» ансамбльть мархта «Шумбрат, Мордовия!» Народнай творчествань республиканскяй фестивальса. Виктория унокснонды 12 киза, стирнясь варчсесыне виензон спортивнай гимнастикаса. Ярослав шарфни оцю мяль музыкати и математикати, ёрай сотомс эряфонц музыкать мархта. А сембода ёмла уноконяснонды, Аринати, 2 кизот. Татьяна Ивановнань валонзон коряс, афкуксонь павазсь семьяса. Сон лувондсы прянц павазу авакс-тядякс, щавакс-бабакс. Мокшавась сюконяй Шкайти идензон и уноконзон инкса.

 

Азома сявок, Барашкиттне кода афкуксонь велень ломатть, кирдихть кудонь лама жувата. Синь улихть тракссна, сявасна, вазнясна, тувосна, куднумолсна, мацисна, яксяргсна, саразсна. Пересост касфтыхть перень сёрот. Ульсь пинге, синь тонафтозь трудонь кельгома идьснон, а тяни унокснонды няфнесазь эсь примерсост, кода добувакшневи-касфтови кшись. Барашкиттнень уноксна сафтсазь велень эрь тевса. Кие тракс вяти луга лангс, кие тувотненди и куднумолхненди тише сязенди, кие пере валонды, панденят кочки. Сембонди вийс и мяльс коре муви тев. Кода корхтай Т.И.Барашкинась, вдь трудонь кельгомась и эрь кодама тевса маштомась аф                          макссеви ломанти стак ащезь, а эвондафтови-касфтови нинге идькс пингста. Аф стак инголи ёфси ёмланяста водендакшнезь шабатнень трудендамати. Штоба ломанць идькс пингстонза ни шарьхкоделезе, што покодемась—тя эряфть аф явови пяльксоц, конань эряви кельгомс и получамс эздонза седиень петема.

 

Т.ПЕТРОВА.

 


02.06.2020 №
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин