ПЕТЬКАТ-ПЕТЬКАРЯТ

—Ва и пара,—пшкядсь Вовань аляц и няфтсь шава койкать шири: ся, кле, тонне.

 

Сувафсь весяланя. Ланга щамонзон кайсемста лабордсь-корхтась. Поездста, кле, валгонь. Тяста эряви пачкодемс Келдажу, да автобус кармай улема аньцек ванды шобдава. Сави, кле, тяса весь ётафтомс, хуш гостиницатнень прахснонга аф кельгсыне. Лемонцка азозе: Коля-Николай.

 

Вовань аляц Коля-Николаень афи кизефнезе, а ся лабордсь и лабордсь. Шапсь рузкс. Да Вова марязе: «девять» валть азонкшнесы—«девоть». Мокшень акцент. Аляцка шарьхкодсь, пшкядсь теенза, Коля-Николаенди, мокшекс:

 

—Сталботь, келдаженнят?

 

—Шачемас-касомас тостоннян. А тяни эрян лия областьса. Рязанть маласа. Нармонень фабрикаса слесарькс покан.

 

—И кода тоса эряфсь?

 

—Жизнясь—во!—вяри кеподезе пяльхканц Коля-Николай.

 

Шрать лангса бта учезь ванць электрическяй чайниксь. Вовань аляц стясь, каясь чайникти графинцта ведь, уромсь розеткати.

 

—А! Чайня?! Тя—пара!—шовазень кядензон келдаженнесь.

 

Аф лама пингта меле кафта алятне озафтольхть ни шрать ваксс. А Вова стаки лувондозе книганц. Тоса прокурорсь и ворсь парясть ни, лиссть щама-каряма. Прокурорсь адерлясь, и ворсь трнатозевсь, мзярда няезе сянь петлица мархта кителенц.

 

Коля-Николай азондсь—сонцень содась:

 

—Велеста тунь аф кунара. Тоза, Келдажу, лядсть сире тядяне-аляне. Стаказа теест ярхцамбялень, уштомбялень пяльдевок. А монь тевне од вастсон морайхть. Квартиразе оцю, машина рамань...

 

—Улема, лац пандыхть?—кизефтсь Вовань аляц.

 

—Аф пандомаса тевсь,—яфодезе каршек озафсь кяденц.—Тяни аньцек зарплатать лангс кие эряй? Тяни эряма маштома.

 

—Кода—маштома? Кода покодят, стане и топодят.

 

—Покодемс эряви аф аньцек государствати. Да мезе тонафтан эсот! Няйса, сельмованомасат, грамотнайхнень эздат, газетат лувондат. А тоса мезе тяштихть? Эк, оцюдонга оцю васттнень эсонга сяда маштыхне месендихть! Эсь ширезост кргайхть. Чурбакофт-месть. А тейнек, мелкотати, мезе ляткшни? Уйфтть—мезе пови,—корхтась Коля-Николай.

 

—Да вдь ломанць кодама вастса тяза покодь, салай-салай—пови,—пшкядсь Вовань аляц и валхтозень сельмованоманзон, ушедсь клянцекснон нарнема кядьруцяняса. Сонцень ялгань мзолфоц шамастонза нардазь нардавсь.—Чурбаков улеза али Чурбанов—сембе сяка...

 

—Мле мезе! Пови! Ся, учт, мзярда пови. А эрямс тяни эряви,—ашезь макссе пря Коля-Николай. Сон копордась пси чайда, путозе стаканонц шрать лангс, поладозень валонзон:—Вона, монь брадозе оцю ошса милиционер. Зарплата лангс эряй. Арьсят, сон эряй? Пря муцси. Молян пялонза—аф уленди мезьда андомс-симдемс инжиенц. А кда монь ширезон сай? Пир закачу! Тонга мольхть—и шяняпт, и рястаф атекш путан инголет, ёк-комарёк.

 

—Кода тяфта сафтсак?

 

Коля-Николай ёрдась ванф Вовань шири, сяльде шарфтсь алянцты:

 

—А тон, случайна, аф «Птицепромста» оцюнят?

 

—Аф,—мярьгсь Вовань аляц.

 

—А монь аф эряй стама шизе, мзярда фабрикаста куду аф вятерьфтян атекш али кемоньшка ал.

 

—А мезенди сняроть... эрь шиня? Уцезста нолясазь? Пяле питнеда?

 

—Кодама питне?—яфодезе кяденц Коля-Николай.—Трешниковок аф паннян.

 

—Эста... пдяфнят?—кизефтсь Вовань аляц. Вовавок кадозе книганц, пиленза таргавсть корхтайхнень шири марнек.

 

—Аф пдяфнян, а сявондян.

 

—Да вдь сянкса сюцихть. Фабрикаса эздонт вона мзяра! И кда кажнайсь эрь шиня сяви тифтень атёкш, сараснень кадсасть «женихфтома». Шарьхкодьсак? Петькарятне лядыхть Петькафтома.

 

—А минь сарасненьге... тифтенянь. И аф ктнамстост-керкнамстост, а сейхтьфкаста ни, аропткфкаста.

 

Вовань аляц ванць каршестонзоть лангс сельмалга:

 

—Али аш ваныхть? Проходнойса, чяй, вахтёрхт...

 

—Стапт улихть. А минь нармоттнень аф сияне лихнесаськ. Мон печкома цехса машинатнень перьф шаран, сталботь. Тоса ленточнай транспортерсь кувака тяфтама. Фкя пец цехса, омбоцесь—ушеса. Потмоста ульцяв ляткснень-меснень лихнесыне. Сонь омба песонза эрявикс пингста учси Петькась,—мярьгсь Коля-Николай.

 

—Кодама Петька?—ашезь шарьхкоде Вовань аляц.—Атёкш?

 

—Аф атёкш, а ялгазе. Петр Булкин. Грузчикокс тоса лувондови. Дык вот... Мон газета потмос ашкодан кафта «петькат»... али «петькарят»—аньцек улест сяда куянят-свежайнят—тонгсайне целлофанонь кяскавняс и ёрдасайне транспортёрть шары лентанц лангс. Сон и вжнафтсыне-врнофтсыне панжада менельть алу. А Петька ялгазе ашкоткскятъ васьфтьсы. Фкя атёкшть али саразть—кучити, омбоцеть—эстеенза, учити.

 

—Ожу-ожу... А мезенди сняра нармонть кудга ворьфнесасть? Афи поревихть,—варжакстсь Вовань аляц азондыть сельмос.

 

—А минь аф аньцек минць поренттяма. Мишенкшнесаськ кантфоньконь, а ярмаконясь аф шоряй.

 

—Ну, а алхнень кода лихнесасть? Сят транспортёрть лангста пяцыемста тапсевихть.

 

—А сятнень—лиякс «кеворьфнесаськ». Сменать аделамста пяшкодьсайне брюка зепонень алда и туян—кивок валнявок аф азы. Аньцек лангозон, пади, аф пара ширде ваномась. Зепоне таргозьфт-уфафт, молян—кода самовар.

 

—И проходнойса вахтерсь аф кашторды?

 

—Месть кашторкшнемс! Сонцьке аф аньцек зарплатанц лангс эряй. Теензовок каннетяма и алнят, и сюрьхцем мархтонят. А вага зоотехниконьке—Пётр Петрович—аф ломань—зверь. Ся няендярятанза уфаф зепт—пеце, аф ужяльттянза.

 

—Месенттянза? Суду  максфттанза?

 

—Аф, Пётр Петрович лиякс наругатанза. И коста прязонза сась стама наругамась?! Сонць алясь—богатырь. Кядьлапшенза—каймонь келесот. Няйхтянза, сядонга тустоптсыне стаковок туста сельмокабанзон, малады тейть, келептьсыне кядьлапшензон и—лап-лап!—«таргозьф» зепе васттненди лапиетянза. Алхне шулгондовихть и шудезевихть пилькнень кувалмова. Кизонда нинге-нинге. А тялонда... стане шулкф алса эшеляфста куду самозт брюкатне арайхть эйзюрокс. Ну и промоз—прахаванясь сяволезе!—пувордазе кургонц Коля-Николай.

 

Алятне каясть тага тифтень стакан чай. Коля-Николай коль корхтась и корхтась. Шнафнесь пря. Кле, вага велиге ускан чемодан атекш. Тоса, кле, сире тядянень-алянень порьфтьсайне топодемс...

 

Вовань аляц омбоце стаканонц шамдомда меле стясь шрать ваксста. Лиссь коридору, улема, эшендема. А атекшень салсись ванфонц шарфтозе Вовань шири:

 

—Школьникат? Кодама класса тонафнят? Кафксоцеса? Отметкатне кодапт?—и ответонь апак учсек, тага кизефтсь:—А аляце мезькс работай?

 

—Алязе? Прокуроркс.

 

Коля-Николаень сельмонза шуфтомсть. Сон кармась варжакснема кой кенкшть, кой вальмять шири. Шамасонза эводема-абондома.

 

 

Михаил МОИСЕЕВ.