Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

50 лама киза марсот

Сайгашофнень семьясна Торбеевскяй райононь Салазгорь велеса ащи кепотьксокс сембе велеряйхненди. Мария Семёновна и Иван Иванович ведьгемоньда лама киза марсот. Аф ваномок кизоснон лангс, синь тянемс эряйхть кельгозь, ладязь, фкя-фкянди честень путозь.
—Минь сембе эряфоньконь ётафтоськ тяфта,—мярьгсь Мария Семёновна.—Аньцек арьседа, 50 лама киза эрятама фкя кудса, ярхцатама фкя шра     ваксса. Содасаськ фкя-фкянь сярятьфоньконь, прянь вятеманьконь.
Шачсь Мария Семёновна   Зубово-Полянскяй     райононь Каргал велеса. Зубово-Полянскяй педагогическяй училищать аделамда меле стирть прважазь работама начальнай классонь учителькс Салазгорь велень средняй школав. Тяса и васьфтезе сай пингонь мирденц Иван Сайгашовонь. Тусть фкя-фкянь мяльс. Иван Иванович ульсь культурнай од ломанькс, салазе од стирть мяленц. И мзярда тердезе рьвакс, Мария Семёновна ашезь атказа. Налхксть весяла свадьба. Мария Семёновна пяк павазу и мялезонза, што кочказе работама вастокс Салазгорть. Тяса шачсть кота иденза. Сембе синь трудонь кельги, шнама ломатть. Сембонь высшай образованиясна. Цёрасна, Михаил Иванович, директор Краснопольянь основной общеобразовательнай школаса. Тяса начальнай классонь учителькс работай стирьсна, Татьяна Ивановна. Нинге фкя цёрасна, Николай Иванович—зоотехник, Алексей Иванович—Москуса водитель. Сембе синь кельгсазь родной велеснон, тядянь-алянь кудснон, коса ётасть шабань кизосна. Тяза сашендсть студентокс. Тяза вятезь эсь рьваснон, мирдьснон. И сембонь Сайгашофне примсезь, сембонди ульсть кельгома ломанькс. Идьсна казсть теест 8 унокт и уноконь фкя идь.
Сиренятненди кой-коста уленди аф тёждя. И тя шарьхотьф. Иван Ивановиченди—83, Мария Семёновнанди—79 киза. Кизотне кой-коста макссихть эсь колгаст содамс. Да и работасть синь аф тёждя вастса. Мокшавась макссь школати пцтай 40 киза. 11 киза    завучель. Иван Иванович 40-да лама киза  покодсь водителькс. Сембось ульсь эряфса. Кисна мзярдовок апак ацаколь панчфса. Но эрь прябалать эзда лисендсть ломанькс, достойнайста. Синь мзярдовок аф юкснесазь идьсна, фалу сашендыхть лездома, инжикс.
 Сайгашофне аф кельгсазь прянь шнафтомаснон, хуш  ули мезе теест азондомс.  Но Салазгорьса содасазь, што синь ару вайме ломатть. Вестевок ломаненди ашесть атказакшне лезксса, киндивок ашезь сёлгонда кенкшснон. Тянь колга корхтасть и велень администрацияса, и школаса.
—Сайгашофнень семьясна—цебярь пример оттненди,—азозе Мордовия Республикань Заслуженнай учительсь Г.В.Сетяев.—И пяк пара, што Мария Семёновна сашенды, аф юкснесы школать. Примси участия и мероприятиятнень эса. Иван Ивановиченьге колга азан аньцек шнама валхт. Ломанць сон пяк смузю, отькорь, панжада седи.
И.СИДОРОВ.
Снимкаса: Мария
Семёновна и Иван
Иванович Сайгашофне.

04.06.2020 №21
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин