Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Обо всем понемногу

7 июньцта—Тройцясь

Ведьгемонь шинь етазь Христость живолгодомда меле—Святой Тройцясь—Пятидесятницась. Тройцяда ингольдень еткшиня церькавса помондавихть кулофне. Тя шись лемневи—Тройцянь ёткшикс. Тройцянь омбоце шиня—Святой Духонь шись (Духов  день). Сон эрси фалу понедельникста.
Христость шачемс Пятидесятницать  значенияц лияль. Сон лемтьфоль Моисеень законца кемонь заповеттненди, конатнень теенза максозень сонць Шкайсь Синайскяй пандть пряса. Тройцясь лятфни христиаттнень и лия библейскяй событиятнень колга. Менели тумдонза инголе Христоссь надияфтсь  апостолхненди кучемс лангозост Святой Дух. Сянкса мярьгсь теест  аф тушендомс Иерусалимста. Христость менели тумда меле учениконза мрдасть Иерусалиму и сувасть самай ся кудти, коса ульсь Тайнай Вечерясь. Тоса ульсь и Богородицась и сембе учсть лангозост Святой Духть валгоманц эса.
И апак учсек марясть менельста вармакс сай шум, кона пяшкодезе марнек кудботмоть.
Тяфта валгсь лангозост Святой Духсь и синь кармасть корхтама разнай кяльса. Тяза пуромф ломаттне  пяк дивандазевсть тянди. Кажнайсь марязе сонь кяльсонза корхтамать.
Православнай христиаттне Тройцянь шиня кудснон и церькавть наряжакшнесазь сянгяря  тараткаса и панчфса. И тя обычайсь моли нинге Ветхозаветнай церькавста. Тя тиендеви  ся пингста,  мзярда Моисей получазень Шкайть эзда кемонь заповеттнень. Эста Синайскяй пандть видеса сембось сянгярьготкшнесь и панчсь.
Святой Тройцянь шиня морафтови Святой Духти молитва.
 
Машфтсаськ холодильникста шинеть
Мзярда холодильникса эвондакшни шине, сявода киндер-сюрпризть эзда пластиковай контейнер, тиеда несколька варяня вярдень пяльксозонза. Каяда эзонза симомань сода и несколька таблетка активированнай уголь. Варяня мархта пластиковай «топонять» путость алонь ванфтомань ячейкав. Шинесь юмай. Мзярда тага эвондакшни шине—полафтость коробканять потмонц.
 
Пеетькс пакшкат
—Удаласть тячи тонь пачатне,—корхтай шабравась азоравати,—аньцек вов аф ламода эчкт.
Азоравась пеедезевсь: «Да тон кафтонь сявондят».

—Кулхцонтт, ялгай, мзяра стирь тядязти ашень вятне няфтемс, конатнень лангс ёрань рьвяямс, фкяське мялезонза ашезь ту.
—А тон мук тядяцень кодяма.
—Мушендонь. Эста кецорондась алязе.
 
Фкя хирургть судендазь и вятьсазь ляцемс. Ки лангса сон кизефнесы конвоирть:
—Азка, а кодама тячи шись?
—Понедельник,—отвечась тонац.
—Ну и кальдявста жа ушеткшни тейне тя недялясь!

Фкя алясь азонды омбоцети:
—Минь ошсонк ули ресторан, коса илять анттядязь и симттядязь питнефтома. Топодемс танцевандак и венди номер максыхть. Сембось питнефтома! Шобдава таксиса куду усктядязь, да нинге доллархт тонгихть зепозт.
—А тон тоса улеть?
—Аш, тейне рьвязе азондозе.
 
—Мес работама сявондят аньцек рьвяяфт?
—Сяс мес синь тонадсть сюцематненди и аф эряскодыхть рабочай шида меле куду.
 

04.06.2020 №21
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин