Поиск по сайту: 
 

Архив
 сентябрь 
 2020 
пн вт ср чт пт сб вс
 123456
78910111213
14151617181920
21222324252627
282930    

 
 

 

Наши мокшанские сыновья и дочери

Ф.Ф.Пьянзинонь 80 кизонь топодеманцты

ЖУРНАЛИСТ И ПИСАТЕЛЬ
Фёдор Фёдорович Пьянзин, кода и ламоц лия мокшень писательхне, эсь творческяй тевонц ушедозе газетав сёрматкшнемать эзда. Тя лездсь теенза лац содамс эряфть и мумс эсь кинц мокшэрзянь литературав.
Шачсь Федор Пьянзин 1940 кизонь 10 июньцта Старошайговскяй райононь Сарга мокшень велеса. Тяса аделазень сисем класснень, а сяда тов тонафнесь Сире Шайгавонь средняй школаса. Эряви азомс, кафцьке школатнень эса тонафнесь цебярьста. Оценканза ульсть аньцек «нилет» и «ветет». Сидеста улендсь велень и районнай библиотекатнень эса. Нинге шабакс пяк кельгозе книгань, газетань и журналонь лувондоманц, и ульсь оцю мялец варжамс эсь творческяй виензон. Кядец эслек венемкшнесь ручкати. Кармась тяшнема корреспонденцият, заметкат районнай и республиканскяй газетатненди. Варжазе виенц азксонь сёрмадомаса. Теенза тя ульсь цебярь школакс.
Средняй школаса тонафнемать аделамдонза меле савсь кой-мзяра пинге покодемс и производстваса, и школаса.
Но сембода лама киза кяденьбецек мольсь журналистикать мархта. Ульсь корреспондентокс и ответственнай секретарькс «Трудовая правда» старошайговскяй, «Призыв» лямбирскяй, «Заря» кочкуровскяй районнай газетатнень эса, редакторкс—«Резинотехника» заводонь «Трибуна рабочего» многотиражнай газетаса. Пара мяльса сонь лятфнесазь «Мокша» журналсовок, коса фкя пингть стане жа работась.
И, конешна, Федор Федоровичень литературнай творчестванц виияфтомаса-кеподемаса оцю талекац М.Горькаень лемса Литературнай институтть, коса сон тонафнесь оцю мяльса и васьфнесь странасонк лама содаф прозаиконь и поэтонь мархта. Москуса тонафнемста сонь аф фкя произведенияц лисендсь тястонь периодическяй печатнай изданиятнень эса.
Пара азомс, писательсь Пьянзин аф кржа кенерсь тиемс мокшэрзянь литератураса. Сон сёрмадсь сянь колга, мезе ётась сельминголенза, токазе седиенц, арась мяляфтовикс. Сембода удалафт велети лемтьф произведениянза. Тя темас сон сёрмадсь лама очерк, азкс, повесть.
«Кда кенерят поездти…», «Мук эряфса вастцень», «Васедемат», «Азк аньцек видеть», «Седить тердеманц коряс» книганзон эса, конат лиссть Мордовскяй книжнай издательстваса, «Мокша» журналса и периодическяй печатьса нолдаф произведениянзон эса авторсь няфнесыне велень и ошень эряйхнень эряфснон, синь таколдомаснон и пичефксснон, кеняртькшнемаснон, тиенди анализ героензон мяльснонды и арьсемаснонды. И тя пяк тушенды лувихнень мяльс.
Писательть творчествасонза аф ёмла васта занцесь юморсь и сатирась. Сонь сингорямань-пеетькшнемань азксонза, фельетононза лисендсть «Мокша» журналса, «Мокшень правда» газетаса и лия периодическяй печатнай изданиятнень эса.
Ф.Ф.Пьянзин сёрмадсь мекольдень шинзон самс. Тячи минь печатласаськ сонь азксонзон.
Филянь СтЁпань эряфоц
Урма

Филянь Степась сиредсь,
 кармась сярятькшнема. То
 фкя, то омбоце вастонцты аф лад, то пиземти пакаренза шулкфтыхть, то пильгонза лоткайхть якамда, а кда кивок кучсы сяпи веденкса, кафксть или колмоксть ётасы сембе велеть.
Мекольдень пингть эвондась тага фкя урмац: аф удомась. Кода тят сува пялонза, корхтаматне аньцек сякот: аф уды Степа и сембе. Хуш, кле, кодамовок пунянят анамс пчкафнихнень кядьста, шять, сят лездольхть.
Вов и тянивок. Кудоц пяшксе пухадида. Качамть пачк няевихть аньцек акша пятнат, конат, сяда маласта ванозь, арсихть ломанень шамакс. Сонць азорсь ащи голландканц ваксса арзять лангса и азонды:
—И вов тячивок: сргозень колма частста шобдава и оду ашень матодовкшне. Хуш мезе тиентть!
—Да исяк шиньгучкать ширезт сувсень—удоть. Иляденди сувань—тага удат,—мярьгсь Чикол Вася.
—Шить мон удан, а вов веть—хуш  кравул юватькшнек.
—А мзяра мле тейть тага удома? Сутканьберьф, што ли? Ся аньцек тувось стане утци, штоба пяконе куямс.
—Соньге куяфтомс да печкомс,—прибавазе Хилайсь.
—Сиволец аф пореви, пяк ни сире,—пшкядсь Гунтерь Пета.
И кудса кеподсь рахсема, кодама уленди аньцек циркса, нльне качамське трнатозевсь.
—Теенть аньцек рахсекшнемс, а тяса хуш авартть,—обжафонь вайгяльса сувозевсь Степа.
—Эрь ина, лувсаськ мзярс утцят,—азозе Хилайсь.—Шобдава ярхцат—мадат. Мзярс удат?
—Ну кда аньцек кафтошка часткя.
—Шить ярхцат—тага удат. Мзярс?
—Ну и тага аф сяда ламос.
—Илять ужнамда меле мзяроса мадондат?
—Ну кафксошка частста.
—Во-о!—кенярдезь фатязе Хилайсь.—Кефкие част удат! Пцтай пяле сутка! Тейть аф удомань пуняда, а сргозьфтиеннеда симондема. Тон сярятькстоть удомань урмаса.
Алятне тага рахазевсть. Тага ашезь шарьхкоде Степань урманц. Теенза хуш аф ламос тага удомс веть, а шить—ся мезень удома? Да нинге ярхцамда меле, пяшксе пект. Аньцек аф цебярь отт няят, а сяда лама мезевок аш. Нятнень мархта сярядемать квалма корхнемска аш месть. Кольсь мялец.
—Сашендыхть да тушендыхть,—мекпяли азозе Хилайсь.—Ато Степанди пинге ни ярхцамс да велямс шобдавас.
Сембе ушедсть варягаснон-мезьснон вешендема, срхкама, и курок кудсь шамсь.
«Эрясасть ва монь кизонень, ёфсикс, шять, аф карматада утцема»,—арьсесь Степа цюгунняста лямонь каямста.

Гитарань балалайка
Филянь Степать мзярда-бди ётонь-ёт ульсь гита-
 рац. Кати балалайкац. Аф шарьхкодьсак: то
 тяфта азсы, то лиякс, то «эх, монь гитаразе!», то «эх, балалайказе!» и сидеста тарфтсыне суронзон пекованза, коса улемальхть струнатненди. Аньцек сурболданза калдордыхть, а вайгяль аш, кода и гитарань-ба- лалайкань.
—А кодамоль гитараце?—кизефнезе кивок рахсемга.—Кота или сисем струнаса?
—Мзяра эрявсь—сняроль. Эряволь—вейхксовок путолень.
—Ся ни эсонза морайсь кочкай, кодама теенза эряви.
—Мон кодамса кельк сязян ай-да-ну!
—А мес мле ашеть моле струннай оркестрав, а сембе эряфцень ётафтыть велеса?
—А коса стама оркестрась? Ошса? А мон ошть шамакеденцка афолине няе, сяшкава аф кельгса!
—Шять, ошсь аф кельгсыне тонь сязентьф-нозонтф щапнень?—стаки кашанфнезь алять.
—Мон инголи аньцек бостоновай щамса якселень, аф тинь лацонт шини калонь куртканяса.
—А мес мле тяни аф рамат гитарань балалайка? Пенсияце, шять, сатоль, морселеть да морселеть,—мрдафнезе Степань кивок сякоти.
—Тяни аш ни стамот, тяни сембе электрическяйхть. Тонгсак сюронц розеткати—эста морай. А моннесь тяфтаконга маряволь сембе перьфпялень велева.
—Мес-бди кивок аф лятфнесы гитарацень?
—Эстонь стирьхне тяни бабат ни, юкстазь. А вдь мзяра кштифнень эздост!..
—Шять, тонць сембонь юкстайть и кодамовок стирь ашеть кштифне?
—Тага кармат сяда тов кичкоряма, щас тонцень кштифття, кочкярятневок модати аф токайхть!
—Вов и корхтак мархтонза!—куфкснесь кизефниец.— Няфтелить хуш гитарацень, ванолеськ, кодамоль.
—Аш сон, аш!—сядонга кяжиякшнесь Степа.—Коськсь! Наксадсь! Срадсь!
—Да мезевок, шять, лядсь эздонза? Лядсть аньцек струнатне, сятка сязендевсть ни!

11.06.2020 №22
 
 
 

 
НОВОСТИ

КАСОМАНЬ И ВИИЯМАНЬ КИГЕ

25.09.2020
 
 
 
 

ТЯЧИ—МИНЬ ШАЧЕМА ШИНЬКЕ!

24.09.2020  № 37
 
 
 
 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин