«МОРОТИ КЕЛЬГОМАСЬ ЁТАСЬ ТЕЙНЕ ТЯДЯЗЕНЬ ЭЗДА»

Асу, пидема-панема машты, национальнаень кельги и ванфты мокшават эряйхть аф аньцек Мордовияса, но и лия региоттнень и субъекттнень эса. Кой-кит эздост шачсть-кассть мокшэрзянь масторса, но уликс туфталхнень сюнеда тусть ёмла родинаста. Пара, што синь аф юкснесазь, ванфтсазь семботь сянь, мезсь сотф мокшетнень щамснон-карямснон, родной кяльснон, койснон-обуцяснон мархта. И республиканьконь эзда ширеса эрямстовок мушендыхть лия землякт, кирдихть мархтост кеме соткст.
Тянь ули кода азомс Самарскяй областень Тольятти ошень эряйть, мокшавать Галина Александровна Сярдовать колга.
Шачсь Галина Александровна Ковылкинскяй райононь Старое Дракино велеса Вельмякиттнень лама идень семьяса. Тядяц, Анна Ивановна, колхозса потьнесь тракст, аляц, Александр Михайлович, трактористоль. Велень труженикне шачфтсть-касфтсть сисем итть—ниле стирьхть и колма цёрат. Галина ёткстост инь оцюсель, сяс, кода маштсь, лезнесь тядянцты и алянцты шабань касфтомаса.
Мокшень стирсь тонафнесь Старое Дракино велень средняй школаса. 8 классть шумордамдонза меле поступась Ковылкинскяй строительнай техникуму, конань шумордазе 1992 кизоня. Тяфта лиссь, што Галинать алянь ширде радняц тердезе Самарскяй областень Тольятти ошу работама. Мокшень стирсь ашезь атказа. Эстокиге мусь васта АвтоВАЗ заводса, кона ноляй легковой автомобильхть.
Мокшавась эряфоньберьф ялга мороть мархта. «Мзярда ёмлатолеме, сембе пуромкшнесть налхксема, а мон ёрань морамс. Тя сяда салсезе мялезень. Улема, мороти и морамати кельгомась ётась тядязень эзда»,—мярьгсь Галина Александровна.
Ковылкинскяй строительнай техникумса тонафнемста Галина примсесь участия художественнай самодеятельностьса, сяс ашезь явонда кельгома тевонц мархта фкявок шис.
Тяфта ульсь и Тольятти ошса, коса сон пуроптсь семья. АвтоВАЗ заводса работамста примсесь участия «Алло, мы ищем таланты» лем ала конкурсса. Эсонза мокшавась примсесь участия оцю мяльса. Мзярда кассть стирец и цёрац, кармась арьсема кода поладомс морамать мархта сотф тевонц. Мольсь прослушиванияс «Родники» рузонь ансамбльти. Но Галина Александровна ёрась морсемс аф аньцек рузонь, но и мокшэрзянь морот. Ладяфтольхть соткст Самарскяй областень Тольятти ошень «Лайме порась» мокшэрзянь творческяй коллективть вятиенц Вера Викторовна Савелькинать мархта. Вов тяфта тячиень героиняньке повсь Тольятти ошень мокшетнень и эрзятнень ёткс. Валонзон коряс, «Лайме порась» ансамбльса сембось мялезонза. Ули кода морамс, концерттнень, пуромкснень пингста няфтемс национальнай щамть мазышинц. Галина Александровнань ули кельгома мороц—«Пиже комля». Сонь пяк лац морсесы Мордовия Республикань Народнай артисткась Н.В.Спиркина.
Мзярда ули пингоц, Галина Александровна сашенды Мордовияв, ёмла родиназонза. Аляц, Александр Михайлович Вельмякин, тяни эряй Ковылкинскяй райононь Изосимовка велеса.
«Мордовияса сяшкава мазыхть васттне, перьфпяльсь, ваймоце кенярди, мзярда лангозост ванат»,—азозе мокшавась.
Г.А.Сярдовась пяк кельгсы мокшавань щамонц, кона ётась теенза эсь тядянц, тядянцты—щаванц, а щаванцты—щаванц тядянц эзда. Сонь Галина Александровна ускозе Ковылкинскяй райононь Старое Дракино велеста. Тяфтама щам тя велень стирьхне щашендсть и тянивок щашендыхть оцю праздникста и свадьбас. Щамса пяк лама мазоптомада, марстонь сталмосна 16-20 килограмма. Инголи лувондовсь, што мазоптоматнень лувкссна няфнесы щамть азоронц и канниенц вастонц ломаттнень ёткса. Корхнесть, што мокшавать васенда кульсак молеманц коряс, а меле ни няйсак. И тя афкукс тяфта. Галина Александровнань мокшавань кунардонь щамсонза пяк лама кунардонь мазоптомада. Ужяль, но ашесть ванфтов кунардонь цюлкатне, кямотне и гетратне. Но сембе сяка щамсь салси мяль мазышинц мархта, сонь эсонза вов ни лама киза ванфтовихть историять пяльксканза. Афи пяльксканза, а эрь анцяй элементоц—сонць башка история. Мокшавать тядяц,  Анна Ивановна, аноклась нилецьке стирензонды мокшавань щапт, мезсь арась теест питнидонга питни казнекс и шачфтыснон колга лятфнембялькс.
Старое Дракино велеса, коса шачсь-кассь Г.А.Сярдова, тянивок свадьбас щашендсазь мокшавань тяфтама щамть. Рузонь ломаттнень ёткса наряжафт улендсть свадьбань омбоце шиня,   а   Ковылкинскяй           райононь тя населённай пунктса разнай кизонь аватне сашендыхть свадьбань васенце шиня мокшавань щамса наряжафокс.
Тольятти ошень Мокшэрзянь культурнай центрань участницась Г.А.Сярдова мокшавань щамонц мархта оцю мяльса примась участия #МойМордовскийКостюм акцияса, конань интернетть вельде мольфтьсы тя центрась.
Галина Александровна Сярдовать моронь «арзясонза» аф кржа мора, кой-конатнень сон кулезень и тонафнезень тядянц эзда. Ужяль, но инь мала ломаненц, лама идень тядянь I степенень Почётнай дипломса казьфть, Анна Ивановна Вельмякинать, эряфоц сязевсь 2018 кизоня автомобильнай аварияса. Ся пингть героиняньке марязе эсь прянц стане, бта пильгалдонза тусь модась-масторсь. Оцю ризфть инкса сон пцтай киза ашезь морсе. Меле ни, цють самок эсезонза, валомне   ушедсь мртцема эряфти.
Тяни мокшавась работай архивариусокс, морси «Лайме порась» коллективса. Ётка пингстонза тонафнесы интернетть вельде английскяй кяльть. Кода азозе сонць, мокшетненди и эрзятненди сон тёждяста тонадови.
Г.А.Сярдовать интернациональнай семьяц. Стирец 2016 кизоня лиссь рьвакс кореецонди, овоц—русскоязычнай кореец. Тяни синь марса оцю мяльса тонафнесазь восточнай, рузонь, мокшэрзянь культуратнень. Цёрац мзярс апак рьвяяк.
Мокшавась кельгсы пидеманц-панеманц. Рецептонзон эзда фкять макссаськ тячи.
Т.АЛЬШИНА.