Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

КАФТА ВЕТЕРАТТ

Илья Васильевичень эряфоц тёждя ашель мзярдовок. И тя шарьхкотьф. Сон шачсь странаньконь инь стака пингстонза. Цёранясь трудендакшнесь козялятнень ширеса. Но, аф ваномок тянь лангс, мушендсь пинге тонафнемативок, аделась колма класст церковно-приходской школаса. Нинге шабакс ушедсь сокама-видема, урядась козялятнень паксяснон эса. А тялонда якась вирень веляфтома.

 

Великай Октябрьскяй Социалистическяй революциясь панчсь оцю ки Илья Сяткинонь инголе. Тиевсть оцю полафткст эряфса. Но од эряфсь нинге эрявсь араламс интервенттнень и контрреволюционерхнень эзда. Тя стака пингть Темниковскяй УВК-сь сявозе И.В.Сяткинонь Якстерь Армияв. Сонь сувафтозь Тамбовскяй строевой полкти. Аф ламос тонафнемда меле прважафоль Саратовскяй губерниянь Балашов ошть малас. Полкть задачац фкяль—аф нолдамс Деникинонь частенц, кона ёрась шоворемс Колчаконь войсканзон мархта. Тевсь аф тёждятнень эздоль. Вачашись и тифсь азорондасть перьфпяльге. Сярятькстсь тифса и Илья Васильевич. Пчксесь госпитальса, а меле прважазь куду. Но аф ламос ащесь кудса, 1920 кизоня тага сявозь Врангелень войсканзон каршес тюрема. Повсь Южнай фронту, конань вятезе М.В.Фрунзе. Мзярда тапазь Врангелень войсканзон, Илья Васильевич кафта кизот васенце морской гаубичнай дивизионть лувксса Равжа моряса кирдсь оборона, штоба врагонь корабльхнень эзда афоль валга десант Одессав. Куду сась 1922 кизоня. Велесовок ламоль прябалада, аф шарьхкодемада. Илья Сяткин аф эстокиге «примазе» колхозть. Но пингонь ётазь сяка сувась «Цятка» колхозу, коса сокась, видесь, строясь. Колхозсь и од эряфсь тонаткшневсть. Но ушедсь Великай Отечественнай войнась. Мокшалять сявозь фашисттнень каршес тюрема 1943 кизоня. Сон сувафтфоль седень строямань отдельнай батальону. Васенце оцю тюремас повсь Ржевть ала. И.В. Сяткин тюрсь фашисттнень каршес войнать аделавомс. Казьф лама боевой орденца и медальса. Куду самдонза меле эстокиге кярьмодсь колхозонь тефненди. Сокась-видесь, строясь картт, кутт. Илья Васильевичень ниле идтензольхть. Оцю цёрац, Никифор Ильич, стане жа ульсь войнаса. Казьф лама боевой казнеса. Васенце рьвац кулось рана, тяда меле сон рьвяясь омбоцеда. Кафта войнань ветеранць эрясь ёмла цёранц, Пётр Ильичень мархта.

 

П.И.Сяткин сембе эряфонц лемдезе Атюрьевскяй районти. Покодема ушедсь пяк рана. Трудендась колхозса. Работакшнесь алянц мархта. Тоса трудендась «Сельхозтехникаса». А мекольдень кизотнень трудендась отделонь вятикс партиянь районнай комитетса, районнай администрацияса. Лац покодеманкса казьф аф фкя казнеса.

 

Рьванц, Екатерина Васильевнань, мархта эряйхть ведьгемоньда лама киза. Касфтсть колма итть. Сембе синь шнама ломатть. Касыхть уноконза и уноконь иденза.

 

Петр Ильичень козя архивоц, коса пяк лама фотографияда, кодама повсь документта, газетада, конат азондыхть Сяткиттнень родснон-плямаснон колга. А сон пяк оцю. И ётксост аш фкявок кальдяв ломань. Но гордостекс сембонди ащи Илья Васильевич, кафта войнань участниксь, трудонь ветеранць.

 

—Сон эрясь кувака и пяк достойнай эряф,—мярьгсь Пётр Ильич.—Ломанць лама няйсь, содась, пяк справедливаель, панжада седиель. Ушедат мархтонза корхтама и аньцек дивандакшнят, сняра сон содась, мярьгат, академия аделась. Коста аньцек кочксезень содамошитнень. Алязе фалу мялямсон. Кда мезевок аф стане тиян, эстокиге лятфтан колганза. Мярьган, а сон тяфта афоль тие, тяфта прянь вятемазень афолезе шна, тянкса сюцелемань, кардалемань.

 

Коса аньцек аф эряйхть  И.В.Сяткинонь раднянза. И синь мархтост кеме соткст кирди Петр Ильич. Сёрмаса, телефонца азонкшнесы, мезень одня тиевсь Атерьса, кода эряйхть тястонь раднясна, кода васьфтезь Великай Победать 75 кизонц. Атерьса эряйхне тага якасть войнаса шавфненди памятникть ваксс митингс. Примасть участия «Бессмертный полк» онлайншествияса, лия мероприятияса. Шраваксса лятфнезь фронтовик радняснон.

 

—Лиякс аш кода,—мярьгсь П.И.Сяткин.—Синь минь родонь кирдиеньке, прянь шнафтома вастоньке. И юкстамс синь—тя атказамс эсь юрхнень, фамилияцень эзда.

 

 

И.ИЛЬИН.

 

 

Снимкаса: кафта ветератт, алят-цёрат Сяткиттне.

 

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022