Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

Л.П.Кирюковонь шачема шиста 125 кизонь топодеманцты

…Шачсь Л.П.Кирюков 1895 кизоня Анаевскяй волостень Пичёвка мокшень велеса (тяни Зубово-Полянскяй районць). Сай пингонь композиторть тядяц, Анна Никитична, ульсь  моронь содай авакс. Сон содась сядот мора, предания, ёфкс. Леонтий оцю мяльса кулхцонкшнезень синь и мяляфнезень.

 

Тядяц кучезе цёранц тонафнема Анаевскяй кафта классонь школав. Мзярда учительсь кизефтезе сонь,  кинне цёранясь, тона отвечась: «Кирюкнень». Тяфта лемнезь Конкиттнень атянь атяснон Киреень. Учительсь тяфтак и сёрмадозе: «Кирюков». И арась сон фамилиякс Леонтий Конкинонди.

 

Л.П.Кирюковонь тядяц васедсь мокшэрзянь учёнайть М.Е.Евсевьевонь мархта, кона аф весть улендсь Анаюса. Евсевьев шарфтсь мяль музыкальнай цёранять лангс, и сонь лезксонц вельде Леонтий поступась Казанскяй инородческяй семинарияв. Тяса основной предметта башка лац ладяфоль музыкать тонафнемац, а скрипкаса морамась ульсь обязательнай дисциплинакс. Семинариянь хорса тонафнихне стане жа морсесть и дирижировандасть.

 

Л.Кирюков тяса васенцеда варжазень виензон композицияса—тяштсь  музыка А.С.Пушкинонь «Бесы» стихотворениянцты.

 

1914 кизоня сон аделазе Казанскяй семинариять и кучфоль работама Саратовскяй губерниянь Чубашева вели. Тяса од учительсь пуроптсь хор, кона морсесь рузонь и мокшэрзянь морот, операста пакшт.

 

Сяльде мрдай Мордовияв. Сонь путсазь народнай образованиянь Анаевскяй волостной отделти заведующайкс. Музыкать тясонга ашезе кадонда, сёрматкшнесь народнай морот.

 

1927 кизоня РСФСР-нь Наркомпроссь кучсы Л.Кирюковонь хоронь руководителькс Москуса мокшэрзянь школань учителень центральнай курсненди. Ся пингть сёрмадсь и тись обработка народнай лама моронди.

 

Васенце трудонц Л.П.Кирюков лемдезе тядянцты—Анна Никитичнанди, конань эзда сёрмадозень моротнень ламоснон. Тя сборниксь курокста рамафоль и арась кельгома книгакс мокшэрзянь музыкальнай работникненди.

 

1928 кизоня Леонтий Петрович поступай Московскяй государственнай консерваторияв. Повсь сон СССР-нь Народнай артистть А.В.Александровонь классозонза, кона ульсь руководителькс Советскяй Армиянь моронь и кштимань Краснознаменнай ансамбльти композиторкс и дирижеркс.

 

И вов консерваториясь аделаф. Кирюков сай Мордовияв. Сон путови Саранскяй музыкально-драматическяй студиять учебнай частенцты заведующайкс. Композиторсь лама работай. 1933 кизоня кочкай этнографическяй хор и сисем кизот ульсь теенза руководителькс. А мзярда Саранскяйса панжевсь музыкальнай училищась, Л.Кирюков тоса кармась улема музыкально-теоретическяй дисциплинань преподавателькс. 25 киза заняфоль педагогическяй тевса. И сяс заслугас коре тяни Саранскяй музыкальнай училищась каннесы сонь лемонц.

 

Леонтий Петровичень фкя-фкянь мельге эвондакшнихть моронза, спектакльхненди музыкац. Сон тяшти «Литова» музыкальнай драма. Общественностсь оцю мяльса васьфтезе тя произведениять.

 

«Литовада» меле композиторсь сёрмады «Несмеян и Ламзурь» и «Нормальня» национальнай операт.

 

Оцю наследства кадсь тейнек композиторсь: моронь 100-да лама обработка хоронди фортепиана мархта, музыка театральнай  и кукольнай спектаклятненди, Мордовиять колга  кантатат, 500-та лама мора и стак тов.

 

Композиторть Л.П.Кирюковонь произведениянза эряйхть, кельговихть, а тя корхтай сянь квалма, што сонцьке эряй ётксонк, кельгови сембонь мархта.

 


26.06.2020 №
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин