Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Здоровье

ТЯ ВИРУССЬ ЧУМАТЬ ЛАЦА…

Кодама полафтксненди организмаса вятни COVID-19-са заразиндавомась и мес эвондакшнихть урмаяфть ваймонь тарксеманц мархта прябалат? Азонды вирусологсь Дарья Ситовская.

 

—Коронавируссь васендакиге токасыне тевлафнень?

 

—Аф фалу. Тевлафне токавихть, кода и гриппть пингста, аньцек стакаста сярядезь. Урмась жа ётни эсь лацонза. Тя инфекциясь од, и врачне нинге аф содасазь, кодама нормась сонь ётамасонза. Ня вирусненди васендакиге удалси тиемс зиян тевлафнень альвеоласнонды. А альвеолатне, кода содаф, отвечайхть организмать кожфса пяшкодеманц инкса. Мзярда альвеолатне пяшкотькшневихть фибрин белокса и таргоземань жидкостьса, тевлафне лотксихть лац работамда.

 

—Лисенди, коронавирусса стака формаса сярядись таргасы ваймонц, но лац-ряц ваймось аф тарксеви?

 

—Версь аф пяшкотькшневи кожфса (кислородса), а тяста лисенди, и лядыкс оргаттне стане жа аф получайхть кислород. А инь пяк эрявксни кислородсь пря уйти. Ломанць юмафнесыне ёжензон, а ваймонь тарксемань аф сатнемась касонды. Тевлафнень оцю пяльксснон токавомаснон пингста—острай респираторнай стака синдромть пингста, эрявксты ни аф тевлавонь искусственнай вентиляциянь аппаратсь, а оксигенациянь экстракорпоральнай метоттне, конат вешихть оцю веронь саттненди сувама.

 

—Мес COVID-19-сь лувф кода инь пяк пелькс микроорганизмакс (карантиннайкс)?

 

—Тя стама жа инфекциясь, кода чумась, холерась, сибирскяй язвась, туляремиясь, натуральнай оспась (лифксне), тюжя лихорадкась. Сяс COVID-19 мархта             пациенттне ащихть специализированнай инфекционнай стационарса. Коронавирусть эзда кулыхнень ловажаснон панчсемасна ётафневи чумать эзда ванфтомань специальнай костюмса, конат сяльде плхневихть. Вастсь аруяфневи хлоркань мархта антисептикса.

 

—Кода няфтихть коронавирусса сярядить тевлавонза.

 

—Синь равжаза-якстерьхть, кожфтомот, шарфтыхть резина лангс. Шумбра тевлафне ляпот и шарфтыхть посудань штамань губкать лангс. Но      заразиндавомась аф эрь случайста вяти куломати. Ламось ащи ломанть кизонзон и иммунитетонц эзда. Ков сяда лама урмадонза пациентть (кепотьксонди, тевлавонь хроническяй обструктивнай урмась, эмфиземась, хроническяй бронхитсь, бронхиальнай астмась), тов сяда пяк токавихть тевлафне.

 

Сидеста тя инфекцияса сярятькстыхнень ёткса осложнениясна эвондакшнихть  пациенттнень, конатнень ульсь миокардонь инфарктсна. А вируссь сяда вихонзафнесы урмать, сяс мес тя инфекциясь оцю стресс организмати.

 

Сявость мяльс

 

эпидемиять пингста

 

*Эпидемиять (и аф аньцек) пингста цебярь упражнениясь тевлафнень вентиляциянкса—уфсемс уфамнят.

 

*Куду самда меле штасть лац-ряц кядентень.

 

*Оргалдость курга потмоть и шалхкть «Аквалор» спрейса и симода пси чайда.

 

*Симондеда, кода можна сяда сидеста, лимон мархта пси или лямбе ведьта.

 


29.06.2020 №
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин