Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Наша усадьба

МЕС САРАСНЕ ТАРКСЕСАЗЬ ТОЛГАСНОН И СИВОНДЬСАЗЬ АЛСНОН

Сидеста уленди, што сараснень эвондакшнихть кальдяв промозсна. Алува азонттама кой-конатнень колга и сянь, кода машфтомс синь.

 

Тарксесазь толгаснон

 

Аф шуроста сашендови приметнемс, кода фкя саразсь тарксесыне омбоцеть нюрьги толганзон, сяда сидеста пулостонза или сялдазстонза. Тяфтама «заботендамась», уленди, пачкотькшни сянди, што саразсь пупстыеви верс.

 

Мезсь шарфты мяль: сарасне шуроста тяряфнихть ворьгодемс пупстыеснон эзда, кода фалу,  синь сетьмоста ащихть фкя вастса. Мес сарасне аф ворьготькшнихть, аф шарьхкотьф, но тя тяфта.

 

Сяда тов пупстыеф саразть лангс ушеткшневи охота. Тарксеф толгатнень вастса эвондакшни галош киське. Киськсь ушеткшни верыяма. Эста сембе сарасне прафнихть лангозонза и цють ни аф сязендьсазь ямбарнять.

 

Кода правила, туфталсь тяфта прянь вятемаснонды кяшф кальдявста кирдемать и аф лац андомать эса. Кепотьксонди, кда кирдема вастса нармоньда уленди вельф лама и теест аф сатнихть минеральнай веществатне, башка кальцийсь и натрийсь. Кда аш атякш и сарасне кржа якайхть-шяяйхть, тявок сидеста вятни фкя-фкянь пупстыемати.

 

Тя прябалать машфтоманкса сарасне эрявихть аннемс эрь-кодама веществаса козя ярхцамбяльда. Стане жа аноклама площадка, коза нармоттне кармайхть лисендема прогулкас. Кда тя аф лезни, сараз лефкскятнень 10 ковонь топодемс керома нярь песна.

 

Сивондьсазь алснон

 

Сарасне сивондьсазь кода эсь, стане и лия сараснень алснон. Туфталхне тянди:

 

*ярхцамбяльть эса аф сатнихть кальцийсь, фосфорсь, железась и D витаминць;

 

*нармоттне фалу ащекшнихть кирдема вастсост, аф нолявихть якама-шяяма;

 

*саразсь фалу кирни стресс: ваксозонза нолявихть лия нармотть и животнайхть, сидеста  полафневи ярхцамбялец и стак тов;

 

*саразсь сиредсь (сире нармоттне сидеста улендихть сяда кяжихть оттнень коряс).

 

Штоба сарасне афолезь сивонде алснон, синь сяда сидеста нолямат якама. Пизозост атцема шужярь или лия мезевок ляпе, эсь пингстонза кочксемат алхне. Аф эряви кадондомс саразонь кирдема вастса колаф и лазф алхнень: уленди, колаф алть варжамда меле и эвондакшни пупстыемань кальдяв промозсь.

 


29.06.2020 №
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин