Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

СОН МАТСЬ ТОЛ ЧЕРНОБЫЛЬСКЯЙ АТОМНАЙ СТАНЦИЯНЬ РЕАКТОРХНЕНЬ ЭСА

Великай Победать 75 кизостонза минь сяда лама азонттама-пачфнетяма народоньконь оцюдонга оцю подвигонц, фашистскяй захватчикнень каршес героическяйста тюреманц и сяськоманц колга. Тя темась сяда товга кармай тейнек фкя инь главнайкс, сяс мес лац содасаськ, кодама питнеса сатф тя Победась, мзяра ломанень эряф максф тянкса. Но аф юкснема и ся геройхнень колга, конат тисть оцю подвиг, няфтсть аф пелема мирнай пингть, тячиень эряфса. Фкясь синь эздост—Советскяй Союзонь Геройсь, генерал-полковниксь,  мокшалясь Н.Т.Антошкин.

 

 

1986 кизонь апрель ковста Чернобыльскяй АЭС-са лисьф авариять пингста Николай Тимофеевич мельганза кемокстаф авиагруппать мархта матсь тол атомнай станциянь реакторхнень эса. Задачась пяк стакаль, вдь тяфтама зиян мархта эстонь оцю странаньке нинге ашезь васьфне, эрявсть примамс сяда курокстонь, решительнай мерат. Тяфта и тифоль, лац арьсеф планть, авариянь машфтыхнень сембе виень путомаснон и эсь прянь аф ужяльдемаснон вельде, нюрьхкяня пингста зиянць ламода потась, реакторста лиси толсь, радиациясь лоткафтфоль. Н.Т.Антошкин тянкса казьфоль инь оцю Государственнай казнеса—теенза максфоль Советскяй Союзонь Героень лем.

 

Николай Тимофеевичень содаса 1998 кизоста сявомок. Васенце васедеманьке ульсь шачема Башкортостанонь Кузьминовка велеса, коза минь арнеме творческяй командировкас. Эста мокшень велеса ульсь оцю праздник—панжевсь од школа, конань строямаса оцю путксоц ульсь Советскяй Союзонь Геройть Н.Т.Антошкинонь. Аф стак школась васенце шистокиге кармась каннемонза Геройть лемонц, музейса кочкаф документтне, фотографиятне азондыхть сонь биографиянц, эряфонь кинц колга. Минь няеськ ся кудть, коса шачсь-кассь Николай Антошкин, ётаме ся ульцява, киге, куване сон якась школав тонафнема, спортонь площадкав, велень Культурань куду. Кода и велеряенза, миньге маряме гордость эсь ломаненьконь инкса, мяленьколь содамс колганза сяда лама, корхнемс мархтонза. Сяда меле ульсть нинге васедемат Николай Тимофеевичень мархта, тя и мокшэрзянь народть оцю пуромксонзон, ширесонк ётафтф лия илатнень эса, коса, шарьхкотьф, Н.Т.Антошкин ульсь почётнай инжикс. Сон мзярдонга ашезе визне эсь родной кяленц, меколанкт, кода маштсь лездсь и лезни сонь вельмофтеманксонза, тиендьсы семботь, штоба тядянь-алянь кяльса корхтамась кайголь лама вастова.

 

Н.Т.Антошкинонь колга сидеста можна лувомс статьят, очеркт, интервьют центральнай изданиятнень эса, кулемс сонь азондоманзон радиоса и телевиденияса. Аф кунара миньге гайфнеме Геройти и эняльдеме сяда лама азондомс ся оцю авариять колга, кона ульсь пцтай колмогемонь ветие кизода инголе.

 

—Пингта ётась ни аф кржа, но сембе сяка лятфнемс тянь колга аф тёждя,—ушедозе корхтаманц Советскяй Союзонь Геройсь, запасса генерал-полковниксь Н.Т.Антошкин.—ЧАЭС-са авариясь—тя комозце веконь инь пелькс и стака техногеннай катастрофась. Тя тевсь, мярьголень, войнаса тюремада пелькс. Войнаса хуш тон няйсак противникть и содасак сонь, а тяса врагсь аф няеви и тянь эзда нинге сядонга касонды пелькссь. Кда минь афолеськ «панда» реакторть эсь пингстонза, потмосонза графитсь палоль пцтай колма кофт и эста ни радиациясь срадоль сембе мирть келес, фатялезе марнек масторть. И, кода корхтайхть учёнайхне, эста тя вастста ломаттнень эрявольхть прважсемс эряма 800-850 вайгяльбень вастс. А мзяроксть касоль онкологиянь урмаса сярядихнень лувкссна?! Пелькс арьсемска.

 

—А кодама пингста тинь машфтость толть, перясть кить радиацияти?

 

—Марнек тянди тусь кемонь шит,—сяда тов азонды Николай Тимофеевич.—Но тянь мархта «операциясь» ашезь аделав. Монь группазе нинге комозьшкаксть лиендсь заданияс ся зонав, няеськ вярде и модать лангста кодама тоса обстановкась, кодама мерат примамат сяда тов. Ся шитнень минь тиеме ниле тёжяньда лама лийкстама реакторть вельф. Эрявсь кочкамс виде маршрутт, арьсемс методикат кода ёрямс грузть реакторти, вдь самолеттне, вертолёттне ся вастти лийкснесть фкя-фкянь мельге, аф оцю дистанция мархта. Эрь экипажти сашендовсь тиендемс 15 лийкстама шити, а кой-конат тиендсть комозьда лама. Кода и войнань кизотнень, лётчикне аф пелезь мольсть «бойс», машфтсть зиянть эса. Авиацияса лама киза служамста  тяфтама энтузиазма и старандама мон нинге ашень няенде.

 

—Кода марязь ломаттне эсь пряснон ся пингть шумбрашинь ширде, кодама мерат примсевсть, штоба васенце шитнень лездомс теест?

 

—Сятнень, кит покодсть алува, кашкомсь вайгяльсна, синь связкасна лафчемсть. Сембонди      макссеме йода мархта таблеткат.  Монцьке тяфта «пчкафнень» пря, эста кургса коськоль, ульсь бта кшнинь таньф. Тяфтама ситуацияса минь, лётчикне, работаме 200 метрань сереса, мзярда реакторть вельхксса температурась пачкотькшнесь 200 градусти. Минь арьсеме, што тя сереса, коса минь лиендеме, излучениясь ульсь 1-1,5 тёжянь рентген, афкукс жа тоса ульсь кафксть сяда лама. Штоба араламс ломаттнень и сембе армейскяй авиациять, сашендовсь эрь шиня нолямс тевс мезень-бди одня. Кда васенце шитнень реакторть лангс шуварть-мезть  ёрялезь ломаттне кядьса, аф лама пингонь ётазь, тянь тиендеськ парашюттнень вельде, конатнень кемокснеськ вертолёттнень подвесной системаснонды. Шуварть, свинцовай болванкатнень, кода бомбань, ёряськ реакторть лангс. Марнек ёрдафоль вете тёжяньда лама тонна эрь-кодама груз.

 

—Мзярошка пинге эста  макссевсь удомати-ваймамати и сашендовсь ли тянь тиендемс?

 

—Васень пингть пцтай ёфсикс ашень утце. Тяфта ульсь нилешка ши, аньцек сяльде колма-ниле част ваймосень. Прязе шарсь, ярхцамс ашезь моле. Фкя пингть арьсезевонь, а кда мезевок аф стане тиян, нолдан эльбятькс, эста монць прязень аф простяса. Чернобыльса нльне аф оцю эльбятьксське вятель стака прябалатненди. Вдь фронтонь кодамовок военнай операцияса фкя вайгяльбень вастса ашель тняра ломань и техника, кода ульсь тяса фкя точкаса. Минь пелендеме и пяк старандаме, штоба омбоце реакторсь афоль сязев, эста зиянць касоль ламонь-крда. Павазонди, сембось арась эсь вастозонза, минь тя «тюремаса» лисеме сяськикс.

 

—Да, Чернобыльть перьфпяльге шарондсь аф няеви куломась. Ответственностсь, Николай Тимофеевич лангозонт прашендсь аф азовомшка оцю. Мярьгода тячи нинге весть азомс теенть оцюдонга оцю спасиба ся подвигть инкса, конань тиесть Чернобылень модать лангса странаньконди, сембонди тейнек. Тияк пароль содамс, кода тяда меле поладовсь судьбаце, мезе тиендеть?

 

—Азса нюрьхкяняста, служань кельгома Родиназти, эсь народоньконди. Мон примсень участия военнай лама конфликтса—Афганистанца, Абхазияса, Таджикистанца, Севернай Кавказса и лия «пси» точкатнень эса. Можна мярьгомс, тячиень шис мон стройсан, хуш и кафта кизода меле тейне топоди 80 киза.

 

—Периодическяй лама изданияса сёрматкшневсь сянь колга, што тон эсь военнай опытцень мяль вельде азондсак-пачфнесак Сирияв миронь ванфтома серьгятьф авиагруппати, од лётчикненди. Афкукс тяфта?

 

—Информациясь виде. Фкя пингть монь серьгядемань Россиянь оборонань министрсь С.К.Шойгу и мярьгсь: «Эряви лезксце, генерал. Ванды марса лийкстатама Сирияв, тоса учихть эсот тонь ингольдень марса служайхне. Корхтаманьконь поладсаськ самолётса…».

 

Ся пингста, мзярда минь лётчиконьке вятихть Сирияса военнай операцият, тейне тоса савсь улемс кемоньда ламоксть. Мон тоса ётафтонь ведьгемоньшка занятия лётчикнень, зенитчикнень, блокпостса и заставаса ащи солдаттнень мархта. Азондыне теест эсь опытозень, тонафтонь эсост кода вятемс пряснон тя или тона ситуацияса, кода маштозь пяшкотькшнемс инголест путф задачать. Мон азонь предложеният кода сяда лац ванфтомс аэродропнень, лия военнай объекттнень.

 

—Тон, Николай   Тимофеевич, вятеть и тячемс вятят оцю общественнай работа, улеть Российскяй Федерациянь VI и VII созывонь Государственнай Думань депутатокс. Мезе азолеть Конституцияти сувафтф полафткснень  квалма?

 

—Сембе полафткснень мон шнасайне. Тя—минь вандыень шиньке, вии экономиканьке, нароттнень ёткса ялгаксшинь кемокстамась, сяда цебярь эряфсь! Сяс оцю мяльса максыне вайгялезень полафткснень инкса и надиян, сембось мезе арьсеф сай пингти, пяшкодеви!

 

—Спасиба, Николай Тимофеевич, корхнеманкса. Шумбраши тейть и лама кизонь эряф.

 

—Спасиба цебярь валонкса. Газетантень вельде арьсян Мордовиянь сембе эряйхненди тяфта жа шумбраши, паваз и сембоса сатфкст!

 

Н.ЛОБАНОВ.

 

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022