Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

Сергей ФУДИН: «АФ ЛОТКСЯН ДИВАНДАКШНЕМДА, КОНАШКАВА КОЗЯ КУЛЬТУРАНЬКЕ, МАЗЫ КЯЛЕНЬКЕ И СМУЗЮФТ МОРОНЬКЕ»

—Сергей, азонтт аф ламня эсь колгат.

 

—Хуш  шачень Саранскяйса, но маряса прязень велень ломанькс. Сяс мес марнек идькс пингозе ётась Инсарскяй райононь Лфна велеса. Тоса эрясть щавазень мархта щятязе, Евгения Васильевна и Павел Иванович Нуянзиттне. Сембе каникулатнень, ваймама шитнень ётафнине сиренятнень пяле. Тоса содафтонь мокшэрзянь культурать мархта,  тонадонь мокшекс корхтама, эрзякс шарьхкодема. Щятязе эрзяль, Большеберезниковскяй райононь Дегилёвка велеста. Синь щавазень мархта корхнесть эсь ётковаст марстонь мокшэрзянь кяльса. И тянь вельде тейне удалась тонадомс кафцьке кяльхнень. Родной кялень содамась пяк эряви и лезды монь артистонь работасон.

 

—Сергей, азонтк, пожалуйста, мзярда шачсь эсот музыкати кельгомась, артистонь тевти венемомась?

 

—Нинге ёмланяста кельгине илатнень пингста оцю ломаттнень мархта ряцок кштимазень, сиде моронянь морамазень. Тядязе-алязе эста ни шарьхкодезь асушизень и максомазь музыкальнай школав. Но нотань тонафнемась марявсь тейне мялень мольфтикс. Да и домра инструментсь, конань коряс тонафнень морама, ашезь тушенда мялезон. Но сякокс музыкальнай школать аделайне, сянкса спасиба тядязти, сон коль корхнесь эсон, касфнезе мялезень, кле, сембось, мезти тонадат, эрявксты эряфса. Тядязе, кода ведьс ванць, музыкась арась тейне профессиякс. Хуш и школаса тонафнемстон мялезель сотомс сай пингонь профессиязень велень хозяйствать мархта. Видекс арьсекшнень тумс тонафнема Аграрнай институту. Но кемонце класса кода-бди повонь музыкальнай школаса кочксеви од ломанень ансамблень репетицияс. Монь тяшкава тусь мялезон марстонь вийса музыкань тиемась, да нинге цебярь тонафтыень кядь видеса. Руководителеньке ульсь С.А.Мякушин—пяк асу и пара вайме ломань, кона маштсь оттнень мархта работама. Вов эста музыкась салазе мялезень афкукс. Мон оду ашень лятфне аграрниконь профессиять колга  и тунь тонафнема Национальнай культурань институту. Васенце курсса тонафнемстон вокалть коряс преподавателезе Е.О.Модина тердемань «Гайги моро» институтскяй коллективти морсема, а меле—«Мерема» фольклорнай ансамбльть составс.

 

—Азонтт         лувиеньконди         артистонь тевть колга. Мезсь инь мялень салайсь?

 

—Артистть эряфоц ётни пяк мялень салайста. Тя, васендакиге, гастрольхне, лия ошса, масторса улематне, од ломанень мархта васедематне, лия народонь культурань мархта содафтомась и лама мезе лия. Пяк павазуван, мес повонь «Мерема» фольклорнай ансамбльть составс. Сяс мес лия культурань содафтомда башка, мон пяк лама одня сотцян эсь культураньконь колга. Аф лотксян дивандакшнемда, конашкава козя валдса цифторды мокшэрзянь культураньке, мазы кяленьке и крхка смузь мархта мороньке.

 

Мон пара мяльса примсян участия фольклорнай экспедициятнень эса. Минь кочксетяма мокшень и эрзянь велетнень ланга кунардонь пингонь морот, койхть-обуцят. Кодак ушедыхть сире бабанятне морама,   монь ронгован бта панжапт туйхть якама, сельмоведень тумс токсеви седиезе. Дивас прашендан, кода стане, репетицияфтома, музыкальнай грамотань аф содазь, можна тяфта лац, лама вайгяльса морамс. Конашкава мазыхть, эсь лацоннет минь мороньке! Вов сон эрек культурась, бабаньконь-атяньконь ваймосна. И семботь тянь эряви обязательна ванфтомс поколенияста поколенияс, няфнемс лия нароттненди.

 

Пара мялезон, мзярда народозень моронза тушендыхть мяльс лия национальностень ломаттненди. Содалесте, конашкава лямбоста васьфнесазь мокшэрзянь фольклорнай коллектифнень сембе вастова, а инь пяк—лия масторхнень эса. Кода седи ваксста кулхцонкшнесазь минь мороньконь, дивандакшнихть мазы щамоньконди. И тя нинге сяда пяк касфтсы эсон народозти кельгомать, козя культураньконь инкса гордостень марямать.

 

—Кода содаф, пингсь содай молеманц и валом-валом юксневи, юмси эряфстонк ётай пингоннесь. Кода арьсят, фольклорнай музыкать ули сай пингоц?

 

—Фольклорнай музыкать кулхцондомац—тя кода кунардонь пинкнень эзга якама-шяяма. Сон сембе ширде эсь лацонне. И ламонцнень тя салсесыне мяльснон. Сяс, монь койсон, фалу кармайхть улема фольклоронь кельгихть и ванфтыхть. А мес эздонк аф лама? А сяс, мес кой-кит ёткстонк нинге ашезь шарьхкоде педа-пес народнай моротнень таньфснон. Кепотьксонди, мокшень ломанць может кулхцондомс эрь- кодама музыка, но аньцек гармониянь вайгяльть и родной кяльса мороть ули виец седи куцюняс токамс, таколфтомс сонь, сяс мес тя эряй версонза, ваймосонза.

 

—Сюкпря корхнеманкса!

 

Т.Петрова.

 


10.07.2020 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин