Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

СИНЬ СЕМЬЯСОСТ УЛИ БИБЛИОТЕКАРЕНЬ ЭСЬ ЛАЦОНЬ ДИНАСТИЯ

Шачсь-кассь Светлана Фёдоровна Сире Теризморгаса. Аляц, Фёдор Иванович Кадеров, лама киза работась учителькс тя велень школаса. Кие стамсь героиняньконь тядяц—Российскяй Федерациянь культурань Заслуженнай работниксь, Славань орденонь кавалерсь, почётнай и оцю лама лия лемонь сатысь и каннись Нина Михайловна Кадерова, арьсян, морафтыхненди азондомс аф эряви, сяс мес эрсь тянь лац содасы.

 

Кадерофне касфтозь стирьснон трудонь кельги, национальнаень ванфты ломанькс. Школать шумордамдонза меле Светлана Саранскяйса шумордазе Культурань и искусствань колледжть, получась библиотекарень специальность и вов ни лама киза работай велень         библиотекаса.

 

Светлана Фёдоровнань валонзон коряс, синь семьясост ули библиотекарень эсь лацонь династия. Сонць мокшавась—колмоце поколенияса библиотекарь. Тяда инголе тя тевса заняфоль Светлана Фёдоровнань бабац, Мария Николаевна Кадерова, конань меле полафтозе сонь тядяц, Нина Михайловна Кадерова. Колма ня мокшаватнень библиотекарень марстонь стажсна 64 киза. И тя, мярьголень, аф кржа. Ули кода азомс, што Светлана Фёдоровнанди тя профессиясь ётась «наследствас» коре. Книгатненди кельгомась, синь морафнемасна, инксост сайхненди макссемасна—сембось тя кунара сувась Кадерофнень-Пивкиттнень эряфс.

 

Ашезь ту Светлана Фёдоровна шири, колледжть шумордамдонза меле мрдась ёмла родиназонза, поладозе библиотекарень тевть и вестевок ашезь каенда, што тись тяфта. Эсь велесост васьфтезе павазонц—лиссь рьвакс мокшень асу цёрати, гармонистти Виктор Иванович Пивкинонди. Тяни сон—Мордовия Республикань культурань Заслуженнай работник, аккомпаниатор Сире Теризморгань Национальнай культурань центраса.

 

Пивкиттнень колма стирьсна. Фкять эздост М.В.Пивкинать лемоц стане жа лац содаф морафтыхненди. Мария Викторовна лама киза ни морси Г.И.Сураевонь-Королёвонь лемса «Келу» фольклорнай ансамбльса. Мороти, морамати, минценнети—мокшеннети кельгомась ётась теенза кода щаванц, Нина Михайловна Кадеровать, стане и алянц, Виктор Иванович Пивкинонь эзда. Од морсить Мария Викторовна Пивкинать колга аф весть пачфнеме «Мокшень правдаса», Сире Теризморгань мокшень стирсь примсесь участия газетасонк инь мазы и удалаф стирьхненди лемтьф конкурсса.

 

Светлана Фёдоровна и Виктор Иванович Пивкиттнень нинге кафта стирьсна Евгения и Елена сотозь эряфснон медицинать мархта. Фкясь эряй Москуса, омбоцесь—Саранскяйса.

 

Лама киза работай мокшавась библиотекарькс. И тиендьсы тевонц кельгозь, малаткшни теенза оцю ответственностень марязь. Тя, кле, аф аньцек морафтыхнень мархта работамась: сась ломанць, кизефтсь или вешсь мяльс туф книга и тусь. Тиема семботь, штоба сонь эвондаль мялец сяда курок тяза самс нинге. Тянкса маштома эрь морафтыть мархта марстонь кялень вешема, содама, кодама книгатненди ломанць ускови сяда пяк. «Кодама книгат сембода сидеста сявондихть ломаттне морафтомс?»—тя кизефксть лангс Светлана Фёдоровна отвечась вов кода. Эрь ломанть, кле, сонцень интересонза. Кие-бди пяк кельгсы детективть, поэзиять. Омбоцеть, ванат, мялец морафтомс мезевок рузонь писательхнень тяштьфснон эзда. А колмоцесь ёрай сявомс куду минцень, мокшэрзянь, автороньконь произведенияснон. И эрти сафтома, прважама сонь кепотьф мяльса.

 

Сире Теризморгань Национальнай культурань центрась, тяконь лувксса и библиотекась (синь фкя зданиясот) сувафтф экскурсионнай башка маршрутс. Сяс мокшень тя вели фалу сашенды пяк лама инжи. Ужяль, тядде коронавируснай од инфекциять сюнеда синь ашет, но тя аф корхтай сянь колга, што библиотекаса эряфсь лоткась. Тяса фалу работайхть районть, велеть содаф ломанензонды, гордостень маряма вастонзонды лемтьф уженятне, выставкатне. Светлана Фёдоровна фалу козякофнесыне синь од книгаса, лия материалса. Тяда башка, тяса ули кода содафтомс велеть, школать историяснон мархта.

 

Библиотекаса башка васта занцихть и оцю питнишикс лувовихть колма Президенттнень книгасна и сувенирсна. Сембе минь мяляфтсаськ, што 2007 кизонь 19 июльста тяса ульсть Россиянь Президентсь В.В.Путин, Финляндиянь Президентсь Тарья Халонен и Венгриянь Премьер-министрсь Ференц Дюрчань. В.В.Путин      библиотекати казсь «Большая книга России», Т.Халонен—«Сто замечательных финнов», а Ф.Дюрчань—венгерскяй кяльса книга. Экскурсиятнень пингста инжихне оцю мяльса ванондсазь синь.

 

Вов ни лама киза библиотекарсь вяти «Книжкина больница» кружок, коза книгатнень пчкафнема оцю мяльса сашендыхть иттне. Но, кда эвондай оцюфнень мяльсна, кенкшне панжадот теестка.

 

Мокшавась эрь кизоня уленди Саранскяйса «Шумбрат, Мордовия!» Народнай творчествань республиканскяй фестивалень выставкатнень эса. Оцю мяльса аноклакшни няфтемс сюреса сёрматф нардамат, кодаф салфеткат.

 

Лама киза цебярьста работаманкса С.Ф.Пивкина казьф Мордовия Республикань Государственнай Собраниять Почётнай грамотанц мархта.

 

Кудъёткса мокшавась цебярь азорава. Мирденц мархта кирдихть жуватат, касфтыхть-путнихть перень сёрот. Кельгсы пидеманц-панеманц. Шра лангсонза фалу улендихть мокшень пачат, танцти лия ярхцамбяльхть.

 

Мекольдень кофнень ламоц мероприятиятне, выставкатне ётафневихть и няфневихть интернетть вельде. Кда сувамс Светлана Фёдоровнань личнай страницазонза (социальнай сетьса), то няйсаськ, што сон примась участия Победать 75 кизонь топодеманцты, Тройцяти, Библиотекатнень Общероссийскяй шиснонды лемтьф и лия пуромкснень эса.

 

Библиотекаса аноклась Победати лемтьф мялень салай козя выставка. Эсонза пачфневи, што Сире Теризморгаста фронту тусь 580 ломань. Эздост 300-сь шавовсть войнаса Родинать араламста. «Мы помним вас, герои-земляки» выставкась кармай работама сяда тов.

 

Мокшавась надияй и кемай, што марстонь вийса сяськсаськ коронавирусть и Сире Теризморгань велень библиотекась сядовок кемокстасыне уликс соткснень морафтыхнень мархта. Светлана Фёдоровнань лама пландонза, мяльдонза-арьсемадонза, конатнень сон надияй ётафтомс эряфс!

 

Т.АЛЬШИНА.

 


10.07.2020 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин