Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мордовия Республикань культурань, национальнай политикань и архивнай тевонь министрсь С.Н.БАУЛИНА: «СЕМБОСЬ ТИЕНДЕВИ КУЛЬТУРАТЬ ОД СЕРЕС ЛИХТЕМАНКСА!»

—Светлана Никитовна, кода работайхть пандемиять пингста Мордовия Республикань культурань учреждениятне?

 

—Нинге тяддень 25 мартста, мзярда минь васьфтеськ эсь профессиональнай иланьконь—Культурань работниконь шить, коронавируснай пандемиясь ушедсь каннема тейнек прябалат. Инксонза торжественнай мероприятиять, кона лемтьфоль илати, тейнек васенцеда республикань культурать историяса савсь ётафтомс онлайн-форматса. А Театрань Международнай шить ёфси савсь шашфтомс лия пингс, сяс мес лиссь культурань учреждениятнень пандемиять пингста работаснон лоткафтомаснон квалма республикань Оцюнять В.Д.Волковонь Указоц. Но эстовок нинге ульсь надияма, што тя урмась пялонк сась аф ламос.

 

Аньцек эряфсь няфтезе: минь сембе эльбятькшнеме. Тяни тусь нилеце ковсь ни, кода республикань культурань учреждениятне работайхть пандемиянь условияса. Сяс сембе оцю и ёмла мероприятиятне ломаттненди ушедсть пачфневома онлайн-форматса. Сатомшка курокста Мордовиянь культурань учреждениятненди удалась ладямс эсь работаснон цифровой средаса «Культура» национальнай и «Цифровая культура» и региональнай лия проекттнень эсь пингстост эряфс ётафтомаснон вельде.

 

Лиякс мярьгомс, республикань культурань эрь учреждениять тячи ули стама оборудованияц, конань мархта интернетть вельде вятевихть онлайн-трансляцият эрь мероприятияста, социальнай сетьса эрь учреждениять ули сонцень страницац, а инь удалаф мероприятиясна лихневихть «РФ-нь Культура» порталс. Шарьхкотьф, тя порталса Мордовиянь культурать инь няевикс сатфксонзон ванцазь аф аньцек Россиянь, но и омба масторонь зрительхне. Сяс «Культура» национальнай проектть, кона миньцонк кармай ётафневома эряфс 2024 кизоть самс, ярмаконзон лангс минь карматама сяда тов виияфнема республикань культурань учреждениятнень цифровой средань оборудованияса.

 

Тяса нинге эряви азомс, пандемиять пингста ламотне культурань работникнень эзда сатомшка курокста шарьхкодезь онлайн-форматть вии ширензон. Сяс нинге апрель ковть ушетксста региональнай интернет-порталсонк «Культпросвет-онлайн» лем ала минь панжеме-тиеме культурань мероприятиянь афиша. Тоса азфт аф аньцек мероприятиятне, но и шись и пингсь, мзярда синь етафтовихть онлайн-форматса. Сяс ломаттненди ламода сяда тёждяль мумс-ваномс онлайн-форматса мероприятиятнень, конат лемтьфтольхть, мярьктяма, Победань шити, Россиянь шити и странать эряфса сембе лия няевикс событиятненди.

 

Кода няфнесазь мониторинкнень итогсна, онлайн-форматонь работаснон вельде республикань культурань учреждениятненди удалась няевиста касфтомс ломанень лувксть, конатненди макссевихть услугат. Мярьктяма, А.С.Пушкинонь лемса Мордовиянь Национальнай библиотекаса онлайн-форматть и интернетонь лия ресурснень вельде эрь недяляня макссевихть услугат 210000 ломаненди. И.Д.Воронинонь лемса Республиканскяй краеведческяй марстонь и С.Д.Эрьзянь лемса Изобразительнай искусствань музейхне эрь недяляня макссихть услугат 70000 лама ломаненди. Ня учреждениятнень эзда аф пяк лядондыхть республикань лия библиотекатне, музейхне, театрально-концертнай организациятне. И ня, и лия сатфкснень инкса минь марятама афкуксонь гордость!

 

Сяс тейне тячи ули кода азомс, «Культура» национальнай, «Цифровая культура» и региональнай лия проекттне, конат миньцонк ушедсть ётафневома эряфс 2019 кизонь январьста, пандемиять пингста эсь ресурсснон вельде макссть Мордовиянь культурань учреждениятненди оцюдонга оцю лезкс. И цифровой культурань ресурснень вельде республикань культурань учреждениятне кармайхть келиста макссема ломаттненди услугат эстовок, мзярда мрдайхть ся рабочай режимти, кодамса покодсть пандемияда инголе.

 

—И кода, койсот, Светлана Никитовна, республикань культурань учреждениятне кармайхть мртцема рабочай ся режимти, кодамса покодсть пандемияда инголе?

 

—Мзярда аф мзярда, но пандемиясь миньцонк аделави. И минь шарьхкодьсаськ тянь и, мярьголень, аноктама тянди.

 

Конешна, мзярда валхтовихть ограничениятне и республикань культурань учреждениятне меки ушедыхть работама стама режимса, кодамса покодсть пандемияда инголе, пря ванфтомань кой-кона мератне услугань максомста сяка кармайхть нолявома тевс. Тянь коряс культурань эрь учрежденияса аноклаф ни эрявикс рабочай план.

 

Койсон, республикань культурань учреждениятнень эзда васенцекс ломаттненди панчсазь эсь кенкшснон библиотекатне и музейхне. Мельгаст—театрально-концертнай и культурань сембе лия учреждениятне. И сембе синь кармайхть макссема ломаттненди услугат, нолямок тевс эсь спецификаснон коряс прянь ванфтомань норматнень.

 

—Кодама тефт ёрайхть тиемс республикань культурань учреждениятне Населениянь Всероссийскяй переписти анокламань рамкаса?

 

—Кода содаф, Населениянь Всероссийскяй переписсь странаса арьсеви ётафтомс тяддень октябрьста. Сяс нинге тя кизоть ушетксста минь тиеме «Мордовия Республикань культурань шит» лем ала проект, кона арьсевсь Всероссийскяй переписьта инголе келиста ётафтомс Российскяй Федерациянь эрь субъектса, коса компактнайста эряйхть мокшет и эрзят.

 

Тяфта жа келиста Всероссийскяй переписьта инголе арьсевсь нолдамс тевс Мордовияса и Россиянь лия региоттнень эса республикань аф коммерческяй организациятнень потенциалснон.

 

Ужяленди, но пандемиять инкса тя работать мзярошка пингс тейнек савсь лоткафтомс. Аньцек мон надиян: Всероссийскяй переписень пингть самс тейнек удалай ётафтомс эрявикс работа республикаса и лия региоттнень эса эряй мокшэрзятнень мархта. Цельсь содаф: Всероссийскяй переписьта инголе кеподемс мокшетнень и эрзятнень национальнай самосознанияснон фкя-марстонь национальнай самосознаниянь серес!

 

—Ёфси аф кунара Россиянь лама национальностень народсь пцтай фкя мяльса кемокстазень Российскяй Федерациянь Конституцияти полафткснень. Шарьхкотьф, эздонк эрсь вайгяленц максомста, васенцекс, кирдезень мяльса ся полафткснень, конат лиятнень ёткста теенза ульсть инь питнихть.

 

—Шарьхкодень. Конституцияти полафтксонь сувафтомать инкса вайгялезень максомста мон кирдине мяльса эздост сятнень, конатнень эса корхтамась моли россиянь лама национальностень народть культуранц ванфтоманц и виияфтоманц квалма. Койсон, пяк пара, мзярда Россиять Основной Законцонза, Конституцияса, тяни ули башка статья, кона кошардсы государстваньконь ванфтомс и виияфнемс Россиянь народнай и профессиональнай культурать.

 

Лиякс мярьгомс, Россиянь лама сферань и серень культурась странасонк Конституциять вешфксонзон коряс арась васенце вастс. И тянкса тячи мон марян оцюдонга оцю гордость!

 

—Светлана Никитовна, кода тяни, койсот, республикаса кармайхть ётафневома эряфс государственнай национальнай политикань Стратегиять вешфксонза?

 

—Кода содаф, Стратегиять вешфксонза странасонк кармайхть ётафневома эряфс 2025 кизоть самс. Инь оцюфне эздост—тя Российскяй Федерациянь лама национальностень народть марстоньшинц и общероссийскяй гражданскяй идентичностенц кемокстамасна, странаса фкя-марстонь культурнай пространствань тиемась, межнациональнай и межрелигиознай сфераса конфликтнай ситуациянь аф нолдамась.

 

Стратегиять ня и лия вешфксонзон пяшкодеманкса Мордовияса, кода и тяда инголе, нолявихть тевс «Акша келу», «Велень озкс», «Сабантуй» республикань государственнай национальнай илатне, а тяфта жа «Волгась—ялгаксшинь ляй» этнокультурнай экспедициясь, Славянскяй письменностень и культурань Шись, Отечествань Аралаень шись, Победань шись, Россиянь шись, Народонь Единствань шись и странань государственнай лия праздникнень духовнай потенциалсна.

 

Республикань культурань учрежденияда башка, нароттнень ёткса межнациональнай и межрелигиознай соткснень виияфтоманкса и кемокстаманкса тяфта жа путнихть няевикс путкс Мордовиянь общественнай организациятне, газетатне, журналхне, телевидениясь, «Мордовия Республикань культурань порталсь» и республикань лия интернет-площадкатне.

 

Тяддень сёксень кофнень  республикань межнациональнай и межрелигиознай сферань кизефкснень коряс арьсетяма ётафтомс научно-практическяй конференция. Пингстонза минь ванцаськ, мезе ульсь тиф ся пингс республикаса межнациональнай и межрелигиознай соткснень кемокстаманкса, и кинди, кода и мезе маштозь эряви тиемс тя сфераса.

 

—Кода кармай сяда тов ётафневома эряфс «Культура» национальнай проектсь?

 

—«Культура» национальнай проектсь и сонь «Культурная среда», «Творческие люди», «Цифровая культура» региональнай пяльксонза миньцонк кармайхть ётафневома эряфс 2024 кизоть самс. Тянь вельде сяда тов кармайхть петневома и одкстопневома культурань учреждениянь зданиятне, рамсевома теест од оборудования, тиендевома виртуальнай концертнай залхт, кепсевома сотрудникнень квалификациясна.

 

Лиякс мярьгомс, тиеви сембось ломаттненди культурань тяниень пингонь услугань максоманкса!

 

В.НЕСТЕРОВ.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022