ИНДРИКОФНЕНЬ КУДСА СОДАМОШИТНЕНДИ ВЕНЕМОМАСЬ—ВАСЕНЦЕ ВАСТСА

Газетаньконь тячиень номерсонза азонттама Лямбирскяй райононь Атемар велень лама идень семьять колга. Алексей Алексеевич и Анастасия Александровна Индрикофне шачфтсть и касфтыхть 4 цёрат.

Алексей Алексеевич Мордовияса содаф общественнай деятель. Сон Мордовия Республикань ОНФ-нь Региональнай штабть членоц, «Образование» тематическяй площадкать экспертоц, «Правда и справедливость» журналистонь премиять лауреатоц. Сон философскяй наукань кандидат, Российскяй Федерациянь Президентть видеса Народнай хозяйствань и государственнай службань Российскяй академиянь культурологиянь и социальнай коммуникациянь кафедрань доцент.

Анастасия Александровна культурологиянь кандидат, профессиональнай коммуникациянди английскяй кялень кафедрань доцент. Работай Н.П.Огаревонь лемса Мордовскяй госуниверситетса преподавателькс. Тяни шабань мельге якамань отпускса.

Эряви азомс, кафцьке полатнень тядясна-алясна, бабасна-атясна сембе ульсть учительхть, преподавательхть. Сяс тя семьяса просвещениясь занци оцю васта.

Кода вяре азоськ, Индрикофне касфтыхть 4 цёрат. Сембода оцюти, Матвеенди 14 киза. Лац тонафнемда башка, цёранясь оцю мяль шарфни шахматса налхкомати. Эрь кизоня примси участия «Валдо Кече» Идень межрегиональнай шахматнай турнирса. Яромиронди 6 кизот. Сон тядде туй васенце классу. Цёранять салсесы мяленц конструированиясь. Мирославонди топодсь 4 кизот. Сон кельгсы рисавандаманц. А сембода ёмлати, Всеволодонди, 1 киза и 7 кофт.

Оцю семьянь тряйть, Алексей Алексеевичень валонзон коряс, мзярда семьяса касыхть цёранят, тядянь-алянь ответственностть оцю пяльксоц ащи, конешна, алять лангса. Сяс мес сембоса эряви улемс примеркс цёранятненди, ламоса мезьса маштомс, и мушендомс пинге семботи тонафтомс, виде ваймот     макссемс ответт идень кизефкснень лангс.

Индрикофне путнихть лама вий содамошинь кочкаманкса. Тядясь-алясь тонафнесазь шабаснон английскяй и немецкяй кяльхненди. Аф ляткшни шири и мокшень кяльське. Аф ваномок, што синь руст, эрь кизоня сёрматфнесазь «Мокшень правда» газетать, «Мокша» и «Якстерь тяштеня» журналхнень. Кода азозе Алексей    Алексеевич, мяльсна содамс мезень колга пачфнихть национальнай изданиятне.

Индрикофне кельгсазь семьянек путешествовандамаснон. Сидеста арнихть велосипедса и роликса. Семьяса оцю мяль шарфневи трудонь кельгомати. Иттне лезнихть перень тефнень эса. Алексей Алексеевичень валонзон коряс, пяк пара, мзярда шабатне заняфт кодамовок марстонь тевса. Тянь вельде кемокснихть семьяса сотксне, шабатне тонафнихть фкя-фкянь мархта ладязь эряма.

Индрикофне асуфт музыкань ширде. Азорсь морай фортепианоса, гитараса, сёрматкшни стихт. Великай Победать 75 кизонь юбилеенцты Алексей Алексеевич сёрмадсь «Куломань аф содай полк» мора. Сон кучфоль «Победа» Российскяй оргкомитету, коса максфоль рекомендация сувафтомс тя авторскяй мороть Великай Победань шити лемтьф мероприятиятнень плейлистозост. Тя мороть Индрикофне семьянек моразь Сяськомань шиня.

Полатне пара мяльса азондозь лувиеньконди семьяса павазу эряфть секретонц:

—Марстонь эряфса аш кода коронь кирдемафтома. Эряви фалу улемс анококс работамс эсь лангсот, кирдемок мяльса сянь, што тя тевсь аф тёждятнень эзда. Вдь сембе ширде цебярьхть, удалафт ломатть аш. Эряви вешендемс компромисст и шарфнемс мяль полацень аньцек цебярь ширензон лангс,—азонды Алексей Алексеевич.

Т.ПЕТРОВА.