КЕЛЬМЕ ПОРАСЬ ИСЯК И ТЯЧИ

Газетаньконь тячиень номерсонза азонттама Рузаевскяй райононь Кельме Пора (рузкс Новая Муравьевка) велеть колга. Сон ащи мазыдонга мазы вастса, Инсарка ляйть трваса. Районнай центрать и велеть ёткса 18 вайгяльбе.

Кельме Порась—тя мокшень сире веле. Сон вятьсы эсь историянц XVII векста сявомок. Революцияда инголе велесь канневсь Пензенскяй губерниянь Инсарскяй уездти. XIX векть песта Кельме Пораса эрясь 700 малава ломань, синь сувсесть Болду велеть приходс. 1890-1900 кизотнень тя  велень эряйхне строясть эстеест кирпицьста церькав. Сон оцю и мазы, каннесы Николай Чудотворецонь лемонц. 1930 кизотнень храмсь сёлкфоль, а зданиясь максфоль складонди велень колхозти. Аф ваномок сянь лангс, што лама киза озондомань кудсь нолявсь тевс аф стане, мезенди сон лемтьфоль, зданиясь лац ванфтовсь. 70-це кизотнень храмсь азфоль Мордовиянь архитектурнай памятникокс. А 90-це кизотнень тага кайгозевсть сонь пайгонза. Храмти тифоль ремонт и приходсь панжезень кенкшензон велеряйхненди.

Мес велесь лемтьф Кельме Поракс? Тянь коряс улихть ломаттнень ёткса тяфтама мяльхть-арьсемат, кле, сон ащи порать ваксса, коса лама лихтибря. Пси шиня лихтибрятнень ару ведьсна аф аньцек янгафнесыне ётайхнень-потайхнень симомаснон, но и кельмофнесы марнек порать. Тяда башка, велеть ули нинге фкя сяда сире лемоц—Мурай веле. Улема, сонь эздонза путфоль Новая Муравьевка рузонь лемсь. А «новая», сяс мес аф ичкозе велеть эзда ули нинге Старая Муравьевка веле, конань эса, ужяленди, тяни аш фкявок эряй. Коста лиссь и мезе стамсь «Мурай» валсь? Тя кунардонь пингонь мокшэрзянь алянь лем. Языческяй пинкнень мокшетнень ульсть тяфтама лемсна, кода Мурай, Маскай, Поркай, Сабай, Аркай и лият.

Сяда тов азонттама коллективизациянь пинкнень колга. Велень васенце колхозть лемоцоль «Мокша». Председателькс кочкафоль Ф.И.Жадеев.

Великай Отечественнай войнада меле колхозть лемоц полафтфоль. «Дружба» колхозти оцюнякс арась Великай         Отечественнай войнань ветеранць, велень содаф ломанць М.И.Захаров. Сон ётазе марнек войнать и примась участия Берлинть сявомаса. Казьф «За освобождение Праги», «За Победу над Германией в Великой Отечественной войне 1941-1945 гг.», «За взятие Берлина» медальхнень мархта.

1973 кизоня «Дружба» колхозсь шоворсь марс Баймакова велень хозяйствать мархта. Строявсть од фермат, ламоль жуватада. А 1986 кизоти колхозсь ушедсь срадома-каладома. Работайда ляткшнесь 14 ломань, а марнек велеса эряйда—56 ломань, конатнень ёткста ламонцне ульсть пенсионерхт.

А 1986 кизоня ульсь пуроптф «Муравьевский» совхозсь, и велесь ушедсь эреклама. Ломаттне мртцесть меки шачема уженязост. Совхозть васенце директороц С.П.Юртайкин оцю мяль шарфнесь строямати. Васенцекс ульсь строяф велень хозяйствань работникненди столовай. Нюрьхкяня пингста велеса эвондась од куд мархта целай ульця, кона лемтьфоль Молодежнайкс. Совхозть оцюнянц пичефтезе велеса од ломанень ёмла лувкссь. Сон тердезень Рузаевскяй школань-интернатонь выпускницатнень дояркакс работама. Кемонь од стирьхть пара мяльса састь Кельме Порав покодема. Теест ульсть строяфт эряма вастт.

1988 кизоня панчфоль конторанди од здания, строяфоль идень сад, коза якась 50 шаба. Тунда и сёксенда идень садсь работась кафта сменаса. 1989 кизоня тифоль ремонт велень библиотекати, культурань кудти. Ю.П.Пояркин кочкась вокально-инструментальнай ансамбль, кона илатнень пингста весялгофнезень велень эряйхнень.

1990 кизоня строяфоль медпункт, лавка, сауна мархта баня, конань эса ульсь бассейна и душевой комната. 1991 кизоня вели ётафтфоль природнай газ, ведь. Велень китне ацафтольхть асфальтса, строяфоль од седь.

Сембось ульсь ладяф цебярь эряфонди. Но сась стама пинге, мзярда сембось, мезсь ульсь пуроптф коллективизациянь политикать вельде, ушедсь срадома. Срафтф-калатф колхоснень и совхоснень мархта олсесь и велеть эряфоцка. 1998 кизоня Муравьевскяй совхозсь азфоль банкротокс. Ломаттне лядсть тевфтома и ламонцне кадондозь велеть.

Кельме Порань библиотекарть И.И.Чекашевать валонзон коряс, мекольце путьксокс арась велень школать селгомац. Сон пякстафоль 2008 кизоня. Школать колга велеряйхнень мялямса лядсть аньцек валда лятфнемат. Тяни Кельме Порань школаса сетьме, аф кайги пайгонянь циннямась, аф кулевихть идень вайгяльхть. Школать сёлгомда меле велесь ёфси уроскодсь.

—Монь аш мялезе, штоба Кельме пора велезе лядоль аньцек историяса,—азонды Ирина Ивановна.—Ёран, штоба сон аф аньцек эряль, но и касондоль, панжель панчфокс. Вдь эрь ломанти питни ся уженясь, коса сон шачсь, ушедсь якама, васенцеда эшелясь ляйса и стак тов. Но тя аньцек монь мяльне-арьсемане, и тя пяк кржа, штоба вельмофтомс велень эряфть. Тяни велесонк 80 куд, конатнень эса эряй 170 ломань, эздост 7 шабат, конат тонафнихть Болду велень средняй общеобразовательнай школаса. Кельме Порась сувси Болдовскяй велень поселенияти. Миньцонк ули ФАП, кафта лавкат, почта, библиотека, церькав.

Т.николаева.