КАШАН АНДРЕЙСЬ

Мезе ина—цебярель ломанць—Буканин Андрей. Прокс мокшень Кулибиноль. И веялкат петнесь, и охотниконь ружьят, и коннай молотилкат.

Сембось тя виде. Но Андрей аф азовомшка кашаноль. Сиводезь, мярьктяма, пянакудонь или голландкань марама. Кярьмодсь тя тевти. И курок азорхне ашезь сода, кода теенза сафтомс. Озафтсазь обедама. Корштась куцю-кафта, стясь:

—Тинь мес пеедьсамасть? Тяфтама стака работада меле андсамасть постнай лямда? Ломанькска аф путсамасть? Арьсетяда, Андрей семботь сивсы? Монь мархтон тяфта тяда коленде! Туян!

И туй, кадсы пянакудть пялеста. Азорхне арьсихть-тиихть, тага молихть пялонза, сюконяйхть:

—Простямасть, минь юкстаськ, тон пост аф ванат...

—Пост! Пост! Пост—кошке под хвост! Или юкстасть, советскяй властсь посттнень отменил?!

—Видеце, Андрей, видеце, юкстаськ. Мрдак, пожалняста, аделак работать.

Яфодьсы сон кяденц, тага кярьмоди тевти. Азорхне сядонга ванцазь мяленц: пидихть теенза палу-ваи лям, а кши вастс шрать лангса—копша.

—Ярхцак, Андрей, ульхть шумбраня!

Ушеды порема и тага кашангоды:

—Кали ёньцта лиседе? Тинць пялес вачеда эрятада, а тейне баяронь обед затяваде? Арьсетяда, мон седифтома-ваймофтома ломанян? Пореда тинць баяронь ярхцамбяльда!

И туй, хуш пянакудть шумордамс лядсь афи лама. Кода-аф кода кяляцасазь кашанть, эняльдихть. Видец, Андрей ламос аф кашанкшни. Аделасы пянакудть кода эряви, сонць и акшептсы. Аф пянакуд, а налхкш!

Тянь лангс Буканинонь ордаткшнемац изь лотксе. Кизефтьсазь азорхне, кодама питне сяви работанц инкса.

—Да, ладна! Мзяра макстада, ся и пара!

Максыхть, эсь мяльснон коряс, мзяра эряви, а Андрей ювади:

—Тинь, афоли, наругатада лангсон? Кодама пянакуд тиень—марнек велесь кармай сельмонь каяма, а тинь панттада кода анцинянди?

Кярьмоди пянакудонь турбати, гразяй:

—Веляфтса, шяйтаттне сяволедязь!

Виец сонь прокс буканнель—аф стак фамилияцка тяфтамоль. Пелезь варжакстыхть азорхне, кода кедьстонза лисенди мастерсь, тага сюконяйхть:

—Простямасть, Андрей, ашеськ сода работацень питненц. Азк ина тонць, мзяра эряви...

—Ладна, прибавада полтинник, и саты.

Азорхне кенярдихть, мес тёждяста лиссть тя паласта. Улендсь станявок, мзярда сон мярьгондсь прибавамс комсь трёшник, а фкя ломанть кядьста вешсь сембоц вете трёшникт.

Тяфта Андрей колендсь и кудонь путомста, и кодамовок механизмань петемста. Кой-кит лувондозь сонь шоряф прякс, кой-кит, меколанкт, пяк ёжукс. А алясь, шять, тяфта няфнезе смузенц и пеетькшнезень велеряйхнень.

Михаил Бычков.