Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

Финно-угорскяй народонь культурань Поволжскяй центрать директороц, Финно-угорскяй культурань Научно-исследовательскяй лабораториять заведующаец, Россиянь нароттнень Ассамблеяснон Мордовскяй региональнай отделениянц председателец, философскяй наукань кандидатсь Е.Н.ЛОМШИНА: «РАБОТАНЬКЕ ВЯТЕВИ СТРАНАНЬ КОНСТИТУЦИЯТЬ ВЕШФКСОНЗОН КОРЯС!»

Тяддень 7 июльста Саранскяйса ётась «Финно-угорскяй народонь культурань Поволжскяй центрась» Аф коммерческяй ассоциациянь учредительхнень внеочередной Марстонь пуромкссна.  Учредителень пуромксса тяфта жа ульсть Мордовия Республикань культурань, национальнай политикань и архивнай тевонь министрсь С.Н.Баулина, мордовскяй (мокшень и эрзянь) народонь Межрегиональнай общественнай организациять председателец Ю.А.Мишанин.

 

Пуромксса учредительхне валхтозь «Финно-угорскяй народонь культурань Поволжскяй центрась» Аф коммерческяй ассоциациянь исполнительнай директоронь полномочиятнень Р.И.Акашкинать лангста, кона тя должностьса покодсь 5 кизода ламос.

 

Исполнительнай директоронь должностьс фкя мяльса кочкафоль Н.П.Огарёвонь лемса Мордовскяй государственнай университетонь Финно-угорскяй культурань Научно-исследовательскяй лабораториять заведующаец, «Россиянь нароттнень Ассамблеясна» Общероссийскяй общественнай организациять Мордовскяй региональнай отделениянц председателец, философскяй наукань кандидатсь Елена Николаевна Ломшина.

 

Культурань, образованиянь и наукань сфераса сон покоди ни 25 кизода ламос.

 

 

—Елена Николаевна, кода тяни кармай мольфтема тевонзон финно-угорскяй народонь культурань Поволжскяй центрась?

 

—Васенцесь, мезть ёран мон тиемс—тя пуроптомс фкя сюлмос тяда ингольдень рабочай опытть, кона ули Поволжскяй центраса, сувафтомс тоза эсь опытозень и нолдамс ня марстонь содамошитнень тевс.

 

Шарьхкотьф, кемнилие кизоста, мзярс Поволжскяй центрась вятьсыне тевонзон Мордовия Республикаса и Россиянь лия региоттнень эса, коса эряйхть финно-угорскяй наротт, тиф аф кржа. Но, кода содаф, эряфсь фкя вастса аф ащи. Сон эрь мезне путни инголенк од задачат  и латци инголенк од вешфкст. Сяс тячи, койсон, Поволжскяй центрати эряви тиендемс мокшэрзянь и Россиянь  финно-угорскяй лия народонь национальнай культуратнень сяда содафокс, кода Мордовия Республикаса и странань лия региоттнень эса, коса компактнайста эряйхть мокшэрзят и лия финно-уграт, стане и омба масторса. Тиемс тянь ули аф тёждя, но тиемс эряви. И тя тевса, койсон, аф аньцек пандемиять пингста, но и аделавомдонза мелевок, тейнек эрявикс и оцюдонга оцю лезкс максыхть тяниень пингонь информационнай технологиятне. Тячи синьфтомост аш кода.

 

Сяс тяниень пингть интернетса минь тихтяма эсь лацонь медиоплатформа, конань вельде Поволжскяй центрась кармай вятема работа кода Россияса, стане и омба масторса. Тя медиаплатформати арьсекшневи сувафтомс мархтонк марстонь и синцень проектснон мархта Мордовиянь и странань сембе лия этнокультурнай центратнень и вуснень, конат работайхть финно-угорскяй культурань и наукань сфераса. Тяфта жа арьсекшневи ётафтомс эряфс марстонь интеграционнай проектт гражданскяй обществань институттнень и государственнай властень оргаттнень мархта кода региональнай, стане и федеральнай уровеньца.

 

Тяда башка, арьсекшневи панжемс Поволжскяй центрань представительстват Российскяй Федерациянь эрь регионца, коса компактнайста эряйхть мокшэрзят и финно-угорскяй лия наротт.

 

—Кода содаф, Елена Николаевна, тон лама киза ни покодят Россиянь культурань, наукань и гражданскяй обществань сфераса. Сяс, койсон, содасак, кода и мезть вельде эрь тевса сатневихть сатфксне.

 

—Эряфонь и профессиональнай содамошине няфнесазь тейне—аньцек эсь тевонь содай команда мархта эрь тевса сатневи эрь сатфкссь. Тяфта ульсь, мярьктяма, ётай кизоня, мзярда Финно-угорскяй культурань научно-исследовательскяй лабораториясь «Мокшэрзянь национальнай культура» лем ала аноклась кафта оцю проектт, конат тяда меле  няфтевсть Финляндиянь кафта ошнень эса. Тя тевса тейнек оцю лезкс эста макссть Н.П.Огаревонь лемса Мордовскяй государственнай университетонь ректорсь С.М.Вдовин, Национальнай культурань институтонь и филологическяй факультетонь студенттне-волонтёрхне, а тяфта жа Финляндиянь Культурань министерствась.

 

Сяс, корхтамок Поволжскяй центрать маластонь и сай пингонь проектонзон квалма, азса видеста: синь анокламстост и эряфс ётафтомстост, мон и центрань коллективсь, надиятама мокшэрзянь национальнай активть, газетатнень, журналхнень, республикань гражданскяй обществань институттнень, общественнай организациятнень и государственнай властень оргаттнень лезксснон лангс.

 

И надиятама тя лезксть лангс аф стак. Кода содаф, Мордовияса цебярьста ванфтовсь мокшэрзянь национальнай культурась, мезть, мярьктяма, аш кода азомс Финляндиянь и омба масторонь финно-угорскяй лия нароттнень национальнай культураснон квалма. Сяс  ули кода азомс: няфнемок эсь проектоньконь вельде национальнай культураньконь инь няевикс мазышинзон Россияса и омба масторса, минь тисаськ и культураньконь, и Мордовия Республикать нинге сяда содафокс, кода странаса, стане и сембе мирса!

 

Тяфта вятемс работаньконь тячи стане  жа кошардыхть эсонк Российскяй Федерациянь Конституцияти полафтксне, конатнень инкса минь аф кунара максоськ эсь вайгяленьконь.

 

—Кода содаф, сай кизонь апрельста  странаса  ётафтови Населениянь Всероссийскяй переписсь. Мокшэрзянь народть национальнай самосознаниянц кеподеманкса, кодама мероприятият арьси ётафтомс Поволжскяй центрась Мордовияса и Россиянь лия региоттнень эса, коса компактнайста эряйхть мокшэрзят?

 

—Кода содаф, 2010 кизонь Населениянь Всероссийскяй переписть итогонзон коряс, мокшэрзятне странасонк ульсть финно-угорскяй инь оцю народкс.

 

Лиякс мярьгомс, эстонь переписть пингста «мордвин, или мордвин-мокша, мордвин-эрзя» национальностень лемса эсь пряснон  сёрматфтозь 744237 Россиянь гражданин. Сяс, койсон, тейнек и сембонди, кит миньцонк работайхть национальнай сфераса, задачась содаф—эряви тиемс семботь мокшэрзятнень национальнай самосознанияснон срьгозьфтеманкса-кеподеманкса. Аньцек тяфта тяддень переписть ётафтомста тейнек  удалай аф прафтомс мокшэрзянь народть лувксонц, аф ваномок ассимиляциянь процесснень лангс.

 

Кда корхтамс Поволжскяй центрань мероприятиятнень квалма, эряви азомс, кода республикаса, стане и странань лия региоттнень эса синь  арьсекшневихть ётафтомс марстонь вийса Мордовиянь общественнай и культурань организациятнень мархта. Тяфта жа нолдавихть тевс Поволжскяй  центрань медиаресурсне.

 

Надиян, марстонь вийса тейнек удалай пяшкодемс-тиемс ся задачать, кона тячи ащи минь и республикань лия  учреждениятнень инголе.

 

—Елена Николаевна, кода няйсаськ, тон тяда инголивок вятеть оцю работа национальнай и общественнай сфераса. Поволжскяй центрань руководителькс кочкамдот меле тонь тефнень лувкссна няевиста кассь. Сяс ёран содамс: мезсь максси тейть вийхть вятемс-тиендемс тяшкава оцю работа?

 

—Кельгомась! Кельгомась оцю и  ёмла родинати—Россияти и Мордовияти! А сяда лама тя кизефксть лангс азомс тейне аш мезе.

 

—Удалаза сембе арьсефонте.

 

—Сюкпря. Сембось кармай лац. Мон лац шарьхкодьса: кить педа-пес ётасы аньцек ся, кие  ланганза моли.

 

В.Нестеров.

 


23.07.2020 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин