Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Культура

МАЗЫХТЬ МОКШЕНЬ СТИРЕНЬКЕ

Кельгома лувиеньке! Тячи «Мазыхть мокшень стиреньке» рубрикаса оцю мяльса содафттядязь Краснослободскяй райононь Колапа мокшень велень стирть Елена Макайкинать мархта.

 

 

Шачсь Елена Макайкиттнень трудонь кельги, лама идень семьясост. Зинаида Ивановна и Василий Степанович Макайкиттне касфтсть ниле итть: колма цёрат и фкя стирь. Тяни Макайкиттне пенсиясот. Инголи Зинаида Ивановна работась банконь отделенияса, а Василий Степанович ветеринарнай врачель. Но ульсь пинге, мзярда мокшалясь якась Москуву добувама, сяс мес эрявсь трямс семьянц.

 

Еленать валонзон коряс, идькс пингоц ётась мялень салайста, вдь тядядонза и алядонза башка теенза лездома, надияма вастокс ульсть альняканза Александр, Евгений и Виталий. Синь тянивок ащихть мокшень стирти васенце нежедема вастокс. Фалу лезнихть фкя тяка сазорняснонды валса и тевса.

 

Школать шумордамдонза меле Елена поступась Саранскяень Кооперативнай институту, тонафнесь «Финансне и кредитсь» специальностть коряс. Институтть аделамдонза и дипломть получамдонза меле Елена Макайкина ашезь аще тевфтома, а эстокиге мусь работа и ушедсь работама закупкатнень коряс экономистокс.

 

«Работазень кельгине, сон мялезонноль, коллективське пяк цебярель, шарьхкодеме фкя-фкянь. Тияк тонафнень магистратураса, конань шумордайне отличнайста»,—мярьгсь сон.

 

Но мзярда Елена получазе магистронь дипломть (ся пингти экономистокс работась колма кизот ни), сась мяльс ётамс эряма Москуву. И вов ни аф васенце кизось работай фкя оцю организациять финансовай отделсонза.

 

Школаса тонафнемста стирсь оцю мяльса примсесь участия мокшень кяльть и мокшэрзянь литературать коряс олимпиадатнень эса, сяс мес пяк кельгозе тядянь-алянь родной кяльть. Морсесь ётафневи пуромкснень эса мокшень и рузонь морот, лувондсь стихотвореният.

 

Еленать валонзон коряс, Колапаса фалу эрясть и тянивок эряйхть национальнаень кельги и ванфты ломатть. Сембе минценнети кельгомась эрь кудса, эрь семьяса ётни поколенияста поколенияс. «Колапань ломаттне—трудонь, родной кялень кельгихть и ванфтыхть»,—мярьгсь мокшень стирсь.

 

Щамсь, конань фотографиятнень эса няйсасть лангстонза, ётась Еленати Колапань сембе ширде шнама ломанть, мокшавать, тылонь труженицать, щаванц Прасковья Алексеевна Татымовать эзда.

 

«Щавазе—семьянь коень-обуцянь ванфни и кемоксни. Сон казезе тейне мокшавань тя щамть, конанди коняфкс тиеме тядязень мархта. Тяфта сон арась сядовок мазыкс и сельмос повикс»,—азозе стирсь.

 

Мзярда школаса тонафнемста Елена примсесь участия концерттнень эса, сон стане жа щашендсь мокшавань щам. И теенза прясинскяй (тяфта Колапаса мярьгихть сюролда мархта панчфу руцяти) сотнекшнесь щавац Прасковья Алексеевна, сяс мес сондедонза лац тя тевть кивок аф маштсы и аф тисы. Мокшавать сембось моли бта линейканя коряс, виденяста. «Мокшень щамнясь ломанть петьсы»,—тяфта фалу корхни П.А.Татымова. Тылонь труженицась сонцьке эряфоньберьф аф явонды мокшавань щапнень-каряпнень мархта. Тяфтамкс и касфтозе уноконянц Еленать, кона шабакс идень саду ашезь яка, а ащесь кельгома щаванц мархта и тонафнесь эздонза мокшень морот, кулхцонкшнесь азкст ётай пингть колга. И щаванц ёню валонза мокшень щамть-карямть колга сембе пингс лядсть стирть мялямс.

 

Тяни Елена эряй и работай Москуса, но пяк лажаткшни тядянцты и алянцты, щаванцты, Колапа велети, целайнек Мордовияти. Лятфтасы, кода щавац ушеды мокшень тя или тона мороть морама и ваймоц пяшкоди таколдомада. Старандай сашендомс ёмла родиназонза сяда сидеста.

 

Тядде, коронавируснай од инфекциять сюнеда, ламоц праздникненди, тяконь лувксса и Тройцяти, лемтьф пуромкст ашельхть. А Святой Тройцянь шись эрь велеса фалу ётафневи весяласта, мяляфтовиста, эрявикс койхнень мяльса кирдезь и тевс нолдазь. Тя оцю праздникть коензон ёткс сувси и ведти коняфксонь ёрдамась. Вов и Елена Макайкина тядде Колапаса улемстонза щазе мокшавань щамонц и якась ляйть трвас коняфксонь ёрдама. И катк тядде сембонди содаф туфталть инкса ашельхть оцю пуромкст, Макайкинатне—Елена, тядяц, рьвянясна семьянь келеса щасть мокшавань щапт, тифтсть лятфнембяленди фотографият. Синь ёрайхть, штоба ванфтовольхть национальнай койхне, щапне, ётнельхть эряфкшу ломаттнень эзда оттненди.

 

Ётка пингстонза Елена кельгсы ёмла ожнаса сёрмадоманц, алмазнай мозаикань кочксеманц, велосипедса арнеманц.

 

Сембе цебярть тейть, Колапань мокшень мазы стирсь!

 

Т.АЛЬШИНА.

 


23.07.2020 №28
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин