Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Обо всем понемногу

МОКШАВАСЬ САМОИЗОЛЯЦИЯНЬ ПИНГТЬ ШАРФНЕСЬ МЯЛЬ ОД КИЗОНЬ НАЛХКШЕНЬ ТИЕМАТИ

Аф фкя ков кода целайнек странаса, стане и башка региоттнень эса мольсь и тянивок нинге моли самоизоляциянь пингсь. Населённай ламоц пункттнень эса сувафтфоль карантин. И тифоль тя сембось коронавируснай од инфекциять келемоманц каршес ащеманкса, ломаттнень шумбрашиснон и эряфснон ванфтомаснон инкса. Мярьгондевсь ащемс кудса, ётафтомс пингть семьять мархта, башка туфталфтома аф лисендемс ульцяв. Ламотне кулезь тянь и самоизоляцияста шарфтсть мяль кельгома тевснонды. Кепотьксонди, фкя содафозе морафтозень рузонь классикнень произведенияснон, омбоцесь ёмла ожнаста сёрмадсь Шкайнят. И лацост ломаньда ламоль. Кой-кит меле  эсь кядьса тиф мазышить фотографиятнень и видеороликнень вельде няфнезь интернетса и тернезь лиятненге аф ащекшнемс тевфтома.

 

 

Весть, социальнай сетьтнень эзда фкаса шарфтонь мяль видеороликонь лангс. Мастер-класса подмосковьянь Красногорск ошень эряйсь Светлана Уланова пачфнесь Од кизонди кузть и пичеть мазоптоманкса налхкшень эсь кядьса тиемать  колга. Аш месть корхтамс, пяк тусть мялезон Светлана Ивановнань налхкшенза, да и целайнек мастер-классь удалафоль. И тя ся ёткть, мзярда ни пцтай марнек ваныне сонь видеоуроконц, талакодонь, што тя вдь землячказе—Рузаевскяй райононь Мокшень Пишля велеса шачф-касф мокшавась! Мокшень Пишляса эряй кельгома тядяц—велень уважаемай ломанць Ольга Даниловна Гунина, конань минь сембе—оцюнек-ёмланек кельгомга лемнесаськ Ольгакай. О.Д.Гунинать содасаськ кода сюреса сёрмады мастерицань, пряруцянзон лангс ванондолеть и ванондолеть, и вов стирец Светлана Ивановна шарфтсь мяль налхкшень анокламати, декорированияти, лиякс азомс, мазышинь тиендемати.

 

Мокшень Пишля велень школаса 8 классть шумордамдонза меле Светлана поступась Зубово-Полянскяй педагогическяй училищав, получась начальнай классонь учителень специальность, но ушедсь работама декоративно-прикладной искусствань преподавателькс Зубова Поляна поселкаса и лиссь рьвакс тостонь цёранди.

 

Светлана кельгозе сюреса сёрмадоманц, кодаманц, ёмла ожнаста кодаманц. И сембось тя мялезонзоль.

 

Вов ни лама киза сон эряй Красногорск ошса, но ёмла родинанц аф юкснесы, сидеста сашенды тядянц шири.

 

Ужяль, но коронавируснай од инфекциясь, кона Россияв пачкодсь тяддень январть песта, ламода полафтозе эряфоньконь. Ломаттне абондсть, эводсть, сяс мес ашезь сода мезе ули ванды.

 

Светлана Ивановна Уланова сась мяльс кундамс кельгома кядьтевонзонды, и, тяка пингть, тонафнемс мезевок одня. Лятфтась Од кизонди и Роштуванди кусненди и пиченятненди повфневи налхкшнень колга. Улема, эрсь эздонк, мзяра кизоц тяза уле, эрь кизоня оцю мяльса повфнесыне синь сянгяря шуфтонятнень лангс. А кда тиемс тяфтама налхкшт эстейть, эста синь сядовок кеподьсазь мяльцень тялонь кельгома праздникнень пингста. Светлана рамась шархт-заготовкат, краскат, ожнат, мазы рисунка мархта салфеткат. Тевоц тусь. Тевс нолязень интернетста муф урокнень, мастер-класснень. И вов мазы налхкшне анокт. Кодапт синь лиссть—ваность тинць. Арьсян, тиньге, луви ялгат, макстада оцю питне эсь кядьса тиф тя мазышити.

 

Сяда тов мастерицась тись кельме фарфорста изделият, мазоптезень панчфонь сяканятнень, тись мазы панчфт и петфтазень синь акша лапш тарелкатненди и стак тов.

 

Светлана Ивановна кирди кеме соткст Мокшень Пишлянь мастерицатнень мархта, конат стайхть, кодайхть, сюреса сёрмадыхть. Вели эрь самстонза васьфни мархтост. Тифонзон мархта фотографиятнень и видеороликнень кучсесыне велеть социальнай сетьса группазонза. Тяфта и полафнихть опытса, тонафтыхть фкя-фкянь.

 

А нинге эсь кядьса тиф       налхкшензон кой-кона пяльксснон ёрай каземс Мокшень Пишля велень клубти, коса эрь кизоня Од кизонь каршеня стяфневи оцю куз.

 

С.И.Уланова няфтезе, што и самоизоляциянь пингть ули мезьса занямс пряце, ули кода тонадомс од кядьтефт, лятфтамс юкстафнень.

 

Т.ВЛАДИМИРОВА.

 


23.07.2020 №28
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин