Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Тема дня

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Торбеевскяй районца

 

 

Сяка жа шиня, пяденцяста, Владимир Волков ульсь и Торбеевскяй районца, коса ванозе Дракино велеса школать строяманц.

 

Кафта этажса од зданиясь, валда и оцю, кона строяви «Образование» национальнай проектть эряфс ётафтомань рамкаса, ёфси курок примасыне ученикнень. Тяни объектса мольфтевихть мекольдень работатне, аделсеви электричествань системань нолдамась, стенатнень и поталакнень архтомасна. Маластонь  пингть ушедовихть тонафнемань класснень и мастерскойхнень эса оборудованиянь ладямать коряс работатне. Обустроендави школьнай стадионць и маластонза территориясь.

 

Республикань Оцюнясь вешсь строительхнень ширде, штоба тиемс-строямс семботь оцю качества мархта. «1 сентябрьста школати эряви примамс ученикнень,—мярьгсь Владимир Волков.—И семботи улема оцю уровеньца!»

 

Строительнай площадкать ваномста Владимир Волковонди маладсть тястонь эряйхне, конат азсть спасиба республикань руководительти и од школанкса, и ульцять эзга кафта китнень строяманкса. Стане жа республикань Оцюняти азозь Кажлодка велень эряйхнень благодарностьснон 8 вайгяльбень кувалмоса од кить инкса, кона строяф «Безопасные и качественные автомобильные дороги» национальнай проектть эряфс ётафтомань рамкаса.

 

 

Атюрьевскяй районца

 

 

Сяльде Мордовиянь Оцюнясь ульсь Атюрьевскяй районца. Тяса Владимир Волков ванозе, кода мольфтеви Атерьса идень од садть строямац.

 

Тя объектсь строяви «Демография» национальнай проектть коряс, сонь питнец—97 миллион цалковайть малава, эздост пцтай 62 миллионць—федеральнай бюджетста, 35 миллионць—республиканскяйста.

 

Идень садсь строяви 90 иденди, эсонза кармайхть 5 группат: 2 ясельнайхть (эрть эса 15 идь) и 3 дошкольнайхть (эрть эса 20 идь). Идень садса кармай медпункт, пищеблок, физкультурнай и музыкальнай залхт, а нинге—бассейна.

 

Владимир Волков ванозе Атюрьевскяй райононь оцюнять Иван Гусаровонь и строительнай подряднай организациянь представительхнень мархта строительно-монтажнай работатнень графикснон и мярьгсь виияфтомс строямань темпнень.

 

 

Зубово-Полянскяй районца

 

 

Мордовиянь Оцюнясь Владимир Волков 24 июльста сяка жа рабочай поездканц пингста ульсь Зубово-Полянскяй районца, коса ванозень велень хозяйствать виияфтоманц и китнень строямаснон коряс кизефкснень.

 

Кода азондозе республикань руководительти Зубово-Полянскяй райононь оцюнясь Владислав Поршин, тядде видефнень площадьсна лувондови 24 тёжянь гектар лангса, конатнень эзда ламонцне—зерновойхть и зернобобовайхть. 23 июльста сёронь урядамати кярьмодсь «Мордовский бекон» ЗАО-сь.

 

Республикань Оцюнясь ванозе тя предприятиять территорияса озимой тозерть урядаманц мольфтеманц. Предприятиять генеральнай директоронц васенце заместителец Олег Букин азондозе региононь руководительти, што эрь гектарста тозерда сявови 52 центнеронь, Зубово-Полянскяй районца сёронь урядамать «Мордовский бекон» ЗАО-сь арьсекшни аделамс 12 шиста, кда погодась аф коласыне платтнень. Предприятиясь нолдась 1 миллиардта лама цалковай районца растениеводствать виияфтоманкса, тяконь лувксса рамафоль велень хозяйствань тяниень пингонь техника.

 

Механизаторхненди тяни сась «пси» пингсь, но синь анокт тянди. Сёронь урядама пингть комбайнерхнень зарплатасна лувондови 350 тёжянь цалковай сезонти.

 

«Тядде урожайсь цебярь, сяс ули кода и сяда оцю зарплата получамс, сембось ащи эсь эздонк»,—мярьгсь республикань Оцюнять мархта корхнемста комбайнерсь Ринат Теляков.—Монць тястоннян и эрянга   тязк, комбайнаса работан ни кемонце сезонць».

 

«Мордовский бекон» ЗАО-сь арьсекшни сяда лама тиемс Зубово-Полянскяй районти, тяни планца строямс тяса оцю предприятия—100 тёжянь тувонди свиноводческяй комплекс.

 

Тяфта жа Мордовиянь Оцюнясь ванозень Каргашино-Анаево-Вадовские Селищи велетненди моли кить участканзон эса ремонтнай работатнень. Тядде ремонт тиеви 5 вайгяльбет кити, сувафтомок тяза кафта сеттнень. Кить ваномста корхтафоль китнень лангса ремонтнай работатнень сяда товолдонь мольфтемаснон колга МР-нь Правительствать Председателенц заместителенц—строительствань, транспортонь и дорожнай хозяйствань министрть Виктор Цыгановонь и МР-нь автомобильнай кинь Управлениять руководителенц Валерий Резеповонь участияснон мархта.

 


30.07.2020 №29
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин