Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

ШАБАНЬ ШАЧЕМАТЬ МАРХТА СОТФ КОЙХНЕ

Кунардонь пинкнень мокшэрзянь семьятнень эса ламоль шабада. Семьясь лувондовсь аф семьякс, кда эсонза ашельхть итть, сяс шабань шачемати лемтьф лама эрь кодама кой. Синь водендафт араламс одс шачить и шачфтыть кальдявда, максомс цебярь эряфонь ушеткс идняти.

 

Мокшень валмуворкснень эса шнакшневихть лама идень шачфтыхне: «Лама идень касфтыхне—родонь-плямань ванфтыхне», «Павазу кудсь, коса лама идьта». И, меколанкт, сялдовихть аф шачфтыхне: «Фкя идня касфнемс—аньцек сельмоветть прафнемс», «Идьфтома ломанць, кода унду шуфтсь—аф кер, аф пенгат» и лият.

 

Кинь ашельхть идьсна, сятнень лувондозь аф павазукс. Мзярс рьвянясь ашезь шачфта идь, теенза ашесть мярьгонде озсемс марстонь шра ваксс.

 

Мокшэрзятне сяда кеняртькшнесть цёрань шачемати, сяс мес алятне поладсазь родть-плямать, а стирнятне лувондовсть стака канксокс. Сяс, кда шабатне кизефнезь, коста эвондась семьяса пиже иднясь, цёранянь шачемста мярьгондельхть: «Ведявась казезе», а кда одс шачись стирня, корхнесть: «Ведявась ёрдазе». Лувондовсь, што лама идень кучикс ульсь Ведявась и Вирявась. Ведявать лемс ётафнесть озкст, эняльдсть кучемс пизем, штоба касольхть сёротне, а семьятнень эса шачендольхть итть.

 

1719 кизоня дацькя кармасть сявондема эрь «ваймоть» инкса, а модать явондозь аньцек алятненди. Вов мес пяк каясть сельме ся мирттнень-рьвятнень лангс, кинь ламоль цёрадост.

 

Кунардонь пинкнень сидеста мокшаватне шачфнесть баняса, а кда аф васенцеда ни, шачфнесть ськамост. Но сидеста раштайти лезнесь «идень кундай бабась». Ня эряфкшу бабатне содазь ся пингонь народнай медицинать, маштсть тёждялгофнема шачфтомать. Тяда башка, ётафнесть и магическяй тефтка. Кепотьксонди, шачфтыть щамса юкссезь сембе пунятнень, сюлмонятнень, келес срафнезь авать шяярензон и стак тов. Идень кундай бабась велеса ульсь оцю почетса. Кепотьксонди, Очижиста казне мархта теенза сашендсть аватне, конатненди сон лездсь шачфтомста. А шабатне, конат шачсть кядялонза, лемнезь сонь бабакс, а сон синь унококс.

 

Мокшаватне работакшнесть шачфтома пингозост, сяс аф шуроста улендсь, шачфнесть паксяса, вирьса. И шабати лемга путнесть шачема вастонц коряс: Паксяй, Паксют, Виряй, Тингай (тинге валть эзда). Тяда башка, лепнень вельде шарьхкодевсь, мзярда шабась шачсь (Нуят, Нуякша—нумать пингста; Кочкальте—урожаень кочкамань пингста). Кда шабатне семьяса сидеста кулсесть, одс шачити путнезь ульцяса васенцекс васьфтьф ломанть лемонц. Тянь тиендезь сяс, мес ломанць шумбраксни васедемста, тянь вельде арьси улемс шумбракс и павазукс аньцек шачф идтивок.

 

Иднянь шачемда меле кудса ётафневсь кшинь озондома. Крьвяснесть штатолня, шра лангс путнесть кши, сал, ям, алхт. Идень кундай бабась или од тядять авозец сявондезе кядезонза кшить и озондсь Юрхтавати, штоба сон ванфтолезе шабать сембе кальдявда, максоль шумбраши и паваз.

 

Сашендсь пинге одс шачить эшелямс. Колма шит мельцек ушнесть баня. Идень кундай бабась парьсезе сонь тяльмоняса, штоба касоль шумбракс и мазыкс. Кой-кона велетнень эса одс шачи цёранятнень эшелякшнезь тумонь тяльмоса, штоба улель вии и ламос эряль, а стирнятнень—келувоннеса, штоба касоль мазы стирькс. Тевс нолявсь пизелксонь тяльмоське, лувондовсь, што сон панцесыне шабать эзда кальдяв вийхнень. Мокшэрзятнень арьсемаса кальдяв вийсь пели пизелкста. Вов мес тяльмоть эзда пизелксонь тараткат путнесть шачить нюрямс, кирнезь тоса нильгемонь ши. Шабать ванфнезь кальдяв сельмода, сяс кстиндамозонза ашезь няфне ломаттненди.

 

Мзярда мокшэрзятненди пачкодсь христианствась, сембода оцю илакс арась кстиндамась. Теенза аноклакшнесть одс шачить сембе радня ломаненза. Шабать эряфса оцю рольсноль крёснавать и крёсналять, тя лац няеви и мокшэрзянь свадьбань ётафтомасовок. Кумась аноклакшнезе семботь, мезсь эрявсь кстиндаманди (крёскя, панарня, шабань кундамань нуланя и стак тов). Купельда меле священникть кядьста цёранять сявондезе крёсналясь, а стирнять—крёснавась. Шабань кстиндафтомда меле недяляньберьф мольсь «содафтомань» пингсь—иднять ванома, мархтонза содафтома сашендсть шабратне, содаф ломаттне. Синь каннесть мархтост ярхцамбяльхть—цюкорнят, пярякат, алхт, ламбамнят. Тянь вельде арьсесть шабати козя эряф.

 

Оцю васта макссевсь васенце пеень лисемати, якама тумати и васенцеда прянь нарамати. Тянь коряс ульсть стане жа лама мялень салай койда. Кепотьксонди, ся шабати, кона музе иднять васенце пеенц, макссельхть казне, стирняти—руцяня, цёраняти—панарня. И ся шиня пицесть танцти цюкорнят, васенцеть эздост макссезь пеень муйти.

 

Тяни аватне шачфнихть шачфтома кудса, сяс шачфтомать мархта сотф ламоц койхне юксневихть. Но кой-мезе ванфтовсь тячити самс. Кепотьксонди, тянивок ушнихть баня, эшелякшнесазь шачфтома кудста ускомда меле тядять и иднять. Ётафнихть «бабань кшит». Кода тяни ётни тя илась азонды Краснослободскяй райононь Зайця велень мокшавась А.П.Циликина:

 

—Бабань кшис терневихть радня аватне. Шачфты авать тядяц или авозец, лиякс, кудазоравась, пиди танцти кши или цюкор, кочкай козя шра. Тяни бабань кшис сашендыхть казне мархта, казендихть одс шачить лемс ярмак, од тядяти каннихть ламбама ярхцамбяльхть. Ингольдень пинкнень, кепотьксонди, 80-це кизотнень, мзярда шачендсть монь идне, аватне бабань кшис каннесть шаваняса тозер.

 

Мзярда пуромихть сембе инжихне, кудазоравась керсы кшить и озонды Шкайти иднять и сонь тядянц шумбрашиснон инкса. Сембе варжасазь кшить таньфонц и азондыхть пара валхт-арьсемат одс шачить лемс. Озондомда меле аватне ушедыхть симома-ярхцама. Кие васенцекс ушедсы моронь морамать, сянди кудазоравась казенди мазы котф или анок стаф мокшень панар. Кудазоравать мялец, штоба мороть ушедолезе павазу ава, конань ули мирдец, шумбрат-тазат шабанза. Штоба одс шачиське улеза павазу и шумбра. Бабань кшиста васенцекс морсесазь «Шачи сёра» кунардонь пингонь мокшень мороть. (Ред.: тя мороть валонза максфт сяда алува).

 

Илать шумордамдонза меле кудазоравась казендьсыне сембе инжихнень котфса. Аватне казьф котфнень сотнесазь кргазост и тушендыхть кудга. Ётнихть велева моразь, штоба сембе содальхть кеняртьфти кулять колга.

 

Тяниень мокшетнень эряфса аф аньцек юксневихть кунардонь пингонь койхне, но и эвондакшнихть оттка. Кепотьксонди, инголи мокшетне и эрзятне ашезь явфне мезьсовок лия шитнень эзда шабаснон шачема шиснон. Тяни эрь кизоня иттнень шачема шистост семьяса тиендихть илат, терневихть крёснавась крёсналять мархта и иттнень ялгасна.

 

Шачи сёра

 

(Кунардонь пингонь мокшень мора)

 

Вай, шачи сёрокс кда улелень,

 

Межада-межас, ялгай,

 

                                     мадолень,

 

Ломань сереса ронга

 

                                      ёрдалень.

 

Улель прянязе локша недь

 

                                            эчкса,

 

А шужярезе—шяй нюди эшка.

 

Нумон молельхть-сальхть

 

Од стирьхть, од ават,

 

Вай, ётконьшовор—

 

Сюдоф солдаткат.

 

Пря соткссна улельхть

 

Сембонь якстернят,

 

Лангсост панарсна

 

Ловда акшенят.

 

Ускомон ардольхть

 

Апак петть айгорхт,

 

Мельгаст од крандазс

 

Озсефт од цёрат.

 

Сембе кенордальхть

 

Шачи сёронкса.

 

(Морось сёрматф Зайця велень инь эряфкшу эряйть А.Ф.Гераськинать эзда).

 

Т.ПЕТРОВА.

 


30.07.2020 №29
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин