Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Саранск ошень П.С.Кирилловонь лемса краеведческяй библиотекать заведующаец Н.М.БОЯРКИНА: «ПОБЕДАТЬ ТЯШТЕЦ ВАЛДОПТЫ СЕМБОНДИ!»

—Нина Михайловна, шарьхкотьф, коронавируснай пандемиясь культурань и лия учреждениятнень работас сувафтсь лама прябала. Но, кода содаф, Саранск ошень П.С.Кирилловонь лемса краеведческяй библиотекась эсь работанц сяка ашезе лоткафне. Сяс пара улель содамс, кода и кодама тефт мольфтеде пандемияда инголе и кода тянь мархта ащихть тяни тевонте?

 

—Кода содаф, тяддесь, мзярда минь васьфтеськ Великай Победать 75 кизонь юбилеенц, Россиянь Президентть В.В.Путинонь Указса азф-ладяф Мялямонь и Славань кизокс. Сявомок тянь мяльс, библиотекань сембе мероприятиятнень ёткса васенце вастса ащихть Великай Победати, сонь 75 кизонь юбилеенцты, войнань Геройхнень и тылонь труженикнень подвигснонды лемтьф акциятне. Сембе синь библиотекасонк аф фкя лацонь форматса кармайхть мольфтевома кизоть аделавомс.

 

Кепотьксонди, январь ковста сявомок и тячиень  шити молемс  Великай Победать 75 кизонь юбилеенц, Великай Отечественнай войнань фронтонь и тылонь Геройхнень лемс «Поколениятне катк мяляфтсазь» марстонь лем ала минь ётафтоме мероприятиянь целай цикла. Ётксост—«Победать шамаликонза» мультимедийнай проектсь, коса азондови Саранск ошень войнань и тылонь ветераттнень квалма, «Победать тяштец валдопты сембонди» литературно-музыкальнай илась, «Победань   кинохроника» лем ала од лувихненди кинофильмань няфнематне, «Эрь лувити—Георгиевскяй лентаня» акциясь, «Адста ворьгодемась» мужествань уроксь, кона лемтьф Советскяй Союзонь Геройть М.П.Девятаевонь и сонь ялганзон подвигснонды, и лия оцю и ёмла мероприятиятне и акциятне.

 

Синдедост башка, тяфта жа ётафтфт аф фкя лацонь форматса мероприятият, конат лемтьфт мокшэрзянь поэттнень и писательхнень творчестваснонды и юбилейснонды, мокшэрзянь народонь национальнай культурати, Мордовия Республикать народонзон историяснонды, од поколениятнень военно-патриотическяй воспитанияснонды и ломаттнень ёткса краеведческяй и национальнай литературань лувиень лувксть касфтоманцты.

 

Лиякс мярьгомс, аф ваномок пандемиять лангс, Саранск ошень П.С.Кирилловонь лемса краеведческяй библиотекась аф ащи ширеса эряфть эзда и мольфтьсыне тевонзон пингть вешфксонзон коряс.

 

Кепотьксонди, кда мартть пенцты молемс, мзярда ладяфтольхть ограничениятне, пцтай сембе мероприятиятнень ётафнеськ аньцек библиотекань залса,  апрельста ни сявомок лувихненди синь ушедсть пачфневома онлайн-форматса и интернетонь лия ресурснень вельде. Тяфтама работась няевиста касфтозе библиотекать аудиториянц. Сяс, мзярда валхтовихть сембе ограничениятне и библиотекась тага кармай ётафнема мероприятият лувихненди тязк, сембе ня мероприятиятне сяка кармайхть няфневома онлайн-форматса. Сяс мес эряфсь тячи няфтезе: тяниень пингонь цифровой информационнай технологиятнень вельде библиотекань тефне латцевихть пингть вешфксонзон коряс.

 

—Башка, Нина Михайловна, пара улель кулемс библиотекать ся работанц квалма, конань вельде тинь ёратада шарфтомс лувиень мяльхнень-ванфнень мокшэрзянь литературать и национальнай культурать лангс?

 

—Афкукс, мокшэрзянь литературать, национальнай культурать, мокшэрзянь народть историянц, коензон, национальнай щамонзон и духовнай, и материальнай культурань лия козяшинзон од лувихнень ёткса сяда содафокс тиеманкса П.С.Кирилловонь лемса библиотекась эрь кизоня ётафни оцю работа. Сембе вдь шарьхкодьсаськ: кда минь, мокшень и эрзянь эряфкшу поколениясь, тячи аф пачфтьсаськ од поколениятненди мокшэрзянь национальнай козяшиньконь, ванды сон  ни юмай ёфсикс.

 

Кирдемок тянь мяльса, библиотекасонк, 2015 кизоста сявомок, сембе работась мольфтеви «Наследие» Республиканскяй программать вешфксонзон коряс. Инь оцюфне эздост—тя мокшэрзянь национальнай литературать и культурать сяда содафокс тиемасна сембе поколениянь лувихнень ёткса, а тяфта жа од поколениянь ломаттнень ваймоса синь инксост гордостень касфтомась.

 

Ня и «Наследие» программань лия вешфкснень эряфс ётафтоманкса П.С.Кирилловонь лемса библиотекаса пцтай эрь ковня ётафневихть творческяй васедемат мокшэрзянь поэттнень и писательхнень, Национальнай драматическяй театрань артисттнень, войнань и трудонь ветераттнень, Мордовиянь лия содаф ломаттнень мархта, конатнень инкса республикась маряй афкуксонь гордость.

 

Тяфта жа пцтай эрь ковня библиотекаса панчсевихть национальнай литературань, промыслань и ремеслань, костюмонь выставкат, конат пандемиять ушедомда меле, лувихненди няфневихть онлайн-форматса. И, кода няфнесы мониторингсь, лувихнень лувкссна, конат ваныхть мероприятияньконь эса интернет-ресурснень вельде, эрь недяляня няевиста касы. Койсон, тя фактсь корхтай тевоньконь цебярьста тиеманц квалма.

 

—Кода содаф, странаса сай кизонь апрельста арьсеви ётафтомс Населениянь Всероссийскяй переписсь. Сяс ёран кизефтемс: кодама работа срхкси ётафтомс переписьта инголе П.С.Кирилловонь лемса краеведческяй библиотекась эсь лувиензон ёткса  синь гражданскяй и национальнай самосознанияснон кеподеманкса?

 

—Лувиеньконь гражданскяй и национальнай самосознанияснон кеподеманкса переписьта инголе библиотекаса, а тяфта жа «ВКонтакте» и «Одноклассники» социальнай сетьтнень эса, коса улихть страницаньке, минь сяда келиста карматама азондома мокшэрзянь народть историянц, сатфксонзон, литературанц, профессиональнай и народнай культуранц квалма.

 

Тяфта жа Населениянь Всероссийскяй переписьта инголе  арьсевихть ётафтомс марстонь мероприятият Финно-угорскяй народонь культурань Поволжскяй центрать,  Мордовиянь Писателень союзть, республикань Национальнай драматическяй театрать, С.Д.Эрьзянь лемса Изобразительнай искусствань и Военнай и трудовой подвигонь мемориальнай музейхнень мархта.

 

Надиян, аф ваномок национальнай нигилизмань и ассимиляциянь    процесснень лангс, марстонь вийса тейнек, кит работайхть республикань национально-духовнай сфераса, переписьта инголе удалай сргозьфтемс мокшэрзятнень национальнай самосознанияснон. И минь народоньке странаса тага кармай Россиянь инь оцю финно-угорскяй народкс!

 

В.Нестеров.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022