Поиск по сайту: 
 

Архив
 сентябрь 
 2020 
пн вт ср чт пт сб вс
 123456
78910111213
14151617181920
21222324252627
282930    

 
 

 

Люди и дела

СЕМБОСА САФТСЫ, ШАЧСЬ—УДАЛАСЬ!

Асу, зрнянь кядь ават эряйхть эрь ошса и эрь велеса. Финцне эздост заняфт авань кядьтевса, лиятне кизонек-тялонек касфтыхть панчфт, тиендемок кудснон, а тунда и кизонда—переснон, пирьфснон эзда афкуксонь оранжереят, конатнень потмоста аш мяльце лисемс. Улихть стапт, конатненди тя или тона творческяй тевти кельгомась сашенды шабакс улемстост, а лиятненди—сяда оцю кизоса. Мекольцетнень ёткс сувси и Татьяна Петровна Утешева, кона вов ни лама киза эряй Темников ошса.

 

 

Шачемас коре тячиень героиняньке Свердловскяй областень Невьянскяй райононь Цементный посёлкаста. Школать шумордамдонза меле тонафнесь Кировскяй Технологическяй техникумса, а меле, 1977 кизоня, распределенияс коре сась Мордовияв Темников ошу. Эряфоньберьф работась банкса кассиркс, а 2015 кизонь февральста сявомок лиссь пенсияс.

 

Но Татьяна Петровна аф сятнень эзда, кие кельгсы тевфтома ащекшнеманц. Зрнянь кядь авась  нинге шабакс кельгозень авань кядьтефнень, сяс сидеста ванондсь кода стай бабац. Меле сонцьке ушедсь стама. Соньге эвондась мялец тонадомс тя тевть, а сяда тов шарфтсь мяль кодамати.

 

«Ушедыне тянь варягатнень и носокнень эзда. Васенце свитерозень кодайне 13 кизоса. Меле ульсть платьят, шальхть, кофтанят. Сембода пяк тя кондястсь, мзярда шачсть идне. Тянивок оцю мяльса кодан, мзярда ули мялезе»,—мярьгсь Татьяна Петровна Утешева.

 

Весть Темников ошень фкя магазину сувамста шкафть лангса Т.П.Утешева няйсь кагодста тиф акша оцю локсти. Сон салазе героиняньконь мяленц: мезьста тиф, кода? Тяфта, интернетть вельде, Татьяна Петровна содафтсь модульнай оригамить мархта. И тя кядьтевсь сяшкава сувась ваймозонза, нльне пингонь ётазь, кудсонза эвондасть оригамиста  поделкат, ламотнень эздост авась казезень ялганзонды.

 

Модульнай оригамида башка, Татьяна Петровна тонадозень газетаста изделиятнень. Сон пяк дивандась и кенярдсь, што каготтнень-газетатнень эзда ули кода кодамс кудъёткса эрявксни изделият. Тяни газетаста кептернянь-мезень кодама тонафнесы уноконянц.

 

Штоба няфтемс героиняньконь кядьса тифонзон мазышиснон, пуроптомс синь марс, 2015 кизоня сентябрьста Темников ошень Краеведческяй музейса тифоль «Души прекрасные порывы» лем ала выставка, коса няфтьфтольхть Татьяна Петровнань мялень салай мазы работанза.

 

Сяка кизоня ноябрьста асу авась васенцеда примась участия «Шумбрат, Мордовия!» Народнай творчествань республиканскяй фестивальса, коса казьфоль «Кагодонь пластинка» номинацияса лауреатонь дипломса.

 

Сяда тов, морафтомать  ширенц кирдеманц инкса, Т.П.Утешева работанзон няфнезень «Библионочь-2016» пуромксса.

 

Кода кагодста можна тиемс тяфтама мазыши? Кагодонь илить вельде. Колганза арьсян, кулендсть аф сембе. Но сон ули. Кагодонь ились аф касы, аф тиендеви завоттнень эса, сонь аноклама эстейть, кядьса. Газетань  кагодсь марсеви 8-10 слойс и кемоста ашкоряви. И тя тевса эряви маштомоши. Аф эрти сафтови тя тевса. Трубканясь, кона лиси, и арай кагодонь иликс. Кой-коста теенза тиендеви обработка специальнай составса, эста сон ули кеме, калгода, ламос саты.

 

Татьяна Петровна вов ни лама киза заняф кельгома тевонц мархта. Эвондасть творческяй маштомошинц кельгиенза. 2016 кизоня сон выставканц мархта тага ульсь «Шумбрат, Мордовия!» Народнай творчествань республиканскяй фестивальса. 2018 кизоня «Шумбрат, Мордовия!»—«Vivat, Чемпионат!» фестивальса сон Мордовия Республикань Культурань, национальнай политикань, туризмань  и архивнай тевонь министерствать дипломонц мархта отмечафоль «Оригинальная техника» номинацияса.

 

Сатфть лангс Татьяна Петровна аф лоткси. Изделиянзон лувкссна касы шиста шис. Тяфтапнень колга корхнихть: сембоса сафтсы, шачсь—удалась!.

 

Т.Альшина.

 


31.07.2020 №29
 
 
 

 
НОВОСТИ

КАСОМАНЬ И ВИИЯМАНЬ КИГЕ

25.09.2020
 
 
 
 

ТЯЧИ—МИНЬ ШАЧЕМА ШИНЬКЕ!

24.09.2020  № 37
 
 
 
 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин