Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Люди и дела

Виктор Добронравов: ЛОМАТТНЕ НЯЙСАЗЬ ФОТОГРАФИЯЗЕНЬ И ЮВАДИХТЬ «ЛЕЗДОДА!»

Виктор Добронравов, РФ-нь Народнай артистть Фёдор Добронравовонь цёрац, мяляфтовсь тейнек нинге «Не родись красивой» сериалть коряс. Тячи фильмографиясонза кемотть киноработа, тяконь лувксса «Т-34», «Солдатик», «Горюнов» и лия картинатне. Курок ваныхне няйсазь сонь участиянц мархта «Стрельцов» спортивнай драмать. А меле—«Огонь» приключенческяй кинолентать, «Грозный» историческяй сериалть и «Сваттнень» од сезонцнон, конань эса Виктор налхкозе алянц персонаженц Иван Будьконь одста.
—Виктор, кочксемок рольхть, мезть лангс шарфнят мяль?
—Штоба фалу кати-мезсь салаль мяль. А уленди, што салай мяль сембось, сценарийста сявомок режиссёрти молемс. Кода, кепотьксонди, лиссь «Т-34» фильмать мархта, коса сембе ширде ульсть аньцек плюст: режиссёрсь, материалсь, партнёрхне, рольсь… Но уленди и лиякс. Кепотьксонди, лувсак сценарийть и шарьхкодьсак, што сон цебярь. А вов режиссёрсь—аньцек-аньцек тевонь ушеткшни… Но вдь сценарийсь цебярь! Или, меколанкт, сценарийсь аф пяк удалаф, но режиссёрсь пяк цебярь и партнёрхне содасазь эсь тевснон. А уленди, што цебярь режиссёрсь, а сценарийсь лафча, аф верондафты, но рольсь мялень салай…
—А кодама рольхне мялезт?
—Разнайхне. Тейне, павазонди, мзярс удалси налхкомс разнай рольхть ламоц жанратнень эса. Мон ванан сянь мельге, штоба синь улельхть лама планонь. Тядде лиси лама проект, конатнень эса приман участия. Тя и содаф футболистть колга «Стрельцов» фильмась, коса налхкса главнай геройть соперниконц, и «Пальма»—цёранять и пинеть ёткса ялгаксшинь историясь, и «Грозный» историческяй оцю проектсь—оцязорть Иван Грознаень колга, конань эса налхки лама содаф актёр. Мон налхкса оцязорть опричниконц. Нинге тядде, улема, лиси режиссёрть Захар Прилепинонь романонц коряс Александр Велединскяень «Обитель» фильмац. А Од кизонь карша лиси Александр Нужнаень «Огонь» фильмац—пожарнайхнень колга. Тя ули российскяй вии блокбастер.
—Актёронь профессиясь веши лама вий, кода меле синь мрдафнесайть  и ваймосят?
—Ну, мон вдь аф васенце кизось тя профессиясан. Штоба валхтомс эмоциональнай сиземать, якан бассейнав или спортзалу.
—Тонатф кизефкс актёрти: мезсь тейть сембода мала—кинось или театрась?
—Сяда мала театрась, сяс мес сон эрек, тяса лия энергетикась. Театраса кочксят опыт, а киноса сонь эстокиге ноляма тевс. Кда ашеть работа театраса, ашеть налхка разнай режиссёрхнень видеса разнай жанратнень эса комсь роль, тейть ули стака киноса. Аф саты опытсь, штоба курокста эцемс лия рольс, сявомс и налхкомс. А мзярда фалу тянь мархта заняфат, лафтуфнень фтала улихть ни кой-кодама работат, налхкомс ламода сяда тёждя.
—Тонь тернедязь работама телеведущайкс?
—Мольфтень «Культура» каналса передачань цикла художникнень и синь модельснон колга. Но телевидениясь—аф монь жанразе, тейне ульсь стака и аф тонатф. Тернемазь нинге кати-кодама программань вятема, но мон атказакшнень.
—Касыхть кафта стирьхне—Варвара и Василиса. Мес теест максфт шуроста васьфневи лепт?
—Аф сяшкава синь и шуростоннет. Афкуксонь, рузонь лепт. Мзярда стиреньконь лемдеськ Варваракс, ламоль ни тяфтама лем мархта стирняда. Лемонь кочкамась—тевсь аф тёждятнень эзда. Вов шачи ломанць, и ванат—шарфты сон Варварань лангс или аф?.. Или алясь ёрай фкя лем идти максомс, а тядясь—лия.
—Кда шабатне кочкасазь тонь профессияцень, кирдьсак ширеснон?
—Кда кочкасазь синць, тя ули аф монь инксон. Кода мяльсна. Но театрав ускомост аф карман.
—Стирьхне касыхть кулхцондыкс?
—Коста кода. Афолень мярьге, што синь шёлковайхть. Но эряви мушендомс марстонь кяль. Вдь иттне касыхть, полафнихть.
—Колмоце шабать аш мяльце водендамс? Цёранять?
—Мялезе! И аф ёран лотксемс сатфть лангс. Цебярь ломаньда улеза лама!
—Виктор, кудце кирди аньцек рьвяцень лангса, или тон теенза лезнят?
—Сембось кирди сонь лафтувонзон лангса. Но арьсян, тя лац. Тяфта ни ладявсь историяса, што рузонь алясь или войнаса, или охотаса. Или добувай ярхцамбяль, или араласы Родинать. Мон добуван ярхцамбяль! И мзярс нинге тянь тиендьса маштозь. Но мзярда кудсан, аф нюрьксян диванть лангса сюлека пива мархта. Лезнян рьвязти. Рьвяяфокс, рьвакс туфокс улемась—работа. И тя аф тёждя тевсь. Мзярда няят павазу эряфкшу ломатть, конат марса ётазь марнек эряфть,—тя аф корхтай сянь колга, што синь марнек эряфсна цебярель и туцяфтомоль. Тя корхтай сянь колга, што сембе стакатнень-сталмотнень синь ётазь марса.
—Мзярда мекольцеда виденцякшнеть рьвяцти кельгомаса, казендеть панчфт?
—Виденцякшнян эрь шиня. А вов панчфнень мархта сяда стака, сяс мес синь фалу кудсонк, эздост лама. Тиендян рьвязти романтическяй поездкат кафоненк. Аф кунара улеме Португалияса, коза кунара ёраме молемс.
—Тонь аш кода лемдемс социальнай сетень пользователькс. Афкукс аф лувондсак сянь, мезе тяшнихть «Инстаграм» страницасот?
—Мон, улема, дивандафття, но мон ашан социальнай фкявок сетьса. «Инстаграмсан» сяс, што рьвязе фотограф, сон тиенди профессиональнай мазы фотографият, и тя сембось инксонза. («Инстаграмть» специализацияц—фотось и видеось.-Ред.) Но монь аш мялезе эрямс социальнай сетьтнень эса—тя сяви лама пинге и вий. Весть нльне улень малакс сянди, штоба нардамс страницазень, сяс мес сон арась лезксонь анамать колга аф лоткси ювадемакс. Мзярдовок ашень атказакшне лездомс, но, простямасть, сембонди аф лездоват, тя аф тиеви! Улихть фонтт, конатнень мархта кунара кирдян соткст, улихть итть, конатненди лезнян,—нят содафонень и ялганень шабасна. Аф кунара сувань «География добра» благотворительнай фондть попечительскяй советозонза… Но тинь аф содасасть, мзяра ломань сашенды лезксонь анама, мзярда тон интернетса няфтить фотографияцень! Ответонди тяштихть: «Лездода!» И мон лувондса прязень муворукс, што ашень лезда. Мзярда ванондсайть страницатнень, то эрь фотографиять ала кемоньксть и нльне сядоксть анайхть кядьстот лезкс. А нинге сидеста сашендыхть содафокс арамать колга мяльхть и нльне провокация мархта сёрмат…
—«Стрельцов» фильмаса налхкат футболист. А эряфса налхкат футболса? Или тонь ули кода лемдемс футбольнай болельщикокс?
—Футболти шарфнень мяль шабакс. А тяни кизотне аф сят, да и аш мзярда: съёмкат, спектакльхть, семьясь. Инголи пяк лама налхкондонь баскетболса. А вов аф кунара ялгане тердемазь залу кирпицень тюсса топ мархта ласькондема—и тоса, ули кода мярьгомс, такор васта лангса, сязине «ахиллть»… (ахилловай коське сан кочкярять лангса.-Ред.) Сяс мес тейне аф комсь киза ни, а курок нильгемонь! Оцю мяльса ванондан футбол, но мзярдовок ашине кирде мокшенданень тя или тона командать инкса. Фалу мялезон ванондомс мировой первенстватнень мельге. Ванан «Арсеналть», «Ливерпульть», «Манчестер Юнайтедть», «Бавариять» налхкомаснон мельге… И мзярда, кепотьксонди, васьфни испанскяй классикась—«Барселонась» и «Реалсь»—тя салси мяль.
Кизефнесь
Александр Герасимов.

03.08.2020 №
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин