Очижись Мокшень Ювня велеса

Кунардонь пингста сявомок мокшетненди инь кельгови илакс ульсь Очижись. Теенза аноклама ушеткшневсь ламода тяда инголе. Тячи азондсаськ, кода васьфнезь-ётафнезь тя илать Торбеевскяй райононь Мокшень Ювня велеса, а лезды тейнек тянь эса МР-нь культурань Заслуженнай работниксь, велень клубть вятиец Лариса Ивановна Аргузова.

—Очижити анокламась велесонк фалу ушеткшневсь кудботмотнень аруяфтомаста. Тянди ломаттне кярьмотькшнесть Масланцяда меле эстокиге. Васендакиге валхневсть и муськондевсть занавескатне, сембе васта лангаксне, покрывалатне, щапне, шташендовсть пильгс щаматне. Кядьготнень, мяляфтса, тядязень мархта  шовсеськ кирпицьса, вдь крксеманди специальнай пролопт и штамань средстват,  кодамда тяни пефтома, эста ашельхть. Муськопнень муськондеськ кядьса, а оргаляськ синь шудерькскятнень эса, конат шудесть велеть эзга тундань шадотнень пингста.
Сяльде пурса акшепневсть пянакуттне-голландкатне, да аф весть, а ламонь-крда, штоба тюссна улель сельмонь педи акшекс.
Тяда меле арудонга аруста шташендовсть кияксне. Эста синь аф архтфтольхть. Кияксонь седяфнень велеряйхне кркселезь кие мезьса маштсь: пеельса, узерьса, каймоса. Тяда меле киякссь арсесь тюжаза-мазы тюсоннекс.
Недяляда Очижида инголе од стирьхне группань пуромкшнесть велепети и морсекшнесть фкя-фкянь каршес сиде мороня лаца нюрьхкяня моронят.
Да-ли-ли, да-ли-ли
Дали кие, ва кие (кафксть)
Дали Кузьмань Ольганясь
                                (кафксть).
Кудынголе шава (кафксть)
Ольга оцю шама.
Тяфта морась васенце группась. А омбоцесь, бта кяжиязь, отвечсесь:
Да-ли-ли, да-ли-ли
Дали кие, ва кие (кафксть)
Дали Федянь Марюнясь
                                     (кафксть).
Лата фтала тинге
                                  (кафксть)
Марю ширем пильге.
Чистай Шуваланяста шобдаваста сявомок велеть келес срадондсь крхтамань шиненя. Тя эрь кудса печксть тува Очижити, а крхнелезь шужярь потмоса. Меле пицесть шяняпт, тернелезь ярхцама радня ломаньцнон.
Ёткшиста ушнесть банят. Эздост велеса аф сяшкава ламоль, сяс пуромкшнесть колма-вете семьянь и ушнесть фкя баня сембонди. Тяка шиня архневсть Очижинь алхне. Илять, шоподемшовор, Мокшень Ювнянь эряйхне шарондозь эсь кудснон, куд пирьфснон пси кшиса и палы ладанца.
Очижинь веня, минь, шабатне, мяляфтса, пцтай ёфси ашеме утце. Аньцек аськолдаль частонь стрелкась кемгафтува частть вельхкска, эстокиге срхксеме алалама. Кажнайсь старандась сувамс васенцекс, вдь васенце сувайти, алда башка, кудазорхне нинге макссесть сахар покольня.
И вов сашендсь сонць валда илась—Очижись. Шобдава велеряйхне яксесть калмалангс, а обедта меле щашендолезь эсь кядьсост стаф мокшень щамснон, аноклакшнесть шрат. Шратне сидеста латцевсть ульцяса, вальмала, сяс мес куттне аф оцюфтольхть, а эрясть эсост оцю семьянь, да нинге инжида пуромкшнель лама. Мокшаватне пицесть суронь пачат, цёмарат,  лофцонь ям, ряснесть сиволь мархта модамарьхть, тиендсть шову поза. Гуляндакшнесть-весялготкшнесть недяляньберьф, морсесть мокшень морот, сиде моронят, кштикшнесть гармониять корява.
Очижинь мекольце шиня велеряйхне лисенкшнесть веле пети, панда пряв, илать прважама. Тяса кштикшнесть-морсесть илядьс, гармониять  вайгялец сетьмосесь аньцек шоподемшовор.
Л.И.Аргузовать валонзон коряс, Мокшень Ювняса лама мезсь ванфтовсь кунардонь пингонь койхнень-обуцятнень эзда, тяконь лувксса Очижить васьфтемста. Виде, тядде илась велеса ётась сетьмоста. Коронавируснай инфекциять сюнеда велеряйхне ащесть кудга, инжикс фкя-фкянь пяли ашесть яка. Но семьянь келеса праздниксь ингольцекс васьфтьфоль эрь кудса.
О.КОЛЕДИНОВА.