Торжественнай собраниясЬ лемтьфоль Строителень шити

Пяденцяста, 7 августста, Мордовия Республикань Оцюнясь Владимир Волков онлайн режимса примась участия торжественнай собранияса, кона лемтьфоль Строителень шити и, кона ётафтовсь Республикань Кудса. Региононь руководительсь пшкядсь традицияс коре ётафневи мероприятиянь участникненди поздравлениянь и благодарностень вал мархта.
«Тейне тя праздниксь эсь лацонне. Ваймоса мон улень и лядондан строителькс. Кизонь кофнень стройкатнень эса мон ётафнян сяда лама пингта рабочай кабинетть коряс. Самай стройкаса маряви созиданиянь афкуксонь вийсь, пяшкотькшневи задачатнень афкуксонь масштабсна, няеви эсь работацень конкретнай результатоц. Сяс седи ваксста поздравляндатядязь тинь и тинь коллегантень минь марстонь праздниконьконь—Строителень шить мархта!»
Республикань Оцюнясь китькстазе, што Мордовиянь строительхне лац и сатфксонь сатнезь покодсть пандемиять каршес тюремань стака пингть, тисть больницятнень, поликлиникатнень, обсерваторхнень оборудовандамаснон коряс работань оцю объём.
Нюрьхкяня пингста панчфоль пцтай 2 тёжятть инфекционнай койка-васта, ветексть сяда лама арьсефть коряс. «Ковидса» сярядихнень пчкафтоманкса полафтфоль 17 пчкафтомань учреждениять профилец или эрь колмоце больницясь республикань райоттнень пялеснон эса. Строительхненди сашендовсь латцемс инженернай сетьтнень, кожфонь максы оборудованиять, мельцеровскяй бокснень, пяшкотькшнемс лама од задача. И тя стама условияса, мзярда макссевсь аф лама ши, а сяда лац азомс, част. И строительхне пяшкотькшнезь инголест путф задачатнень курокста, профессиональнайста. Марса тейнек удалась сяськомс стака ситуациять. Кизоть васенце пяленц итогонзон коряс, республикаса строительнай работатнень объемсна ётай кизоть коряс кассь 8 процентта и  лувондови 8 миллиартт цалковайса.
Тя оцю сатфкс. И, эряви азомс, тя результатсь сатф пандемиянь условияса, мзярда экономикась васедсь лама стака-сталма мархта. Тяни республикань стройплощадкатнень эса ситуациясь ащи контроль ала. Инфекциять келемомац апак нолдак.
Пандемиянь условияса виияфтомань драйверкс арасть национальнай проекттне. Тядде синь эряфс ётафтоманксост нолдави пцтай 17 миллиард цалковай, арьсекшневи пяшкодемс 120 лама объектса строительствать и ремонтть коряс работатнень.
1 сентябрьста панжеви 140 вастонди од школась Торбеевскяй райононь Дракино велеса, очередьса Лямбирскяй райононь Аксенова велеса школась. Тяфта жа сувайхть стройс идень несколька сад: Ялга поселкаса, Дубенкаса, Белозерьяса, Ардатоваса, Рузаевкаса.
Оцю проектт ётафтовихть эряфс здравоохраненияса. Тядде панжевсь идень од поликлиника Химмашса, аделаф оборудованияса пяшкодемац поликлиникать «Юбилейный» микрорайонца. Васенцеда лама кизоста республикаса строяф оцювонди отдельнай поликлиника.
Майста ушетфоль важнай объектонь строямась—Идень республиканскяй больницять од хирургическяй корпусонц строямац, конань питнец 2 миллиартта лама цалковай. Аделсеви онкодиспансеронь поликлиникать строямац, кона панжеви сай кизоть.
Ашезь лоткафнев республикаса и производственнай инфраструктурать виияфтоманц коряс работась.
Вишкста строявихть и велень хозяйствань комплексне. Кепотьксонди азома Дубенскяй районца 6,5 тёжянь фуражнай траксонди молочнай комплексть оцю стройканц, кона арай фкя инь оцюкс Россияса (проектть марстонь питнец пцтай 6 миллиартт цалковай).
Тяда башка, тядде Ковылкинскяй районца шумордави «Талина» компаниять животноводческяй комплексонц колма корпусонзон строямасна. Эрть эса арьсекшневи касфтомс 100 тёжянь тува (комплекснень строяманкса нолдаф 5,5 миллиард цалковай инвестиция).
Шумордама лангса Краснай Сельцоса 1000 фуражнай траксонди молочнай комплексть одкстоптомац.  Сяда тов мольфтеви «Рузово» заводса производственнай од корпусть строямац. А сентябрьста нолдави тевс Кадошкинаса од тепличнай комплекссь.
Корхтамасонза Владимир Волков лоткась оцю задачатнень лангс, конат арьсекшневихть «Безопасные и качественные дороги» нацпроектть коряс.
«Тядде минь тихтяма ремонт ётай кизоть коряс сяда лама кинди—165 вайгяльбеда ламоти. Китнень строямаснонды нолдави 6 миллиартта лама цалковай, тяконь лувксса 4 миллиартт цалковайсь БКАД нацпроектть коряс. Сяда тов объемпне кармайхть касома. Кепотьксонди, сай кизоня республикаса тиеви ремонт 265 вайгяльбень кувалмоса кити».
Владимир Волков мяль шарфтсь сянь лангс, што, аф ваномок коронавирусть лангс, ашезь лоткафнев территориятнень благоустройстваснон коряс работась. Сай кизоть пенцты республикаса кармай капитальнайста тиф ремонт лама квартирань 720 кудти, благоустройства тиеви кемотть муниципальнай образованиянь 200-та лама куд перьфонь и общественнай территориятненди.
Региононь руководительсь азондсь и сянь колга, што нацпроекттнень коряс одкстопневихть и ваймамань зонатне. «Меля минь одкстоптоськ паркнень Атюрьеваса, Оцю Березникаса, Ромодановаса и Инсарса, а стане жа Темников ошса историческяй пяльксонцты».
Владимир Волков ашезень ёта вакска и прябалань кизефкснень, тяконь лувксса эряма вастонь строямать мархта сотф сфераса. «Тя рынкась инь пяк марязе пандемиять инкса лисьф прябалатнень. Тядде республикати эряви строямс 360 тёжянь квадратнай метра эряма васта. Работань объемпне азфт, и тя кизонь платтнень эрявихть пяшкодемс».
«Тейнек эряви сембе вийса нолдамс тевс сембе возможностеньконь «Жилье и городская среда» национальнай проектть, од семьянь и велень ипотекать, а стане жа 6,5 процент алу льготнай ипотечнай программать, кона нолдаф Россиянь Президентть решениянц коряс, пяшкодемаса»,—мярьгсь Мордовиянь Оцюнясь.
Азфоль, што ня шитнень странань Правительствась кирьфтазе ипотекать коряс васенце взносонь максомать 15 процентс. Тя тёждялгофтсы од семьятненди, од специалисттненди, ломаттненди, конатнень ёмлат доходсна, льготнай ипотекань сявомать. Республикаса 6,5 процент алу льготнай ипотекати ули вешфкс. Апрельста ушедомок максф тянкса 800 заявка. Пяле миллиард цалковаень питнес 265 ипотечнай кредит максф ни.
Велень ипотеканди тячиень шити банкне ванондыхть 400 кредитонди  заявка, эздост 190-ць 250 миллион цалковаень питнес, максф ни. Но региононь руководительсь лувондсы, што кредитованиянь ня объемпне аф оцюфт, инь пяк минь республиканьконди, коса населениять 40 процентоц эряй и трудендай велеса.
«Тейнек эряви строямс велетнень эса сяда лама. И тяса ламось ащи сянь эзда, кодама решения муйхть минь строителеньке марса Правительствать и Строительствань министерствать мархта».
Владимир Волков эсь выступлениясонза отмечазень предприятиянь коллектифнень, конат сатнихть оцю сатфкст эсь работасост. Нят «ДСК», «Мордовдорстрой», «Саранскстройзаказчик» холдингсь, «Анелия», «Транс-Север», «МАПО-Транс», «Строитель», «ЭкоЛайф», «Ремстрой», «СМУ-27», «Мордовавтодор», «Мостострой», компаниятне и ламотне лиятне.
Тяфта жа строительхнень  лямбоста поздравляндазь профессиональнай праздникснон мархта МР-нь Правительствать Председателец Владимир Сушков, Правительствать Председателенц заместителец—строительствань, транспортонь и дорожнай хозяйствань министрсь Виктор Цыганов.
Строительнай отраслянь инь цебярь работникненди торжественнай церемонияса максфтольхть оцю казнет.