Мокшалясь Н.Н.Пиксин макссь од эряф Даньшино шачема веленцты

Пензенскяй областьса улендень аф весть, а вов Белинскяй району пачкодень васенцеда. Сяс ардомста дивандакшнезь ванонь «Мерседес» автобусть вальмаванза, кеняртькшнень перьфпяльть мазышинцты. Пефтома паксят, вирьхть, лугат, финц веленятнень полафнезь омбонцне. И вов панда пряста няевсь Даньшинась. Крутаста пувордай кить эзга валгомста афи арьсень няемс сянь, мезе тяса стясь  сельминголен.
…Историянь лопанятненди варжакстозь содави, што Даньшино мокшень велесь пуроптфоль 17 векть кучкаста. Советскяй пинкнень тяса эрясь 1,5 тежянь ломань. Велеса ульсь колхоз, школа, идень сад. А меле Даньшинать мархта тиевсть полафткст, конат лиссть Россиянь ламоц лия велетнень мархта: сон ушедсь коль сяда и сяда кирема, ломаттне тушендсть эряма ошу-коза. И кие содасы, шять, тя пингс велесь лядоль аньцек лятфнемаса, кда аф мокшалясь Николай Николаевич Пиксин, кона ашезе када юмама-арама шачема уженянц.
Николай Николаевич касозе серенц Даньшинаса. Пикситтнень сисем шабаснон ёткста сон ульсь мекольцесь. Аляц, Николай Михайлович, пенсияс тумозонза работась механизаторкс, тядяц, Екатерина Николаевна, трудендакшнесь дояркакс. Сембе шабаснон полатне касфтозь трудонь кельги ломанькс, тонафтозь фалу улемс видешить ширеса, арьсемс пара лиятненди, аф юкснемс эсь юрснон. Даньшинань школать шумордамда меле Николай Николаевич тонафнесь Москуса, коса М.В.Ломоносовонь лемса МГУ-са сатозе  юристонь специальностть. Сяльде  тонафнесь Германияса, аделазе тоса магистратурать, ётась практика,  мезьда меле тостонь ялганза тернезь лядомс работама эсь ширесост, но Николай Николаевич мрдась Россияв. «Германияса ули кода получамс  цебярь образования, лац ваймосемс, но аф стак корхнихть: «коса шачсь, тоса и кондястсь». Ломанти эряви тиемс семботь, штоба сонь виенза, профессиональнай маштомошинза кондястельхть эсь родинасонза»,—тяфтамот мяленза-арьсеманза Н.Н.Пиксинонь. Тячи Николай Николаевич работай Москуса. Сон пяк цебярь адвокат, сонцень адвокатскяй бюроц.
Кода-бди весть газетаста мокшалять сельмос повсь «Велетне юмсихть» лем ала статья. Сёрматфсь токазе мянь седи куцюнянц. «А вдь моньге велезень учендсы тякось, кда мезьге аф тиемс сонь ванфтоманксонза»,— арьсесь Николай Николаевич.—Аш, аш кода нолдамс сянь, штоба вастсь, коса мон шачень-касонь, коса кяпе ласькондень расаса поксордаф тишеть ланга, эшелякшнень ляйса, кунцень калхт, юмаль странаньконь картаста». Ся пингста сявомок мокшалясь путсь эсь инголенза цель—тиемс семботь, штоба емла родинац эряль, и кярьмодсь тевс.
Васенцекс петьфоль-тифоль Пикситтнень тядянь-алянь кудсна. Каршесонза, ся вастса, коса инголи ащесь Николай Николаевичень  атянц кудняц, строяфоль од, тяниень пингонь особняк, кода лемнесазь синць Пикситтне, родонь-плямань пизосна. Сембоц 2010 кизоста сявомок 2015 кизоти молемс тяса строяфоль комозьда лама объект. Етксост инжиень примама куднят, спортзал, мокшэрзянь костюмонь музей, однопрестольнай церькав, народнай кштимань куд. Церькавть, кепотьксонди, Николай Николаевич строязе тядянц лемс, кона ульсь Шкаенди верондай ломанькс и пяк кельгозе святойть Николай Чудотворецонь. А кодама мазыста тиф тяса перьфпяльсь! Аф стак туристтне лемдезь тя вастть «Райскяй поместьякс». Афкуксонь ефксонь уженя. Аньцек аф фкя лацонь касыкста тяса сядот. Повомок тяза васенцеда нльне абондат: оцю паксява сетьмоста якайхть сярттне, зубратне, косулятне, верблюттне, сей-тов лиендихть беркуттне, филиттне, улихть нльне павлитт и индийскяй каркт. Тя мазышить ванома сидеста сашендыхть шабра велень шабатне, конатненди Николай Николаевич сонць ётафни экскурсият. Аф шуроста улендихть инжихть лия региоттнень эзда и нльне омба масторста: США-ста, Германияста, Австрияста, Швейцарияста и лия вастста.
Кода виденцясь сонць Николай Николаевич, эреклафнемок веленц, сонь мялецоль ванфтомс мокшэрзянь козя культурать, койхнень-обуцятнень, илатнень. Тянь мяльса кирдезь эвондась «ДаншиноFest» историко-культурнай фестивальсь, кона эрь кизоня пуропни Даньшинав аф фкя тёжянь ломань. Сон ётафневи Тройцянь шиня. Тяза сашендыхть мокшет, эрзят, а стане и лия национальностень ломатть странань ламоц уженятнень эзда. Аф васенце кизось ни Даньшина велеса, стане жа Н.Н.Пиксинонь мяленц коряс, ётафневи Мокшэрзянь модань шись. Тядде сон кармай 28 августста. Тя илась тяфта жа пуропнесыне кяльс коре радняньконь Россиянь ламоц региоттнень эзда. Мокшэрзянь морамань культурать ванфнеманкса Даньшинаса пуроптф эсь хорсна, коса эряфкшу аватне морсесазь кунардонь пингонь мокшень моротнень.
Тячи Н.Н.Пиксин лама пинге ётафни Москуса, коса сон работай, а ваймама шиста эряскоды Даньшина шачема велезонза, коза фалу уски седиец. Тяса сонь учендсазь аляц, цёранза–Дмитрий и Геннадий, лия мала ломаненза. «Шачема велезе– эряфсон инь оцю кеняртьксозе. Аньцек тяса маряса прязень афкукс павазу ломанькс, юкснян эряфонь стакатнень-сталмотнень колга, пуропнян вийхть»,—азозе Николай Николаевич.
Н.Н.Пиксин цебярь пример сянди, мзярда ломанти васенце вастса ащи аф козяшинь пуроптомась, а пара тевонь тиендемась, мзярда седись палы шачема масторти оцю кельгомаса. Тянди сонь тонафтозь тядянза-алянза, тякоти сон тячи водендакшнесыне эсь идензон.
Лама шнамань вал азфоль Пиксин ялгать лемс Мордовскяй (мокшень и эрзянь) народть Межрегиональнай общественнай организациянц Исполкомонц Президиумонц заседаниянц пингста, конань вятезе организациять председателец Ю.А.Мишанин. Пуромксса, конанди вятикс ульсь МР-нь культурань, национальнай политикань и архивнай тевонь министрть васенце заместителец А.И.Карьгин, Мордовиянь делегацияда башка примасть участия представительхть лия региоттнень эзда, коса эряйхть мокшэрзят. Нят: Сургут ошень Мокшэрзянь культурнай обществать председателец Г.С.Наркаев, «Мордовский национально-культурный центр «Шумбрат» Саратовскяй региональнай общественнай организациять председателец В.И.Кривошеева, «Ульяновская областная мордовская национально-культурная автономия»  общественнай организациять председателец В.А.Софонов, «Областной центр мордовской культуры» Пензенскяй региональнай общественнай организациять председателец Е.В.Бакалова и лиятне. Шинь повесткати сувафтф кизефкснень ёткста васенцекс корхтафоль велетнень этнокультурнай виияфнемасост меценатствать вастонц колга, мезти цебярь примеркс ащи Даньшинань мокшалясь Н.Н.Пиксин. Заседаниянь участникне азондсть, кодама работа вятихть синь тянь ширде и целайнек мезе тиендеви синь регионцост национальнай культурать, койхнень-обуцятнень ванфтоманкса. Тяда меле Ю.А.Мишанин пачфтезе сянь, што «Шумбрат» национально-культурнай праздниксь, кона арьсекшневсь ётафтомс Саранскяйса 5 сентябрьста, коронавируснай инфекциять сюнеда кантф лия пингс. Сон ётафтови «Шумбрат, Мордовия!» Народнай творчествань республиканскяй фестивальть пингста. Кода содаф, фестивальсь моли пцтай колма кофт, сяс региоттненди ули мзярда няфтемс эсь коллективснон творчестваснон.

О.Евдокимова.