Великай Отечественнай войнань участникть, мокшалять С.И.Алямкинонь лемоц сувафтф народнай альманахти

Аф кунара Москуса тифтольхть итокт «Незабытые истории Победы» народнай альманахти историятнень конкурсснонды. Жюрись, конанди сувсесть Россиянь Геройхть, и вяре азф конкурсть оргкомитетоц кочказь межнациональнай ялгаксшить, фкя-фкянди лездомать и героизмать колга, конань няфтезь разнай национальностень представительхне Великай Отечественнай войнать пингста, инь мялень салай историятнень.
Моску ошень, лия ошень и региононь эряйхне кучсть эсь радняснон—Великай Отечественнай войнань участникнень и тылонь труженикнень колга 1022 история. Сембе азксне ульсть архивнай фотография, военнай кизонь документ мархта. Ня материалхне сембе пингс максовсть ванфтомс Россиянь Вооружённай Вийхнень главнай Храмснон, кона ащи «Патриот» культурань и ваймамань Военно-патриотическяй паркть территориянц лангса, «Дорога памяти» Мультимедийнай музейнай комплексть архивозонза.
Тя ульсь торжественнай пуромксса, кона ётась 6 августста Москуса Российскяй Федерациянь Торгово-промышленнай палатаса. Тя пуромксть пингста казьфтольхть сяськи историятнень авторсна. Эрти эздост максфоль изданиять печатнай вариантоц и Диплом.
Пара мяльса азсаськ, што авторхнень-сяськихнень ёткса ули земляконьке—И.Д. Воронинонь лемса МРОКМ-ть Ковылкинскяй краеведческяй музеенц-филиалонц заведующаец, Российскяй Федерациянь Народнай просвещениянь отличниксь, мокшалясь, Старошайговскяй райононь Красный посёлкаса шачфсь Анатолий Иванович Алямкин, конань лемоц, арьсян, пяк лац содаф газетаньконь морафтыензонды.
Анатолий Иванович «Многонациональная победа» проектть мяльса кирдезь, «Незабытые истории Победы» народнай альманахти тяштсь история атянц—Великай Отечественнай войнань участникть, мокшалять Степан Ильич Алямкинонь колга. Сонь азксоц, кода ни азфоль вяре, сувась сяськихнень ёткс. А.И.Алямкин Степан Ильичень квалма материалть анокламста тя тевти водендазе марнек эсь семьянц—брадонзон, стирензон, брадонь идензон… Лиссь мялень салай азкс.
Анатолий Ивановичень атяц, Степан Ильич, шачемас коре Красный посёлкаста, кона васенда канневсь Вертелимскяй, меле— Мельцанскяй, тяни—Старошайговскяй райоттненди. Семьясост ульсть ниле итть. Великай Отечественнай войнать ушедоманцты Степан Ильич Алямкин рьвяяфоль Наталия Егоровна Вельматовать лангс и семьясост ульсть ни вете шабат.
Мзярда С.И.Алямкин сявфоль фронту, теенза 35 кизоль. 1942 кизоня шумбрашинц сюнеда мокшалясь комиссовандафоль и нолдафоль куду. Велеса пяк эрявсть алянь кятть, но Степан Ильич тага тусь аеркс врагть тапама. Цють петезе шумбрашинц, лездсь урядамс 1943 кизонь урожайть и макссь заявления, штоба сонь сяволезь фронту эсь мяленц коряс. И эняльдемац пяшкотьфоль.
Тяфта мокшалясь омбоцеда тусь фронту и арась истребителькс-зенитчикокс. Орудиястонза прафтсь немецкяй вете самолётт.
1945 кизонь 20 апрельста, мзярда кунара учсеф Победати ляткшнесь ёфси кржа, Степан Ильич Алямкин боевой ялганзон мархта панць и тапась врагть эса Заячья Гора велеть маласа. Тоса стакаста ранендафоль мяштьс. Пачфтьфоль госпитали, коса ламос пчксесь.
1946 кизоть ушетксста Степан Ильич Алямкин мрдась куду, поладозе колхозса работаманц. Но стакаста ранендамась макссь эсь колганза содамс и лафчептозе сонь шумбрашинц. Эсь Родинань патриотсь, аф пели мокшалясь тусь эряфста 1949 кизоня.
Великай Отечественнай войнаса участиянь примаманкса Степан Ильич Алямкин казьф «За победу над Германией в Великой Отечественной войне 1941—1945 гг.»  медальса, сон—Славань III степенень орденонь кавалер.
А.И.Алямкин азозе, што сонь и рьванц родстост-плямастост аф кржа ломань воявась Великай Отечественнай войнаса. Ётксост Краснай Звездань  орденонь кавалерсь Я.А.Лашманов, Отечественнай войнань орденонь кавалерсь А.А.Лашманов, «За боевые заслуги» медальса казьфсь Б.Е.Вельматов, Славань III степенень орденонь квалерсь В.В.Ацапкин и лиятне.
Сонць Анатолий Иванович Алямкин 6 августста ётафтф торжественнай пуромксса ашель, но вастозонза ульсть кафта стиренза—мокшаватне Екатерина Анатольевна и Елена Анатольевна. Пароль мялезост, што аляснон  историяц лиссь сяськихнень ёткс и сувась «Незабытые истории Победы» альманахти. И синь марясть оцю гордость аляснон атянц—врагть эзда родинаньконь аралаенц Степан Ильич Алямкинонь и лия радняснон инкса, конат толу-качаму ся кизотнень пингста тюрсть Родинать араламанц инкса  и казезь тейнек Победать.
Поздравляндасаськ Алямкиттнень семьяснон конкурсса сяськомать мархта!
Т.Альшина.