Лама идень касфтыхне—родонь-плямань ванфтыхне

Евдокия Никитична Зарубинать мархта содафтомста-корхнемста, мон бта эсь родной щавазень мархта васетькшнень, конашкава кельги седи и пара вайме тя мокшень бабанясь. Газетаньконь тячиень номерсонза азонттама Зарубиттнень оцю семьяснон колга, коса семьянь коень кирдикс, ваймонь эждикс ащи тядясь, авозсь, бабась и щавась, а стане жа сире бабась (прабабушка)—Евдокия Никитична.
Уноконц, Марина Шпелёвать валонзон коряс, фалу, кда улихть кувака ваймамань шит или кинь отпускоц, синь пуромкшнихть бабаснон шири Ковылкинскяй райононь Волгапино вели. И арси оцю кенярдемакс бабаснон мархта васедемась, радня ломаттнень няемасна, Мокша ляйса эшелямась, шра ваксса седиень токай моронь морсемась.
—Минь бабаньке, кода валдопты маяк, конань валдоц ускозь усксамазь вели,—азонды Марина.—Вов тяни бабазень куду пуромоме отпускс. Кепотьксонди, тячи кудсонк иднек-мезнек 22 ломань, а уленди и сяда ламовок. Минь пяк весяла и фкя-фкянь мархта ладяй семьяньке. Кивок ёткстонк аф пеняцяй, кда теенза аф саты кровать и сави удомс кияксса. Уленди, минь веньберьф корхнетяма, шутендакшнетяма, и аньцек шобдава пяли кудботмось сетьмоси.
Евдокия Никитична и Василий Михайлович Зарубиттнень семьясна оцю, синь шачфтсть-касфтсть 9 итть. Василий Михайлович эряфоньберьф работакшнесь колхозса трактористокс. Евдокия Никитична покодсь траксонь потьникс. Ульсь звеновойкс, кочксезень ломаттнень бригадас паксяв работама. Мзярда эряви, тушендсть тяляма, нума, жуватанди тишень аноклама. Мирттне-рьвяттне сембе идьснон тонафнефтезь профессияс, путозь цебярь кис-янц. Ётксост улихть бухгалтерхт, учительхть, медсестрат, строительхть, воспитательхть, культурань работникт. Мзярда сась пинге, рьвяяфтозь, максозь рьвакс, сембонди пуропнесть весяла свадьбат. Ужяленди, Василий Михайлович рана тусь эряфста, ашезь сав няемс сембе уноконзон, кеняртькшнемс синь сатфксснонды.
Евдокия Никитична ся ломаттнень эзда, конат аф кельгсазь эряфснон лангс пеняцякшнемс, хуш мокшавать эряфонь кисонза ульсь аф кржа стакада-сталмода. Сон тылонь труженик. Теенза аф юкставихть войнань стака кизотне, тячемс мяляфтсы церяста и марожста пидеф кшить таньфонц. Кяжи войнась нельгозе алянц эряфонц, кота идень семьять кадозе тряйфтома-щайфтома. Аньцек аф кунара Зарубиттне музь атяснон—рядовой солдатть Никита Гаврилович Ивановонь калмонц. Сон шавовсь 1943 кизоня и калмаф Казань ошса.
Алду бабань валонзон коряс, аш месть эрямс ётай пинкнень колга арьсекшнезь-пичетькшнезь, мезе ульсь, ся ульсь, сатомшка няйф нужада, сяда пара кеняртькшнемс тяниень эряфти. Вдь Евдокия Никитична козядонга козя баба и щава, сонь 20 унокоц и 18 идень уноктонза, конат сидеста сашендыхть варжамонза. Е.Н.Зарубинать мархта корхнемста сембода пяк дивандань, мзярда содайне мзяра мокшень бабати кизода. 19 августста теенза топодсь 94 киза! Сембонди максоль Шкайсь тнярс эрямс, валда ёньца-мялямса! Андрей унокоц азондозе, кодама весяласта ётась щаванц шачема шиц, няфтезе од гармониять, кона рамафоль тя илати. Эряви азомс, Евдокия Никитичнань шабанза асуфт аф аньцек эсь профессиясост, но и музыкать ширде. Пцтай сембе цёранза маштыхть гармонияса, баянца морама. И тя асушись ётась теест аляснон эзда, сон рамазе цёранзонды васенце гармониять, мзярда синь нинге ёмлатольхть. И унокснонды пачкодсь музыкати кельгомась. Андрей и Евгений морайхть кода гармонияса, стане и баянца. Надежда унокоц тонафни морама аккордеонца. Сяс, мзярда семьясь пуромкшни марс, гармониясь ширеса аф ащекшни, эрть мялец няфтемс морамань маштомошинц.
Евдокия Никитична кода афкуксонь мокшава, кельгсы пидеманц-панеманц. Аф ваномок кизонзон лангс, сон каванякшнесыне инжиензон танцти мокшень пачаса. Бабанясь азозе, кле, тяниень пингть пачань пидемась—мялень петема. Ули коста аф ужяльдезь каямс вай, мзяра мяльце шулгомс ал, аф кода инголи.
Алду баба пара мяльса няфтезе тейне эсь кудонц-пирьфонц. Аф ваномок, што кудсонза мольсь ремонт (цёранза-овонза строясть од коридор),  Евдокия Никитичнань эряма вастоц няевсь тейне уряднайста и лямбоста, марявсь, тяса азорондай кельгомась. Стенатнень лангса лама фотографияда. Салазе мялезень уноконзон эзда казьф казнесь. Тя оцю картина, конань кучкаса ащи мокшень щамса Евдокия Никитична, а перьфканза сембе 20 уноконц портретсна. Тяфтама казнесь, улема, токалезе эрть седиенц.
Т.Петрова.