Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мордовия Республикань Военнай и трудовой подвигонь Мемориальнай музейть директороц Н.А.КРУЧИНКИН: "РАБОТАНЬКЕ ЭРЯВИ ОБЩЕСТВАТИ И ЭРЬ ЛОМАНТИ"


—Николай Андреевич, кодама работа мольфти тядде, Мялямонь и славань кизоня, Мордовия Республикань Военнай и трудовой подвигонь Мемориальнай музейсь?
—Великай Победать 75 кизонь юбилеенц лемс, минь солдатоньконь и генералоньконь, тылонь труженикнень Подвигснон квалма валда мялямть ломаттнень ваймоса ванфтоманкса, Мемориальнай музейсь тядде ётафтсь и нинге ётафты лама мероприятия.
Конешна, мзярда ушедсь пандемиясь, работазонк тейнек савсь сувафтомс кой-кодама полафткст. Но Мемориальнай музейсь эсь тевонзон ашезень лоткафне. Сяс мес музейть работац, койсон, ащи колма ширеста, конат, фкя-фкянь поладомок, тиихть марстонь фкя тев.
Работать васенце ширец—тя ломаттнень, синь подвигснон квалма материалонь, историческяй экспонатонь кочкамась. Омбоце ширец—сембе кочкаф материалхнень и экспонаттнень аф фкя сяда кизос ванфтомасна. И колмоце ширец—тя кочкаф материалхнень, экспонаттнень мархта тяниень и сай пингонь поколениятнень содафтомасна.
А тейнек ули мезе няфтемс ломаттненди. Эрь кизоня Мемориальнай музеи кочксеви-пачфневи 2500-та лама материал и экспонат. Синь кочксесазь музеень сотрудникне, каннесазь музеи республикань эряйхне, а тяфта жа кучсесазь тейнек странань лия региоттнень эзда эряйхне, конатнень юрсна-плямасна Мордовияннет. Сембе ня материалхне и экспонаттне музейса эзк путневихть учётс. А тяда меле ни мушендсазь эсь вастснон музеень историческяй тя или тона экспозициятнень, выставкатнень, музейть официальнай сайтсонза и страницатнень эса, конат панчфт «ВКонтакте», «Одноклассники», «Фейсбук» и лия социальнай сетьтнень эса.
И, эряви азомс, кда пандемияда инголе Мемориальнай музейсь аф тяшкава сидеста работась интернетса, тяни интернетонь ресурснень вельде минь аф аньцек няевиста кеподеськ сайтозонк сувсихнень лувксснон, но и келептеськ географияснон. Мониторингть, конань ётафнесаськ эрь недяляня, даннаензон коряс, минь няйсаськ, историческяй оцю событиянди лемтьф виртуальнай выставкатнень, экспозициятнень, экскурсиятнень музейть эзга ванондсазь, Россиянь эряйда башка, Америкаса, Австралияса, Европаса.
Тя фактсь, азса видеста, минь пяк и пяк кеняртьфтемазь. Сяс Мемориальнай музеень сотрудникне тяни сядонга вихонзафтозь работаснон интернетса.
Ня шитнень Мемориальнай музейсь тяфта жа вяти «Войнаста мрдафнень колга Мялямонь книга» проектть эряфс ётафтоманц коряс работа. Мялямонь тяфтама книгат нолдафт ни Россиянь ламоц региоттнень эса. Тя книгати сёрматфт ся солдаттнень лемсна, конат мрдасть фронтста. Кепотьксонди, мрдасть ранендафокс улеманкса 1941 кизоня, а кой-кит II-це Мировой войнать аделавомда меле. Сяс сембе ломаттнень, кит тушендсть родинать аралама Мордовияста и мрдасть куду, лемсна сувафтовихть тя книгати. Тянь мархта минь пандсаськ теест эсь долгоньконь: эрь мрдаф солдатть лемоц ляды ломаттнень мялямс, аф кармай юкстаф.
Лиякс мярьгомс, кда солдаттнень, конат шавовсть войнаса, лемсна сёрматфт башка книгас и историческяй документс, тякоть эряви тиемс фронтста мрдафнень лемснонга мархта. И тя кармай видешить вешфксонзон коряс.
—Кодама форматса тядде арьсекшневи ётафтомс Мемориальнай музейса «Победань диктант» акциясь?
—Кода содаф, тя акциясь Россияса и омба масторонь ламоц странатнень эса ётафтови 3 сентябрьста.
Мордовия Республикаса «Победань диктантсь» ётафтови 65 площадкаса, конат кармайхть работама Саранскяйса и республикань муниципальнай эрь районца. Сембе вастова, коса ломаттне кармайхть сёрмадома «Победань диктантть», нолдавихть тевс санитарно-эпедимическяй норматне-вешфксне.
Кда меля Мемориальнай музейса «Победань диктантть» сёрмадозе 55 ломанць, тядде синь лувкссна савсь кирьфтамс 25 ломаньц. Шарьхкотьф, тяфта савсь тиемс санитарно-эпидемическяй норматнень ванфтомаснон инкса.
Тяда башка, кода и инголи—тядде эрь ломанти «Победань диктантть» ули кода сёрмадомс регистрацияда меле, онлайн-форматса. Меля, сёрмадомок «Победань диктантть» Мемориальнай музейть площадкаса, мон тяштине сонь нинге весть онлайн-форматса. Тиемс тянь ули кода любой гаджетонь вельде.
—Николай Андреевич, кода тядде мольфтевихть тефне «Сурскяй рубежть» реконструкциянц-одкстоптоманц мархта?
—Кафта кизода инголе республикань общественностсь азсь мяль «Сурскяй рубежень» строительхнень трудовой подвигснон лемс тиемс историческяй Мемориал. Тя инициативать кирдезе ширенц Мордовия Республикань Оцюнясь В.Д.Волков.
Мзярс вятевихть работат Мемориалть проектонц лангса, республикань поисковикне эрь кизоня «Сурскяй рубежса» вятихть реконструкциянь-одкстоптомань работат. Оцю лезкс работатнень тиемста поисковикненди тяфта жа макссихть ширде сашенды ломаттне, конатнень алясна-тядясна или лия мала ломаньцна Великай Отечественнай войнать пингста строясть-тисть «Сурскяй рубежть» эса.
Поисковикненди макссихть оцю лезкс ширде сафневок, конатнень мяльсна содамс мала ломаньцнон тылса тиф подвигснон колга. Тяда башка, «Сурскяй рубежть» одкстоптомац максси оцюдонга оцю лезкс патриотическяй тевонь вятемаса, конань ётафнесы Мордовия Республикань Военнай и трудовой подвигонь Мемориальнай музейсь.
—Николай Андреевич, кодама нинге оцю тевса заняф Мордовия Республикань Военнай и трудовой подвигонь Мемориальнай музейсь Великай Победать юбилейнай кизоня?
—Тячи Мемориальнай музейсь тага панжезень кенкшензон тяза сайхненди. Сятненди, кит заявкань коряс аф оцю группань, 3-5 ломань, сашендыхть Мемориальнай музеи, няфневихть тематическяй выставкат, ётафневихть викторинат и экспозицияньконь ваноманкса экскурсият.
Тяфта жа тяза сайхненди макссеви синь радняснон подвигснон, боевой киснон квалма документонь вешендемста эрявикс лезкс кода Мемориальнай музеень, стане и федеральнай архифнень эса.
Тяниень пингть Мемориальнай музеи эрь шиня сашенды 50-да лама ломань. Тя корхтай сянь колга, што музееньконь работац эряви обществати и эрь ломанти.
Тяда башка, кда сяда тов лафчептовихть ограничениятне, конат ладяфт пандемиять пингста, Мемориальнай музейсь меки эреклафтсы работанц республикань школаса тонафнихнень мархта. Сяс мес, од поколениятненди эряви лац-ряц содамс, кода сатовсь синь атянь-атяснонды Великай Победась!
—Удалаза сембе арьсефонте, Николай Андреевич.
—Спасиба.
В.НЕСТЕРОВ.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022