Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Как жили и живут мокшане

Мокшэрзятнень идень трямань-касфтомань койсна

Ингольдень мокшень семьяса иттне кемоста кулхцондозь шачфтыснон-касфтыснон. Тядянь-алянь валть ульсь оцю виец. Тянь колга корхтай кунардонь валмуворкссь: «Ёрась оцязорсь, да алязе ашезь мярьге». Аф кулхцонды цёрать аляц кадондозе наследствафтома и мянь паньцелезе кудста. Но тя аф эряви шарьхкодемс стане, бта мокшэрзянь кунардонь семьятнень эса сембе трнатсть оцюфнень инголе. Минь народоньконь семьянь тналса ламоц койхне кошярязь шачфтыхнень ужяльдемс идьснон, а иттнень—кулхцондомс тонафтыснон. Пяк кяжи алят-тядят ингольдень семьятнень эса ашельхть. Рьвяйсесть и рьвакс тушендсть сяда сидеста, кда цёрась и стирсь кельгсть фкя-фкянь. Но родителень бславамафтома кивок ашезь рьвяйсе и рьвакс ашезь тушенда.
Мокшетнень койса ульсь касфтомс иттнень марса. Кепотьксонди,  велень эрь эряйть ульсь правац кальдяв тевонкса кардамс-сюцемс и мянь наказамс лиянь идть. Сяс шабатне ульсть лама ваныень сельминголе.
Шабась лувови потяй идькс 2-3 кизонь топодемс. Тя пингс марнек ёмлать мельге ваномась ащесь тядять лангса. Но шабань ваннемда башка, авать ламоль кудъётконь, паксянь-перень тевдонза. Сяс сидеста ёмла шабатнень мельге ваномс лездсть семьяса 7-9 кизоса стирнятне. Аф стак, кда васень шачись семьяса стирня, мярьгондсть: «Идень ванни шачсь».
3 кизоса шабатнень эзда сявомок 5-7 кизосотненди молемс  мярьгондихть идь, шаба, тётьмак. Тядятне-алятне заняфтольхть тевса, сяс шабатне касондсть бабаснон-атяснон видеса. Аф стак корхнесть: «Шачфтыхне—тядясь-алясь, а касфтыхне—бабась-атясь». Сиренятне ряцок путневсть аляти и тядяти. Сяс,  рьвяямань койхнень коряс, од рьвянясь аноклакшнесь фкя лацонь казнет лангозонза рьвяяй цёрать кода тядянцты-алянцты, стане бабанцты-атянцты.
7 кизоса иттнень эзда сявомок 13 кизосотненди молемс тянивок мярьгондихть идьморхт, стирнятненди—стирьшабат, цёранятненди—цёрашабат, цёрокшт. 6-8 кизоса шабась лувондовсь ни цебярь лездыкс. Сон ушеткшнесь ни работама оцюфнень мархта ряцок паксяса, переса. Трудса касомась, теенза  шабань трямаса тонафтомась лувовсь инь оцю задачакс. А трудонь кельги шабась арсесь тядятненди-алятненди инь оцю сатфксокс.
13 кизонь топодемс стирнятнень пялендезь пилеснон, синь каннесть пилькст, ёмла ожнаста крганят. Цёранятнень шяярьснон нарсезь, кода русне мярьгондихть, «под горшок».
13 кизоса шабатненди мярьгондевсь ни лисендемс илядень ульцяв, коса од ломаттне морсесть морот, кштикшнесть гармониянь, балалайкань коряс. Ламоц     этнографнень валснон коряс, кле, кда кизонь веть молемс-маладомс мокшэрзянь велетненди, сисем вайгяльбес кулевсть морай од стирьхнень вайгяльсна. Содаф, мокшэрзятне кельгозь морамаснон аф аньцек иласта, но и покодемшовор и ваймосемста. Иднясь нинге потяй шабанякс кулендезень тядянц, бабанц, щаванц нюрямонь мороснон. Стане жа оцю васта воспитанияса занцесть ёфксне, идень налхксематне, пестушкатне, содама ёфксне.
Ашель кода мокшэрзятнень языческяй шкайфтомостка, конатнень стане жа оцюволь вастсна идень касфтомаса. Тянь коряс мялень салайста азонды Мордовиянь Заслуженнай художниксь А.С. Алёшкин. Эряви  лятфтамс, Андрей Степанович рисавандась лама картина, конатнень эса няфтьфт минь народоньконь козя мифологиянц героенза. Ня обраснень сон пуроптозень этнографическяй экспедициятнень пингста сире ломаттнень азондомаснон вельде, а стане жа эсь мялямстонза. Сонь валонзон коряс, эрявсь лятфтамс, кода 3-5 кизоса мокшэрзянь иднясь рисавандакшнезе мяльсонза, кепотьксонди, Бобуть, кона салсезень аф кулхцонды иттнень.
—Лятфнеса, кода-бди илять, ужнамда меле минь, иттне, комотнеме шрать ваксста и арсеме очередьс кядень штама  вастти, эрсь эсь куцювонц штама. А монь ашель мялезе учсемс очередьса, арьсень шобдава штаса и васенцекс комотень пянакудлангу. Бабазе няезе, што шра лангса лядсь фкя куцю. Арьсень, сась пезе, тяни кармай сюцемон. А бабазе, меколанкт, рахазевсь и кизефтезе: «Кие кадозе апак штак куцювонц эсь мельганза? Веть сай Кудатясь и тя куцюти какай и сяри. А кие эздонза ярхцай, сярятьксты. Кода ашень ёра стямс лямбе пянакудлангста, но мяльсь, што куцювозон Кудатясь ушу моли, ашемань кадонда покойс. Мон стянь, кафксть сяда лац штайне эсь куцювозень и тонгине пенчкори. Оцюфне содазь, кда венди шрать кадомс апак урядак, сайхть шеерхт, таракатт, кандыхть микробат и видекс ломанць сярятьксты. Тяда башка, тяфтама урмась, кода шееронь лихорадкась, ульсь сембода пелькс шабатненди. Вов тяфта Кудатясь ванць арушить мельге и тонафнезень  тянди шабатнень,—лятфни А.С.Алёшкин.
—Азондан нинге  Кельме- Атять колга. Оцюфне приметнезь, што тялонда шабатне сяда пичефксуфт. Шарьхкотьф, шись нюрьхкяня, ульцяв лисендсть сят, кит васенцекс кенерькшнесть щафнемс валенцятнень. Сяс ёмлатне сидеста ульцять афи няендезь, якасть нолдаф прят. Тядятне-алятне содазь, колаф мяльхть ащи  иднясь сярятьксни. Сяс шабатне эрявсть кеняртьфнемс. Роштувань карша оцюфне тиендсть Кельме-Атять лемс ила. Шра лангс путнесть акша тюсса ярхцамбяльхть. Тя пинемонь ксяль, вайвелез, пянакудса пидеф лофца. И кда удалсесь улемс ошса, рамсесть акша зефир. Тя илась тиендевсь сянкса, штоба танцтиста каванямс Мороз Атять, афолезень эендафне шабатнень сурняснон, щёка пряснон. Тядясь-алясь лисендсть ульцяв Кельме-Атять шра ваксс тердема. А минь тя пингть комотнеме пянакудлангста шрать малас, кие сурняса вайвелезда нолай, кие зефирня каподи, кие пинемонь ксяльда куцюса амолдай, кие пидеф лофцть лангста пеезькять фатясы. И  ся пингть, мзярс тядязе-алязе кудынголе валенцястост шукиезь ловть, минь меки ни комотнеме лямбе пянаклангу. А синь сувамстост мярьгондсть: «Вай, минь Кельме-Атять ульцяста вешендеськ, а сон сашендсь ни. Ватт, вайвелезкада ярхцась, шапама лофцта симсь, зефирня сусксь. Тяни, итть, сада сембе шрать ваксс и топодемс ярхцада». А минь сяшкава кеняртьфтолеме, аф кода танцти ярхцамбяльти, конашкава весялготкшнеме, што тяфта маштозь оцюфнень васькафтоськ. Тяфта монь идькс пингстон Кельме-Атясь кеняртьфнезень иднятнень, вдь весяла иднясь—тя шумбра идня. А кда павазу шабати сави кяпе ласькомс ловть ланга, сон аф сярятьксты,—поладозе Андрей Степанович.
Тяниень пингть лама мезе  полафтсь идень касфтомаса-трямаса. Тядятненди-алятненди советонь максыкс арсихть идень психолокне, воспитательхне. Пинкне полафтсть и ламось мезсь юкставсь. Сембе сяка афкуксонь мокшэрзянь семьятне ванфнесазь этническяй койхнень, катк и аф педа-пес. Бабатне-атятне, щаватне-щятятне, кода и инголи, лезнихть шабань касфтомаса. Мялезе щавань-бабань цебярь примеркс путомс Краснослободскяй райононь Зайця велень эряйть, кафксть бабать и кафксть щавать Анна Петровна Середневать (Шутовать). Анна Петровна шачсь-кассь, лиссь рьвакс Зайця велеса.  Меле мирденц мархта тусть эряма Моску ошу, коса синь шачсть 2 шабасна и 4 уноксна. Тяни эрь кизоня Анна Петровна усксесыне вели ваймама уноконзон. Мокшавась ся ломаттнень эзда, кие кельгсы эсь народонц, сонь коензон-обуцянзон. Тя,  аф ваномок сянь лангс, што лама киза ни эряй ширеса. Анна Петровна фалу щаф мокшень щамса, мянь уноконзондывок стафни мокшень щапт-каряпт. Сон содай лама мокшень сире мора, сонь лацонза мазы вайгяль марнек велеста аф муят. Авась мяляфты лама мокшень ёфкс, идень налхксема, нюрямонь мороня, конатнень азонкшнесыне эсь уноконзонды. Улема, сяс ошса эряй уноконза шарьхкодихть мокшекс, а идень налхксематнень, нюрямонь моронятнень тонадозь и синцьке азондсазь лиятненди. Уленди, озай авась уноконзонды ёфксонь азондома, а перьфканза пуромихть курнянь сембе иттне. Анна Петровнань валонзон коряс, ня моронятнень, ёфкснень сон мяляфтсыне бабанц Фёкла Степановна Шутовать эзда, конанди тядде топодель 120 киза.
Т.Петрова.

27.08.2020 №33
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин