Поиск по сайту: 
 

Архив
 сентябрь 
 2020 
пн вт ср чт пт сб вс
 123456
78910111213
14151617181920
21222324252627
282930    

 
 

 

Культура

Мордовия Республикань культурань, национальнай политикань и архивнай тевонь министрсь С.Н.БАУЛИНА: «МИНЬ МРДАМЕ ОЧНАЙ ФОРМАТОНЬ РАБОТАТИ!»

—Светлана Никитовна, кода содаф, 28 августста сявомок республикань театратне и концертнай  организациятне ушедсть панчсема 2020-2021 кизонь театрально-концертнай сезонть. Кодапт сонь эсь лацонь ширенза?

 

—Пандемиять инкса тяддень 27 мартста республикань культурань сембе учреждениятненди савсь лоткафтомс эсь работаснон. И пцтай пяле киза синь ашесть работа зрительхнень и посетительхнень мархта.

 

Конешна, творческяй, научнай и грантонь сатомать коряс работась культурань учрежденияса ашезь лоткафнев. Культурань учреждениятне тяфта жа макссесть услугат зрительхненди, посетительхненди и лувихненди онлайн-форматонь режимса, сайтснон и страницаснон вельде, конат  панчфт социальнай сетьтнень эса. И минь педа-пес шарьхкодеськ, кода можна лац работамс цифровой культурань ресурснень вельде, конатнень колга культурань системаса кунара  ни и ламос корхнеме. Сяс Мордовиянь театратнень, концертнай организациятнень, музейхнень, библиотекатнень, культурань центратнень духовнай продукциясна, кона тиф цифровой культурань ресурснень вельде, тячи сидеста путневи-латцеви «Культура РФ» интернет-порталс. А тоза повондыхть Россиянь культурань аньцек инь цебярь произведениятне.

 

Сяс тейне ули кода азомс: Мордовия Республикань культурась инь цебярь сатфксонзон вельде цифровой культураса арась конкурентоспособнайкс Всероссийскяй уровеньца!

 

Тяка пингть, работамок ограничениянь условияса, республикань культурань системаса арьсевсь-тиевсь рабочай план, конань коряс театратне, концертнай организациятне, музейхне, библиотекатне, культурань центратне одукс ушедсазь эсь работаснон зрительхнень, посетительхнень и лувихнень мархта. И тячи, мзярда ограничениятне лафчептфт, республикань культурань учреждениятне эзк кярьмодсть тевс.

 

Васенцекс, ванфнемок санитарно-эпидемическяй норматнень вешфксснон, республикань музейхне, библиотекатне и культурань центратне примазь эсь лувиснон.

 

Мордовияса 2020-2021 кизонь театрально-концертнай сезонть 28 августста панжезе республикань рузонь драматическяй театрась «Тямак када монь» лем ала военнай драмань премьераса. Спектакльсь, конань А.Дударовонь пьесанц коряс путозе Мордовиянь Народнай артистсь Н.Большаков, лемтьф Великай Победать 75 кизонь юбилеенцты. И сон пяк тусь зрительхнень мяльс, конат  лажадсть эрек искусствати.

 

3 сентябрьста Мордовия Республикань искусствань мастеронь оцю концертса ушедсы эсь концертнай од сезононц республикань государственнай филармониясь. 5 сентябрьста  «Гусаронь рьвяяма» музыкальнай комедияса панчсы од сезононц Мордовиянь  И.М.Яушевонь лемса музыкальнай театрась и тяка шиня ушедсы эсь работанц республикань някань государственнай театрась, а 17 сентябрьста «Саня, Ваня, мархтост Римас» спектакльса эсь 86-це театральнай сезононц панчсы Мордовиянь национальнай драматическяй театрась.

 

Тяфта жа 28 августста сявомок и 1 октябрти молемс панчсазь эсь концертнай сезонцнон «Биг-бенд «Саранск» джазонь оркестрась, моронь и кштимань «Умарина» ансамбльсь, «Росичи» моронь театрась, «Торама» фольклорнай ансамбльсь и республикань концертнай лия коллектифне.

 

Кода няйсасть, 2020-2021 кизонь театрально-концертнай сезонць панжеви ковда лама пингста. Тяфта тейнек савсь тиемс санитарно-эпидемиологическяй норматнень ванфтомаснон-пяшкодемаснон инкса.

 

Лиякс мярьгомс, эрь спектакльть, концертть, выставкать и культурань лия любой мероприятиять ётафтомста тиендеви     сембось артисттнень, культурань лия работникнень, а тяфта жа зрительхнень, посетительхнень шумбрашиснон ванфтоманкса.

 

—Светлана Никитовна, тяддеть аделавомс республикань театратне и концертнай организациятне  арьсихть молемс гастрольс или кодамовок фестивальс?

 

—Кда корхтамс театрань  фестивальхнень колга, эста эряви азомс: Независимай государствань Содружествань, соотечественниконь, конат эряйхть омба масторса, и международнай гуманитарнай сотрудничествань тефнень коряс Федеральнай агентствать мархта тейнек савсь пандемиять инкса «Соотечественники» Международнай театральнай фестивальть ётафтомс сай кизоти. Ужяль, конешна, но мезевок аф тият—границатне пякстафт, и кивок аф содасы, кодама кармай эпидемиологическяй обстановкась сяда тов.

 

Тяфта жа стака азомс: молевихть-аф тяддеть аделавомс гастрольс или фестивальс республикань театратне и концертнай организациятне странань лия региону «Оцю гастрольхть» Всероссийскяй проектть рамкаса.

 

Конешна, Мордовиянь сембе театратнень и концернтай организациятнень рабочай планца сёрматфт-ладяфт гастрольхть и аф фкя лацонь фестивальхть, коса арьсефоль теест улемс тяддеть аделавомс. И кда эпидемиологическяй обстановкась Россияса няевиста цебярьгоды, пцтай сембе рабочай платтне ётафтовихть эряфс.

 

—Ётатама национальнай политикань кизефксненди. Светлана Никитовна, кода ащихть-молихть тефне тяниень пингть республикань межнациональнай и межконфессиональнай сфераса? Кинь и мезень вельде министерствась кармай вятема тефт сембе ширдень соткснень тя сфераса кемокстаманкса?

 

—Кода няфнесазь аф кунардонь мониторингонь даннайхне, Мордовия Республикась межнациональнай и межрелигиознай соткснень цебярьшиснон-кемошиснон коряс Российскяй Федерацияса ащи маласа васенце вастти. А Приволжскяй федеральнай округса занцесы васенце вастть.

 

Оцю путкс тя сатфксти сувафтсть республикань аф коммерческяй общественнай организациятне, конат  маштозь вятьсазь работаснон межнациональнай и межконфессиональнай сфераса. Конешна, пандемиясь синьге работазост сувафтсь полафткст. Но, эряви азомс, эсь тевснон синь сяка тиендьсазь онлайн-форматса.

 

Тяддень 27 августста Мордовиянь национальнай драматическяй театраса мон ётафтонь республикань аф коммерческяй организациянь руководительхнень мархта совещания-семинар. Пингстонза минь ваноськ ся кизефкснень, конат тяддеть аделавомс савихть тейнек пяшкодемс марстонь вийса Мордовияса межнациональнай и межконфессиональнай ладямать-ялгаксшить кемокстаманкса.

 

Совещанияса-семинарса минь тяфта жа корхтаме грантонь сатомать коряс работать колга, конатнень ярмакснон лангс аф коммерческяй общественнай организациятне вятьсазь эсь тевснон. Саме фкя мяльс: тя  работать эряви няевиста эреклафтомс.

 

Тяфта жа оцю и цебярь путкс национальнай политикань сферас эсь тевснон вельде сувафнихть республикань театратне, концертнай организациятне, музейхне, библиотекатне и Мордовиянь культурань государственнай лия учреждениятне. Синь мероприятиясна, конат лемтьфт Великай Победать 75 кизонь юбилеенцты, няфнесазь, кода минь аф фкя национальностень атянь-атяньке марстонь вийса сяськозь сятнень, кит тяда инголи киндивок ашесть сяськондев. И тянь мархта, койсон, сембось азф!

 

Кода фалу, эсь позитивнай путксонц национальнай политикань сферас сувафнесы «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон арьсекшневи ётафтомс 7-12 сентябрьста Саратов—Волгоград—Астрахань—Никольское маршрутова. Тя международнай мероприятиясь тяфта жа  лемтьф Великай Победать 75 кизонь юбилеенцты. Ётафтови сон «Минь—марса!» девизть вешфксонзон коряс.

 

—Удалаза, Светлана Никитовна, сембе арьсефонте.

 

—Сюкпря.

 

В.Нестеров.

 


03.09.2020 №34
 
 
 

 
НОВОСТИ

КАСОМАНЬ И ВИИЯМАНЬ КИГЕ

25.09.2020
 
 
 
 

ТЯЧИ—МИНЬ ШАЧЕМА ШИНЬКЕ!

24.09.2020  № 37
 
 
 
 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин