ЭРЯМА ВАСТОНДИ КОЧКАЗЬ МОРДОВИЯТЬ

Газетаньконь тячиень номерсонза пара мяльса    азонттама од рьвяяйхнень Наталия и Дмитрий Антонофнень семьяснон колга. Наталия и Дмитрий национальностьс коре удмуртт. Шачсть-кассть удмуртскяй ёмла веленяса. Стирсь—Можгинскяй райононь Карашурста, цёрась—Алнашскяй райононь Байтеряковаста. А эряма вастокс кочказь эстеест Мордовиять, Саранск ошть.

Наталия Удмуртскяй республиканскяй культурань колледжть аделамда меле поступась тонафнема Н.П.Огаревонь лемса Мордовскяй        госуниверситету. Аделазе национальнай культурань институтса «Народная художественная культура» специальностьс коре бакалавриатть, а меле—культурологиять коряс магистратурать. Университетса тонафнемста стирти кельговсь минь мазы и ару ошеньке, педезь-педсь седиезонза мокшэрзянь культурась. Сяс сон цёра ялганцка тердезе эряма Мордовияв. Вов кода Наталия азонды тонафнеманц колга:

—Мон пяк дивандафтыне тядязень-алязень, мзярда азыне мялезень тонафнемс Саранскяйса. Вдь тя ошть и шачема вастозень ёткса 670 вайгяльбе. Мес кочкайне Н.П.Огарёвонь лемса госуниверситетть? Тевсь ульсь вов кода. Колледжса тонафнемстон улень финно-угорскяй фестивальса, коса содафтонь мокшэрзянь студенттнень мархта, а стане жа Национальнай культурань институтть преподавателензон мархта. Тяда меле эвондась мялезе поладомс тонафнемазень Мордовияса. Эряви азомс, нинге школаса тонафнемста салазе мялезень финно-угорскяй нароттнень культурасна. И Саранскяйса тонафнемась тейне арась казнекс. Тяса мунь ялгат, васьфтень лама пара ломань мархта.

Наталия Антонова (Маркова) машты кядь ломань, конань тевфтома аф юмай фкя минутацка. Сон фалу весяла и отькорь. Стирсь университетса тонафнемста кенерсь аделамс Саранскяень Услугань сферань и промышленнай технологиянь техникумть и сатомс закройщиконь профессия. Тяни Наталия стакшни эрь кодама щапт, тиенди заказс коре паршихть: мазоптомбяльхть, крганят, сумкат, някат и лама мезе лия. Сонь салсесы мяленц этника стильсь. Наталия машты работама кодамань статтнень мархта. Тяда башка, варчсесыне виензон модельеронь-дизайнеронь тевса. Ётай кизоть сон аноклась выставка, коса няфтезе финно-угорскяй стильса тяниень пингонь щамонь коллекциянц. Тяза сувасть кода иденди, стане и оцю ломанненди щапт.

Наталия стакшни и мокшэрзянь щаптка. Аф кунара стась сёрматфкс мархта мокшень панархт алянди и цёранянди. Ня шитнень Н.Антоновать лемс сась Мордовиянь культурань, национальнай политикань и архивнай тевонь министрть лемста Благодарность, коса азфт спасибамань валхт национальнай символика мархта сувенирнай продукциянь тиеманкса-анокламанкса.

Аш кода аф азондомс лувиеньконди, што рьвакс лисемань акша палянц Наталия стазе эстеенза сонць.

Тяда башка, машты кядь стирсь церькавса воскреснай школаса иттненди ётафни кядьтевть коряс занятият.

Наталиять мирдец, Дмитрий, стане жа машты кядь ломань. Сон плотник, тяниень пингонь од ломаттнень ёткса тяфтама тевса маштыхне васьфневихть шуроста. Сон покоди Саранскяень мебельнай ательеса. Но инь кельгови тевоц—мешень кирдемась.  Тя тевсь теенза ётась щятянц, Семен Никитович Овчинниковонь, эзда. Дима лятфнесы, кода пси кизонь шитнень  сембе ялганза эшелякшнесть ляйса, налхксесть топса, а теенза эрявсь лездомс щятянцты нешкопереса. Тяфта Дима  нинге идькс пингстонза пуроптсь маштомошит мешень кирдемань тевса.

Дмитриень зрняннет кяденза, сон машты работама аф аньцек шуфтть мархта, а стане жа тиенди мазы штатолхт вощинаста, конат ладяйхть эрь кодама иланди и кудботмонь мазоптоманди.

24 июльста Дмитрий и Наталия пуроптсть семья.      Рьвяямань иласна ётась удмуртонь койхнень коряс. Ширде ванозь од мирттне-рьвятне аш ни кода ладяйхть фкя-фкянди. Синь кафцьке машты кятть, кафцьке родонь-плямань коень ванфтыхть-кирдихть, теест пяк  питни сембе национальнайсь, эсь кядьса тифсь. Антонофнень ули семьянь символсна. Тя зрнянь мешкясь, кона няфнесы трудти и перьфпяльти мирдть-рьвять кельгомаснон. Эряви азомс, Наталия стане жа кассь мешень кирди семьяса, сонь аляц и профессияс, и кельгома тевс коре пчеловод.

Од рьвяяйхне надияйхть, што Шкайсь максы теест лама шаба, сяс мес синь кафцьке шачсть-кассть лама идень семьяса.

Арьсетяма од семьяти паваз, кеме шумбраши, идняда пяшксе куд и кувака эряф фкя-фкянь кельгозь.

Т.ПЕТРОВА.