Владимир ВОЛКОВ: «МИНЬ КАРМАТАМА ВАНФТОМОНЗА РОССИЯТЬ КОЗЯШИНЦ!»

Мордовиянь Оцюнясь Владимир Волков 1 сентябрьста рабочай поездка мархта ульсь Зубово-Полянскяй районца, коса Выша велеса нолдафоль од производства тостонь деревообрабатывающай комбинатса. Мероприятияса примасть участия Государственнай Думань депутатсь, «Единая Россия» фракциять руководителенц васенце заместителец Виктор Кидяев, РФ-нь перьфпялень ресурсонь и экологиянь министрть заместителец—вирень хозяйствань Федеральнай агентствать руководителец Сергей Аноприенко, МР-нь вирень, охотничай хозяйствань и природопользованиянь министрсь Юрий Медянкин, Зубово-Полянскяй райононь оцюнясь Владислав Поршин.

Выша велесь—республикань населённай инь ичкоздень пункттнень эзда фкясь, кона ащи Рязанскяй и Пензенскяй   областтнень границаснон лангса. Зубова Поляна райцентрати—60 вайгяльбе!

Вышинскяй деревообрабатывающай комбинатса инжихнень васьфтезень предприятиять руководителец Алексей Платонов. Сон няфтезе производствать, азондсь инвестиционнай проектть, кона тусь республикань Правительствать мяльс и конань вельде тяса тиевихть дополнительнай рабочай вастт, эряфс ётафтоманц колга. Комбинатонь работникнень и Вышинскяй велень поселениянь эряйхнень пингста нолдафоль од производства—уштомань гранулатнень тиемаснон коряс цех. Продукциясь моли экспортонди, Евросоюзонь странатненди. Тяда башка, касы и внутренняй рынкась—потребителькс ащихть ся региоттне, коса газификациясь аф сяшкава оцю, кода Мордовияса.

Тяни комбинатса работай   60-да  лама ломань, 20 дополнительнай рабочай васта тиф производствать келептемань рамкаса. Инвестпроектть сяда тов эряфс ётафтомац лезды касфтомс работайхнень лувксснон 110 ломанти молемс.

 «110 рабочай вастсь—тя лама тяфтама посёлкатненди, сяс пяк важна, што предприятиясь работай и кочкси вийхть,—мярьгсь Сергей Аноприенко.—Тяконь мархта, шарфнемок мяль шуфтть обработканцты, тейнек аф юкстама вирть одукс касфтоманц  колга, тя задачать решандакшнесы «Сохранение лесов» федеральнай проектсь. Тядде республикати максф тя тевонди 57 миллион цалковай. Мялезе азомс благодарность республикань Оцюняти Владимир Дмитриевич Волковонди сянкса, што регионць ётазе вирень пожаронь сезонть. Кда корхтамс вирть одукс касфтоманц колга, тяддень платтнень объёмсна тячи пяшкотьфт пялева, но мон арьсян, што кизоть пенцты республикась синь пяшкодьсыне 100 процентс».

Мордовиянь Оцюнясь китькстазе, што нолдаф производствась—васенце тяфтама предприятиясь республикаса.

«Тяфтама производстватне пяк эрявихть ичкоздень посёлкатненди и ломаттненди,—мярьгсь Владимир Волков.—Ня велетне кармайхть эряма, тяза тиеме кит. Тейнек эрявихть кемотть тяфтама предприятия. Эрявиксшисна нинге и сянь эса, што производствась тиенди переработка низкосортнай шуфтти, конань инголи тевс ашеськ ноля. Тяфтама минь аноклатама площатть виретнень одукс касфтомаснонды, мезсь пяк эряви сай пингонь поколениятненди. Мон путнень задача поють переработканц коряс, эздонза республикаса пяк лама, сон занци оцю площатть, наксады, сонь эряви кодавок нолямс тевс, урядамс. Тяни тяфтама производства миньцонк ули! Карматама озафнема од вирьхть, ванфтомонза эсь козяшиньконь и Россиять козяшинц!»

Госдумань депутатсь Виктор Кидяев шарфтсь мяль, што улихть тя направленияса сяда товолдонь работать коряс платт, омбоце тяфтама производствать ули кода тиемс Ширингушиса. «Кда тяфтама темпса Владимир Дмитриевичень руководстванц ала карматама молема и работама—ламоц кизефкснень валхтсаськ. А инь оцю оценкась—тя ломаттнень оценкасна, мзярда синь азыхть спасиба»,—мярьгсь сон.

Мордовиянь Оцюнясь отмечазе, што Зубово-Полянскяй районца ули нинге фкя важнай инвестор, велень хозяйствань отрасляса—«Талина» ГК-сь. «Кармайхть строявома жуватань кирдемань оцю комплекст, тя оцю плюс районть экономиканцты, тя рабочай од вастт. Зубово-Полянскяй районць кармай эряма!»—мярьгсь Владимир Волков.

Зубово-Полянскяй району рабочай поездкать пингста Владимир Волков и Сергей Аноприенко лац-ряц ванозь регионца «Экология» национальнай проектть «Сохранение лесов» федеральнай проектть эряфс ётафтоманц мольфтеманц и Мордовияса вирень хозяйствать виияманц коряс лия кизефкснень, тяконь лувксса пожархнень эзда вирьхнень араламаснон коряс мероприятиятнень.

Вирень хозяйствань Федеральнай агентствать руководителец Сергей Аноприенко макссь оцю питне Мордовия Республикань Вирень, охотничай хозяйствань и природопользованиянь министерствать работанцты тя направленияса.