Поиск по сайту: 
 

Архив
 сентябрь 
 2020 
пн вт ср чт пт сб вс
 123456
78910111213
14151617181920
21222324252627
282930    

 
 

 

Наши мокшанские сыновья и дочери

ЭРЯФОНЬ СЮРЕКИЦ

Мокшень поэтть Иван Васильевич Чигодайкинонь лемоц и творчествац лац содафт, ащихть васенце вастса мокшэрзянь литератураса и журналистикаса. Сонь инь цебярь стихонза лисендсть Москувонь, Ленинградонь, Башкириянь, Белоруссиянь, Украинань и Молдавиянь журналхнень и коллективнай сборникнень эса. Башка произведениянза нолдафт Финляндияса и Чехословакияса.

 

Шачсь сон 1920 кизонь 11 сентябрьста Краснослободскяй райононь Сире Синдру велеса. Аделамок 1938 кизоня Краснослободскяй педучилищать, ушедсь тонафнема пединститутса. Но тонафнемс ламос ашезь сав. 1939 кизоня эсь мяль вельде тусь финскяй войнав. А Великай           Отечественнай войнать Иван Чигодайкин васьфтезе Румыниянь границаса, и сонь аделамозонза ульсь фронтса. Васенда пехотнай полкса сержантоль, сяльде—политруконь заместителель. Кировоградть араламста ранендафоль, пчксесь госпитальса. 1942 кизоня аделась политшкола, арась военнай журналистокс. «Гвардеец» и «Боевая Красноармейская» газетатнень эса покодсь корреспондентокс. Войнань мекольдень кизоть тага ранендафоль и контужендафоль.

 

Великай Отечественнай войнаса боевой сатфксонкса Иван Васильевич казьфоль Якстерь Звездань кафта орденца, «За взятие Будапешта», «За взятие Вены» и лия боевой медальса.

 

Ётафоль стака и оцю ки. Аралафоль аф аньцек эсь мастороньке, а марнек Европась. Китне вятсть куду, шачема шири. 1946 кизоня сон мрдась Мордовияв и ушедсь работама «Мокшень правда» газетать редакцияса.  1948-1950 кизотнень тонафнесь Горьковскяй межобластной партийнай школаса, журналистикань отделенияса. Ульсь Мордовскяй радиокомитетса политическяй вещаниянь редакторкс и «Строитель» многотиражнай газетаса ответственнай секретарькс.

 

Ся кизотнень Чигодайкин сермадсь лама очерк, статья, фельетон Мордовиянь труженикнень колга, лихнезень лангти эряфонь афсатыкснень, шназень тевонь кельгихнень. Лама киза работась МАССР-нь Писателень союзонь художественнай литературань пропагандань бюроса. Сон ульсь СССР-нь Писателень союзонь член.

 

Стихонь сёрмадома И.В.Чигодайкин ушедсь нинге войнада инголе.

 

Васенце стихонза печатлафтольхть «Мокшень правда», «Комсомолонь вайгяль» газетатнень эса и «Колхозонь эряф» журналса.  Поэтонь ваймоц ашезь макссе теенза сетьмоши. Иван Васильевич войнасовок сермадсь стихт, а войнада меле седиец кошардозь кошардсь азондомс фронтонь китнень колга, кода аралафоль Родинась, кода тапафоль врагсь, кодама кеняртьфти тефт ушедсть тиендевома шачема ширеса. Сон сембе виензон и асушинц максозе мокшэрзянь литературати и журналистикати.

 

Мольсь пингсь, кассь-келемсь Иван Чигодайкинонь поэтонь вайгялец.

 

1951 кизоня Мордовскяй книжнай издательствась нолдазе «Шачема мастор» стихонь васенце сборниконц, коза сувасть военно-патриотическяй темань и шачема крайть кельгоманц колга стихотворениянза. Сборниксь явфтф кафта разделс. Васенце разделса стихне лемтьфт мирнай эряфти, трудти. Омбоцеса азондови Великай Отечественнай войнань стака китнень-яттнень колга.

 

Оцю событиякс поэтть творческяй эряфса ульсь 1959 кизось, мзярда лиссь «Кши и сал» поэмац. Сон кандсь теенза оцю поэтическяй слава. Тя поэмась нолдафоль и рузонь кяльса. Мокшеннеста ётафтозе Иван Пиняев. Произведенияса авторсь азонды ломаттнень стака эряфснон колга, кода велева кемокснесь Советскяй властсь, кода ся пингть стясть и хозяйственнай оцю сталмотне. Тяфтама велекс и ульсь ингольдень Сире Синдровскяй райононь Колапа велесь.

 

И.В.Чигодайкинонь тя книганц колга лямбе валхт азсть «Советская Россия», «Литературная газета», «Правда» газетатне и кой-кона центральнай журналхне. 1971 кизоня Москуса лиссь «Национальное и интернациональное в советской литературе» оцю книгась. Тоса шнафоль мокшень поэтть «Кши и сал» поэмац и путфоль А.Твардовскяень, М.Дудинонь, Р.Гамзатовонь поэмаснон мархта фкя рядс.

 

Иван Васильевич няфтезе эсь прянц кода и поэт-лирик. «Ёндолсь кфчядсь» сборниксонза поэтсь тяшти ломаттнень мазы и козя ваймоснон, ялгаксшиснон, кельгомаснон, эряфснон и тевснон колга. Аф юкснесы и военно-патриотическяй тематьке. Ламоц стихонзон эса няеви, кода геройсь етась войнань толу-качаму китнень пачк, тюрсь тячиень эряфть инкса. И тюрсь аф ськамонза, вакссонза ульсть лама национальностень ломатть, конат эрясть фкя мяльса-арьсемаса, марса явозь сталмотнень и кенярдематнень. Тя ялгаксшинь темась етась поэтть «Грузинкати», «Ульсь пинге», «Руставели» и лия стихонзон пачк.

 

Иван Чигодайкин сермадсь лама стихотворения одкс пингть и кельгомать колга. Синь ётксост сембода удалафт «Пеняцян цёфксти», «Венцяма суркст», «Кельгиень мора», «Сёрма» произведениятне. Ламоц стихонзон лангс содаф композиторсь Г.Павлов тяштсь музыка.

 

1980 кизоня лиссь «Кшить таньфоц» стихонь и поэмань сборникоц, коза сувасть аф фкя кизонь кувалмоста серматф инь цебярь стихотворениянза. Морафтомбачк няеви поэтть кельгомац аф аньцек шачема ширеть мазышинцты, Мокша и Сура ляйхненди, а сембе Россияти. Сянкса сон сермады стихт Крымть, Кавказть мазы перьфпяльснон и ломаньцнон колга. Иван Васильевич тяфта жа сувафтсь книгазонза кой-мзяра стихотворения, конат серматфтольхть Великай Отечественнай войнань кизотнень. Синь ётксост сембода удалафт «Ковыль» и «Граната» стихне. Поэтсь оржа валса азонды боецнень подвигснон и врагти кяжень пандомаснон колга.

 

Иван Васильевич Чигодайкин етась эряфонь аф теждя ки, служась перанц мархта мокшэрзянь литературати и журналистикати. Кадсь эсь мельганза цебярь стихт, поэмат, очеркт и морот. Сонь произведениянза лядсть эряфса и ломаттнень седиса.

 

 

Раиса Аугустинавичус,

 

МР-нь А.С.Пушкинонь лемса Национальнай библитекань покоди.

 


10.09.2020 №35
 
 
 

 
НОВОСТИ

КАСОМАНЬ И ВИИЯМАНЬ КИГЕ

25.09.2020
 
 
 
 

ТЯЧИ—МИНЬ ШАЧЕМА ШИНЬКЕ!

24.09.2020  № 37
 
 
 
 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин