Поиск по сайту: 
 

Архив
 сентябрь 
 2020 
пн вт ср чт пт сб вс
 123456
78910111213
14151617181920
21222324252627
282930    

 
 

 

Национальная тематика

МОКШЕНЬ ВАСЕНЦЕ СЛОВАРСЬ

Тя темати лемтьф эсь статьясонза А.П.Феоктистов пачфнесы: исследованиять автороц Н.Витсен (1641-1717 кк.) няевикс ломанель.      Нидерланттнень историяса ульсь бургомистркс амстердамскяй общинаса. 1666-1667 кизотнень Витсен эрясь Россияса голландскяй посольствать составса. Тяза сон сашендсь научнай цельса.

 

Россияса Н.Витсен тиендсь картат, ошень витт и платт. Сяка пингть сон кочксесь эстонь Российскяй империянь нароттнень колга этнографическяй сведеният. Тянкса знакомондась Москуса разнай народонь представитель мархта и сёрматкшнезень азксснон. Ломаттнень эзда, конатненди Витсен сембода пяк маласькодсь, сонць лятфнезе Никон патриархть, кона мордвиноль. Вов мес можна азомс, што мокшэрзятнень колга сведениятнень Н.Витсен сявозень Никононь или лиятнень кядьста, конатнень азозень теенза Никон.

 

Родиназонза мрдамдонза меле Н.Витсен кармась анокламост материалонзон печатламс. Книгать эса сон сёрматкшнесь комсь ветие киза. Тя пингть, Н.Витсен хуш и заняфоль государственнай оцю тевса, кочксесь од даннайхть, конат сашендсть теенза аф аньцек Россияста, но и лия странаста: Персияста, Японияста и стак тов. Трудонц омбоце изданиянцты Н.Витсен сембода лама получась сведенияда Россияста Петр I вельде, кона ладясь Н.Витсенонь мархта. 17 векть песта и 18 векть ушетксста учёнайхне лувондозь Витсенонь Россиять и вакссонза восточнай странань пяк содайкс. Ся пингонь ломаттне лемнезь сонь «Севернай и восточнай Татариять» авторонц «Од Колумбокс».

 

Тя трудса авторсь сёрмады Сибирень, Тихай океанонь, Чернай и Каспийскяй морятнень ваксса эряй нароттнень и этнографическяй группатнень, а стане жа мокшэрзятнень, татархнень, калмыкнень, мариецнень и лиятнень колга.

 

Книгаса ули мокшэрзянь этнографиянь нюрьхкяня очерк. 17 веконь мокшэрзятнень бытснон особенностьснон колга Н.Витсенонь башка замечаниянзон ули историческяй интерессна. Очеркть автороц, кепотьксонди, шарфни мяль инжиень примамать лангс, няфнесыне основной занятияснон—земледелиять.

 

Тяниень пингонь этнографти оцю значениясна мокшэрзятнень-язычникнень дохристианскяй представленияснон колга заметкатнень. Н.Витсен тяштсь, што мокшэрзятне озонкшнихть шуроста, но тяфта тиендихть эста, мзярда симондихть или печксихть жуватат. Синь эряйхть мирнайста и священникфтома… Калмамста стяфнихть знак, кона няфнесы кулыть профессиянц.

 

Синь аф озондыхть идолхненди, но шавф животнайхнень кедьснон повфнесазь шуфта прява и арсихть инголест плманжа лангс. Эряйхть природань закоттнень коряс. Верондайхть фкя шкаенди, сембе миронь тиити, конанди ярхцамста и симомста макссихть жертвас васенце сускопнень и копоркснень, ёрямок семботь тянь менельти.

 

Витсен няфтезень мокшэрзянь аватнень щамстост кой-кона детальхнень: «Стирьхне мазопнезь шяярьснон… кораллса, сургудса, трешникса, кона ярмакне рузоннет, и пяльф монетаса. Шяярьснон каннесазь свободнайста, сотцесазь сёралксс. Синь мазыхть и лац щафт-каряфт. Мордовскяй аватне архнесазь равжа краскаса кенчснон, штоба улемс мазыкс».

 

Н.Витсенонь книгаса лятфневи и прянь аралама сооружениянь колга. «Аф ичкозе эряма вастть эзда… ащи стена, кона тиф шуфтста и шувонтф модаса. Киндинге аф мярьгондеви сявомс хуш шуфта пакшкя тя перяфксста, ато наказасазь».

 

Мордовскяй этнографиянь очеркть песа печатлаф голландско-мордовскяй словарь, или, корхтамок сонцень авторть валонзон коряс, «мордовскяй лемонь и валонь аф оцю списка». Тя спискаса 325 голландско-мордовскяй лексическяй параллель.

 

Валхне латцефт аф алфавитс коре, а предметнай группава. Словарьса валонь несколька группа и разряд, конат няфнихть касыкст, кизонь пинкт, менелень телат, нармотть, зверьхть и стак тов.

 

Словарьса минь васьфнетяма тяфтама валхт, кода пизем, тозер, сельмот, атяма, шуфта, вашеня и стак тов.

 

Виде, словарьса аш чётнай транскрипция, сяс аш кода эстокиге азомс словарть диалектовай базанц. Но словарть материалонзон сравненияц тяниень мокшень и эрзянь кяльхнень мархта няфнесы, што валхне тоса основнойста мокшеннет, сяс мес синь эряйхть тяниенге, а эрзяннеса прямой фонетическяй соответствият аш. Кепотьксонди, Н.Витсенонь словарьса васьфневихть тяфтама валхт: оцю, ёмла, атяма, идь, тракс. Синь улихть мокшень кяльса, а эрзякс соответственна покш, вишка, пурьгине, эйкакш, скал.

 

Шумбас, морафтк валхне сотнекшнесазь Н.Витсенонь словаренц мокшень кяльть западнай диалектонц мархта. Мокшень лия диалекттнень эса и эрзянь кяльса тяфтама валхт аш.

 

Кода содаф, ламоц общемордовскяй валхне тяниень мордовскяй кяльхнень эса получасть аф фкя фонетическяй развития, но Н.Витсенонь словарьса синь тяштьфт мокшекс. Кепотьксонди, валда (а аф валдо—эрз.), кота (а аф кото) и стак тов.

 

Словарть можна лувомс мокшеннекс и сяс, мес васьфневи аф отрицательнай частицась. Аф пара куля; аф ирецта.

 

Словарьса васьфневихть валхт, конат аф васьфневихть аф мокшень, аф эрзянь кяльса. А, пади, синь аф точнайста сёрматфт.

 

Тя словарсь васендакиге питни сяс, мес эсонза няевихть живой процессне, конат мольсть мокшень кяльса 17 векста. А тяфтама валхне, кода кала (тяни кал) корхтайхть сянь колга, што мекольдень гласнайхне двухсложнай корневой основатнень эса кармасть прашендома аньцек несколька сяда кизода инголе, а тя законць вииясь нинге сяда мельдень пингть.

 

Мордовскяй валонь спискаса минь мушенттама рузонь лама заимствования, кода, кепотьксонди, баня, стена, груша, пуль и лият. Тя корхтай сянь колга, што рузонь кяльсь 17 векста мокшеннеть лангс тиендсь оцю влияния.

 

Учёнайхне и путешественникне кунара ни шарфнихть мяль мокшэрзятнень кяльснонды, бытснонды и поэзияснонды. Путешествиянь дневникнень и лия историко-этнографическяй сочинениятнень эса мушенттама питни сведеният мокшэрзятнень кунардонь духовнай и материальнай культураснон колга.

 

Кода содаф, мокшень и эрзянь литературнай кяльхнень нормасна ладявсь Великай Октябрьда меле. Но пяльксонь-пяльксонь учёнайхне синь кармасть сёрматкшнемост 17 векста сявомок. Мордовскяй кяльхнень историяснон (и мокшэрзятнень историческяй этнографияснон) тонафнемаснонды тяфтама записнень значениясна пяк оцю.

 

Н.Витсенонь голландско-мордовскяй словаренц оцю значенияц сянь эса, што хронологическяй ширде тя аф аньцек васенце лексикографическяй источниксь, но и мордовскяй филологиять историяса васенце страницась.

 

 

Александр ФЕОКТИСТОВ.

 


10.09.2020 №35
 
 
 

 
НОВОСТИ

КАСОМАНЬ И ВИИЯМАНЬ КИГЕ

25.09.2020
 
 
 
 

ТЯЧИ—МИНЬ ШАЧЕМА ШИНЬКЕ!

24.09.2020  № 37
 
 
 
 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин