ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

А Саратовскяй областень внутренняй политикань и общественнай отношениянь министрсь Н.В.Трошина поладозе, што «Волга–река мира» фестивальть лаца проекттне кемокснесазь нароттнень еткса ялгаксшить, арсихть цебярь площадкакс опытса полафнеманкса. Мордовскяй (мокшень и эрзянь) народонь Межрегиональнай общественнай организациять председателец Ю.А.Мишанин шарфтсь мяль фестивальть ушедомаса и виияфнемаса Саратов ошть путксонцты, азсь спасибамань валхт экспедициять васенце пуроптыенцты П.Ф.Чатуровонди и казезе сонь «Гордость нации» знакса.

Концертнай программать шумордамда меле фестивалень участникне етасть Набережнаи, коса синь учендозень «Федор Достоевский» теплоходсь. Волга ляйть ведензон эзга сон пачфтезень национальнай активисттнень Волгограду.

Улема, эрсь согласиндай сянь мархта, што мзярксть тят уле Волгоград ошса, тяза эрь самась пяшкотькшнесы седить таколдомада. Ош-герой, коса Великай Отечественнай войнать пингста 135 ши мольсть стакадонга стака тюремат, шудефтьфоль лама вер, но врагсь сяда тов апак нолдаколь. Мярьгат, эрь уженясь тяса тячемс мяляфтсы советскяй солдаттнень героень подвигснон, конат эсь прянь аф ужяльдезь сатсть тейнек валда и сетьме эряф... Аш кода аф азомс сянь, што Сталинградскяй битваса фашистскяй захватчикнень каршес тюрсь Мордовиянь лама аля, од цера. Тяса шавфоль 1,5 тежяньда лама мокшэрзянь солдат

Фестивалень участникне васьфтьфтольхть «Сталинградская битва» музейть-панорамать каршеса. Приветствиянь валхт лемозост азсть Волгоградскяй областень национальносттнень и казачествать тевснон коряс комитетть председателец Л.А.Титов и «Дом дружбы» культурать виияфнеманц коряс Волгоградскяй областной общественнай организациять старейшинань Советонц председателец Арсен Дауров. «Казачья воля» моронь и кштимань ансамбльсь кеняртьфтезень инжихнень седиень токай мороса. Тяда меле форумонь делегаттненди етафтфоль экскурсия Мамаев курганть эзга. Масторлангса тя сембода оцю комплекссь, кона лемтьф Великай Отечественнай войнати. Тяса ащи «Героям Сталинградской битвы» памятниксь-ансамбльсь. Сон аф стак стяфтф тя вастса—войнать пингста тяса мольфтевсть кяжидонга кяжи тюремат. Сянди, кие занцезе курганть, ульсь кода кирдемс марнек ошть. Тяса шавф и калмаф 35 тежянть малава советскяй солдат и офицер. Эрь кизоня Мамаев кургану сашендыхть пцтай 2 миллиотт ломань, штоба лятфтамс странать аралаензон.

Фестивалень участникнень еткста аф кржась ульсть Волгоградса васенцеда. Кепотьксонди, Пензенскяй областень мокшалясь Н.Н.Пиксин ет шабакс арьсекшнесь повомс тяза. «Сембода таколфты мяльхть-арьсемат кадсь седисон Павловонь Кудоц,—азозе сон.—Мяляфтса, васенцеда няине сонь историянь учебникста. Но ащемс маласонза—тя ефси лия. Тяса сядонга лац шарьхкотькшнесак-марьсесак, кода тюрсть Родинать инкса минь атяньке. Монцень атязе ульсь Великай Отечественнай войнань участник, а сире атязе шавовсь Карелияса 1942 кизоня».

Колмоце шиня «Волга–река мира» фестивальсь пачкодсь Астрахани. Причалть маласа экспедициянь участникнень васьфтезь Астраханскяй областьса эряй нароттнень представительсна. Кода азозе Астраханскяй областень культурань и туризмань министрсь О.Н.Прокофьева, сембоц тя аймакса эряйхть 140-да лама национальность. Етксост татархт, руст, украинецт, казакт, азербайджанецт, колмыкт, армятт, кореецт, а стане жа мокшэрзят. Сембе синь эряйхть ладязь, фкя-фкянь шарьхкотькшнезь. Астраханецне каванязь инжихнень кшиса-салса, чак-чакса и баурсаки казахскяй пярякаса. Меле форумонь делегаттненди няфтьфтольхть тястонь достопримечательносттне. Астраханскяй кремлянь историко-архитектурнай комплексса ванфоль Пресвятой Богородицань Успениянь Кафедральнай соборсь, Ялгаксшинь и Ремеслань куттне, XIX веконь Гауптвахтась. Фестивалень участникне пара мяльса тифнесть лятфнембяленди фотографият, рамсесть радня и мала ломаньцнонды астраханскяй сувенирхт и аф оцю казнет. И, конешна, кивок ашезь ета калонь базарть вакска. Сембонди содаф, што мокшэрзятне—калонь кельги народ, сяс ашель кода улемс калонь масторса (тяфта лемнесазь Астраханть) и аф варжамс тя танцти ярхцамбяльть.

Сембе пингть теплоходса работасть «Родники национальной культуры» шуфтста керсемать коряс выставкась и «Каргонь ки» национальнай щамонь музейсь. Эрь илядня фестивалень участникнень кеняртьфнезь эсь концертнай программаснон мархта Мордовиянь и лия региононь артисттне и творческяй коллектифне. Нят МР-нь Заслуженнай артистсь, Московскяй Опереттань театрань солистсь Валерий Исляйкин, «Торама» фолк-группась, «Вспомним, друзья!» народнай ансамбльсь, Мордовскяй государственнай филармониянь морсись Андрей Бочканов.

Фестивалень мекольце шиня форумонь участникне казьфтольхть дипломса, а сяда отькорьхне—Финно-угорскяй народонь культурань Поволжскяй центрать благодарностьса.

Ули кода азомс, што «Волга—река мира» Международнай этнокультурнай XIX фестивальсь-экспедициясь етась лац, пользань кандозь. Надиятама, сембось, мезсь арьсефоль-смекафоль пингстонза, маластонь пингть етафтови эряфс.