ТЯСА СЕМБЕ АРЬСИХТЬ ВАНДЫЕНЬ ШИТЬ КОЛГА

 «Богдановское» ООО-нь велень хозяйствань коллективсь содаф лама цебярь тевса

Степан Степанович Якомаскин Старошайговскяй районца од руководительхнень эзда фкясь. Сонь мяленза-арьсеманза сотфт вандыень шить мархта, кода сяда лац кемокстамс хозяйствать экономиканц, касфтомс лофцонь и сиволень получамать, сёронь тялямаса валовкать пачфтемс кота-сисем тёжятть тоннати. Тяддень кизось няфнесы, сембе тя арьсефсь лац ётафневи эряфс: утопне пяшксет сёрода, эрь шиня приемнай пункту прважсеви  13 тонна лофца, кафксть  сяда лама ётай кизоть коряс аноклаф кормада. Ня шитнень тяса кярьмодсть поздняй культуратнень урядама, кукурузась удалась, тялонь кофненди ули аноклаф кафкса тёжятть тонна сочнай корма. Арьсихть тяса и сай пингонь урожайть колга, лама сядот гектар лангса кепотьф ни зябкась, озимойса видеф 750 гектар пакся.

—Мекольдень кизотнень эрь гектарста минь тяльсетяма 30 центнеронь зёрна, мезсь кафксть  сяда лама ингольдень пингть коряс,—азонды хозяйствань главнай агрономсь В.В.Десяев.—Сембе тефне тиендевихть бригаднай методс коре. Трудонь тя формась лезды дисциплинать кемокстамаса, марстонь оцю результаттнень сатомаса. Минь коллективоньке покоди—эрь частть тевти—девизс  коре. Сёронь урядама пингть инь оцю сатфкст сатсть комбайнёрхне П.Б.Мещеряков, К.И. Горшков, С.Н.Ситяев, Н.И.Максимкин, В.К.Чевтайкин. Сембонь синь работань оцю стажсна, эрсь эздост тядде тялясь сядот  тонна сёра. Теест аф эряви лятфнемс, што сёронь урядама пингть эрь частсь пяк питни, эсь тевснон синь тиендьсазь совестьс коре, курокста, ванфнесазь эрь зёрнанять. Паксяста тинголангу сёроть усксезь водительхне Н.П.Бирлюков, С.В.Булычёв, С.В.Базин. Минь хозяйстваньке—тя кода фкя оцю семья. Содасаськ, коса ётафтсаськ шить тячи и мезе ули ванды.

Василий Викторович Десяев оцю опыт мархта специалист. Велень хозяйстваса покоди нильгемонь киза. Сонь лемозонза най азондыхть аньцек шнамань валхт. Тя сон максси команда мзярда ушедомс тундань видемать, кона пингста лихтемс паксятнень лангс урядамань техникать, анокламс модать лов алу. Сонь мяленц най кирдьсы нльне хозяйствань оцюнясь С.С.Якомаскин.

—Главнай специалисттне—монь надияма вастозе, синьфтомост оцю тевс аф кярьмодят,—азонды директорсь.—Пингсь веши од малаткшнема тевти, производствав сувафневихть од технологият, полафни техникась и сембе вастса азсазь эсь валснон агрономсь,  инженерсь, фермань заведующайсь. Лама синць тонафнихть, а сяльде тя содамошись кемокстави марнек коллективса.

И тя афкукс тяфта. Мзярда улендят хозяйстваса, най васьфтят мезе-мезе одня. Кепотьксонди, фермаса сембе тефне тиендевихть техникать и лофцонь потямань од оборудованиять вельде. Эрь килограмма кормась сявф учётс, сембе  синь оцю качествань, жувататненди макссевихть-явондовихть миксер вельде, аноклафста. Тя лезды шиста шис касфнемс лофцонь потямать, прважсемс государствати лама продукция. Кда ингольдень кизотнень средняйста эрь траксста тяса потьнесть колма тёжянень килограмма лофца, то тячиень шить  тя цифрась кассь кафксть. И тяфта сембе вастова:  сёронь касфнемаса, кормань анокламаса, од помещениянь строямаса. Конешна, сембе  ня цебярь полафткснень эса оцю путксоц сонцень С.С.Якомаскинонь. Тя пара вайме, скромнай, оцю букваста Ломань. Коллективса покодихть и отт, и сирет. Но сон мушенды сембонь мархта марстонь  кяль, кажнайти мезьса машты лезды, азонды седи ваксста моли валхт. Тянкса сонь кельгсазь, путнесазь примеркс.

«Богдановское» ООО-сь районца лац содаф, кода благотворительнай акциятнень эса примси коллектив. Синь лезнихть ашу ломаттненди, школаса тонафнихненди, идень садонь воспитанникненди, лама лия вастса. Инь оцю благотворительнай тев хозяйствась тии тяддень Сяськомань шиста 75 кизонь топодемста. Аф лама пингонь ётазь Сире Шайгова велеть кучкаса панжеви  Советскяй Союзонь Геройхнень лемс аллея, конат войнань пингть  няфтсть героическяй оцю подвикт. Синь эздост районца   сисем: И.А.Борин, Н.П.Кабалин, Г.М.Надёжкин, В.С.Налдин, П.Ф.Федотов, Н.Г.Шариков, А.В.Борискин. Тя монументть анокламанцты «Богдановское» ООО-сь нолдась 5 миллиотт 500 тёжянь цалковай ярмак. Работать вятьсы содаф скульпторсь Н.М.Филатов.

—Родинань аралайхненди мезевок аф ужяль максомс—кда аф синь, стака азомс, кодама улель тячиень эряфсь,—мярьгсь Степан Степанович Якомаскин.—Тянь минь тисаськ аф аньцек тяниень, но и  сай пингонь поколениятненди, штоба синьге содалезь и афолезь юксне сянь, кинь вельде сатовсь Победась!

Мзярда мон кулине ня валхнень, марянь гордость мокшалять инкса, мялезель люпштамс ламоксть кяденц и азомс сембонь эзда оцюдонга оцю сюкпря. Тяфта и тиень, арьсень Степан Степановиченди кеме шумбраши, паваз и лама кизонь эряф!

Н.Лобанов.