«КУРГОНЯ» НАЦИОНАЛЬНАЙ КУЛЬТУРАНЬ VI-це ФЕСТИВАЛЬСЬ ОНЛАЙН ФОРМАТСА ЁТАСЬ КЕЛИСТА И МЯЛЕНЬ САЛАЙСТА

2015 кизоня Рузаевскяй райононь Левжа мокшень велеса ётафтовсь «Кургоня» национальнай культурань I Межрегиональнай фестивальсь. Гастрономическяй шире мархта фестивалень главнай символкс эста кочкафоль модамарь мархта кургонясь—ватрушкась. Кизода меле «Кургонясь» ульсь Сузгярьге мокшень велеса. Форумс сашендсть участникт и творческяй коллектифт аф аньцек Мордовиянь райоттнень эзда, но и Эстонияста, Финляндияста, а стане жа Карелияста, Удмуртияста и Нижняй Новгородста.

TURSTAT.COM порталть версиянц коряс, пуромкссь сувась Россиянь 2017 кизонь инь содаф гастрономическяй фестивалень 10 топти. Тяда башка, тя праздниксь сувафтф событиянь федеральнай национальнай календарти.

Сяда тов, несколька киза мельцек фестивальсь ульсь Приреченскяй велень поселениять (Левженский поселкать) маласа оцю кужеса.

Тядде, 2020 кизоня, «Кургоня» национальнай культурань фестивальсь тага арьсефоль ётафтомс Рузаевскяй муниципальнай райононь Приреченскяй велень поселениять маласа оцю кужеса, кона арась ни тонатфокс ломаттненди и сонь кой-кит ни лемдезь «Кургонянь» ётафтома вастокс». Но коронавирусть сюнеда уликс платтне савсть полафтомс. Тифоль тя фестивалень ваныхнень и инжихнень шумбрашиснон ванфтомаснон инкса. Сафоль мяльс, котоце «Кургонять» тиемс онлайн форматса. Виде, тя аф пяк тонатф тев, но тянь вешезе тячиень эряфсь.

«Кургонясь» августста виртуальнайста кочказень ваныензон и инжиензон, конат вов ни несколька киза кизонь мекольце ковста учсазь национальнай культурань, ялгаксшинь сотксонь кемокстай и ладяй тя фестивальть оцю мяльса.

Интернетса, социальнай сетьтнень эса тяддень августста ушедсть работама «Кургоня в лицах», «Ялгаксшинь шра», «Мастеронь ульця» флешмопне, конатнень эса фото и видеоматериалхнень вельде няфтьфоль кода ётнесь фестивальсь 2015-2019 кизотнень.

Участникокс ульсь кода арамс эрти, кинь ульсть фотографиянза и видеоматериалонза тя темас. Эрявсть кучемс синь фестивальть организаторонзонды и эрявикс хэштег ала синь лисендсть гастрономическяй шире мархта тя пуромксти лемтьф рубрикатнень, посттнень эса. Эряви азомс, участникне ашесть эряв вихца кошярямс, тернемс. Ломаттне кулезь, што тядде фестивальсь ули онлайн форматса, содазь мезе эряви тянкса тиемс и тиезь.

«Мастеронь ульця» флешмобть вельде ульсь кода содафтомс зрнянь, машты кядь, асу ломаттнень мялень салай работаснон: сюреса сёрмадомать, шуфтста керсемать, ёмла ожнаста кодамать, стамать и ламоть лиять мархта. Фотографиятнень эса ульсь стама мазыши, што сельмоце аф явфтови эздонза.

Инь цебярь публикациятнень авторсна получасть лятфнембяленди диплопт и кургонят Рузаевскяй райононь инь цебярь мастерицатнень эзда.

Кода ни азфоль сяда вяре, нинге 2015 кизоня фестивальти главнай символкс кочкафоль модамарь мархта кургонясь. Эрь кизоня сон занцесь башка васта тя фестивальса—пицевсь-панцевсь оцюдонга оцю кургоня, кона пакшень мишендевсь фестивальть пингста специальнай валютать—КурБоттнень лангс. Тядде ульсть видео мастер-класст кургонять пидеманц-панеманц коряс. Ламотне синь ванозь и анокласть корязост танцти ватрушкат.

Кодама праздник весяла морофтома, кштимафтома, сиде мороняфтома? Тяконь лувксса и онлайн форматса? Тяньге сявозь мяльс «Кургонять» аноклаенза, сяс интернетса няфтьфтольхть творческяй коллектифнень концертнай инь цебярь номерсна.

Оцю мяльса ванфоль «С теплотой  о «Кургоня» видео-экскурссь. Документальнай тя фильмать эса пачфневсь фестивальть эвондаманц, эрь кизоня ётафнеманц колга.

30 августсь кочкафоль тяддень «Кургоняти» основной ётафтома шикс, хуш сембе вяре азфсь мольсь ковоньберьф. Кирдемок мяльса социальнай дистанциять, щамок маскат, Рузаевскяй райононь Левжа, Сузгярьге мокшень велетнень эса, Левженский поселкаса ётасть «По следам фестиваля…» лем ала аф оцю пуромкст.

«Кургонять» ётафтома вастста»—Приреченскяй велень поселенияса (Левженский поселкаса) Приреченскяй велень библиотекань сотрудникне клубть маласа анокласть «Кургоня»—вспомним как это было» темас аф оцю фотозона и стенд, конатнень лангса няфтьфтольхть фестивалень фотографиятне 2015 кизоста сявомок. Шратнень лангса путфтольхть 2020 кизонь урожаень перень сёрот, фруктат и, конешна, шить лаца тюжя тюсонь кургонят. Оцюфне примасть участия литературнай викторинаса, а иттненди арьсефтольхть «Тик вал», «Ши-пизем», «Таргатама модамарьхть» и стак тов  налхкомат. Библиотекарьхне тиезь семботь, штоба пуромкссь ёталь санитарно-эпидемиологическяй вешфкснень тевс нолдазь и социальнай дистанциянь кирдезь.

Тяка шиня «Кургоняти» лемтьф литературнай кужет ульсть Сузгярьге и Левжа мокшень велетнень библиотекаснон видеса.

Аф ваномок онлайн форматть лангс, котоце фестивальсь ётась келиста и мялень салайста.

Т.Альшина.