Иерейсь Олег КЛИМКИН:«ЭРЬ НАРОДСЬ КУЛЕЗА ШКАЕНЬ ВАЛТЬ ЭСЬ КЯЛЬСОНЗА»

Библиясь—тя инь сидеста ётафневи книгась масторлангонь сембе книгатнень ёткста. Кда ваномс 2019 кизонь статистикать, Библиясь педа-пес ётафтф 698 кяльс, а Од Соткссь (Новый Завет)—1548 кяльс. Мокшекс васенцекс ётафтфоль Матвеень эзда Евангелиясь. Сон нолдафоль 1874 кизоня Казань ошса. Меле лиссть Лукань эзда Евангелиясь (1891 кизось) и Иоаннонь эзда Евангелиясь (1893 кизось). Марнек Од Сотксть ётафтомац ушедовсь 1990 кизотнень. Тя оцю тевти кярьмодемать бславазе Саранскяй и Мордовскяй Митрополитсь   Варсонофий, и 2016 кизоти Од Соткссь педа-пес ётафтфоль мокшекс.

Ня шитнень минь корреспондентоньке васетькшнесь Крымскяй Архиепископть Лукань лемса церькавть настоятеленц Олег Климкинонь мархта. Батюшкась НТМ телевизионнай каналса вятьсыне рузонь кяльса «Путь к Вере» телепрограммать и мокшекс «Од Соткс» рубрикать.

—Отец Олег, азонтт, пожалуйста, аф лама эсь колгат.

—Шачемас коре мон Инсарскяй райононь Кочетовка велеста. Тядяне-аляне, Наталья Викторовна и Николай Иванович Климкиттне, трудонь кельги ломатть. Сисемце класса тонафнемстон ушедонь якама церькавонь воскреснай школав. Венемонь духовнай книгань лувомати. Вейхкса класста меле тунь тонафнема Саранскяень духовнай училищав. Служань армияса. Сяльде поладыне тонафнемазень  Самарскяй духовнай семинарияса. Аделмдонза меле кучемазь Ардатовав, коса служань церькавса 2 кизот. Тяни вов ни 5 кизот,  кода покодян Саранскяйса Крымскяй архиепископть Лукань лемса церькавса.

—Пара мяльса ванондса «Мокшень вал» телепрограммать, коса лисенди «Од соткс» рубрикась. Тон родной кяльса лувондсак Евангелиять и панчсесак ваныхненди лувфть смузенц.

—Кизошка кода вятьса тя рубрикать. Тя тевти водендамань и бславамань Ардатовскяй и Атяшевскяй епископсь Вениамин. Церькаву, коса мон покодян, сашендыхть телевиденияста журналистт и минь марстонь вийса аноклакшнетяма выпускт. Койсон, родной кяльса Шкаень валть ломаттненди пачфтемац—тя пяк эрявикс тев. Вдь родной кяльса азф и кульф валсь педезь педи седити. А Шкаень валсь козякофтсы, эреклафтсы ваймоть. Духовнай ширде козя ломанць венеми пара тефненди и ваймонц аруста кирдеманцты.

—Бибилиянь ётафтомань институтсь путни вийхть священнай Писаниять мокшекс ётафтоманцты. Аф кунара лиссть минь кяльсонк Ташта Сотксть (Ветхий Завет) васенце кафта книганза. Мезе азолеть лувиеньконди мокшень кяльса Шкаень валть колга, эряви-аф мокшетненди Библиясь родной кяльса?

—Конешна эряви. Эрь народсь кулелезе Шкаень валть эсь кяльсонза. Кепотьксонди, Чувашияса церькавса  мянь службатневок ётафневихть эсь кяльсост. Кали тя кальдяв? Писанияське сяда шарьхкодеви, кяльське ноляви тевс, ванфтови. Миньцонк, конешна, тянь мархта лама сталмода. Кепотьксонди, монь приходсон аньцек 2-3 ломатть, конат корхтайхть мокшекс, а ламонцне ошса эрязь рузыясть. Пароль, валом-валом ушедомс мокшень велень церькафнень эса лувондомс Евангелиять мокшекс. Но кода улемс сятнень мархта, кит кальдявста содасазь литературнай кяльть. Вдь мокшекс Библияса лама од терминда, конат ламонцненди васенцеда лувомста-кулемста аф шарьхкодевихть. Эрявихть васенда тонафтомс ломаттне. Сяс тя аф фкя шинь тев. Сембода пяк пичефтьсамазь шабатне, тяни вдь мокшень велетнень эсовок иттне аф корхтайхть эсь родной кяльсост. Тя оцю прябала!

—Отец Олег, мезе азолеть газетаньконь вельде мокшень ломаттненди?

—Васендакиге, аф эряви юкснемс эсь юроньконь. Тяряфнемс эрямс Шкаень кошаркснень (заповедь) коряс. Кода сёрматф Псалтырьса: «Шкаень аф кельги юромсь (род) юмай-арай, а видексшинь ломанть юромоц бславави». Морафнемат Святой Отецнень сёрматфсна и Библиясь. Тянь вельде минь пяшкодьсаськ ваймоньконь цебярьда, а меле пара тевс тонафтсаськ иденьконь. Уледа шумбрат аф аньцек ронгонь пяльде, но и ваймонь ширде!

—Сюкпря корхнеманкса!

Т.Петрова.