ТЯЧИ—МИНЬ ШАЧЕМА ШИНЬКЕ!

24 сентябрьста «Мокшень правда» газетати топоди 99 киза

Кельгома ялгат! Тячи минь тинь мархтонт «Мокшень правда» газетаньконди топоди 99 киза! Ёфси маласа и круглай датась—100 кизонь юбилейсь.

Пцтай век ётась, ёт лисенди мокшень газетась. Сон шиста шис, кизоста кизос вятезе мокшэрзянь крайть летописенц. Газетаса пачфневсь-азондовсь мокшень ломаттнень эряфснон-ащефснон, тевснон-заботаснон, пичефксснон-сярятьфснон колга. Газетась эрьгянь марязь мольсь инголи. Мольсь аф эряскодозь, но аф лотксезь, аф пупорязь арьсеф цельти. А цельсь фкяль: лездомс полафтомс цебярь шири ломаттнень эряфснон, катк эрь од шись ули сяда кеняртьфти. Сон лама тись сёрмас тонафтомаса, мокшэрзянь народть культуранц касфтомаса, национальнай кадрань, интеллигенциянь анокламаса, национальнай самосознаниять касоманц эреклафтомаса.

Мокшень газетаса ушедозь эсь киснон содаф писателеньке, поэтоньке, кялень и фольклоронь учёнаеньке.

Вов, кепотьксонди, мезе тянь колга азондсь Мордовиянь Народнай поэтсь Илья Максимович Девин:

«Озондан Шкайти, мес тейне удалась работамс «Мокшень правдаса» ваймонь ширде козя тяфтама ломаттнень мархта, кода В.Радин, В.Челматкин, Я.Пинясов, И.Кишняков, М.Сайгин, М.Кяшкин, Н.Мирошкин, В.Сурков…

Эста «Мокшень правда» щаканьконди (тяфта лемнеськ газетать кельгомга) ульсь цють колмогемоньда лама. Мон ся пингть ашень сода мокшень фкявок писатель, кона мзярда-бди ашезь работа «Мокшень правдать» редакцияса, ашезе ётне, кода корхнихть, сонь школанц».

Странаньконь лангс фашистскяй Германиять врьгятемда меле «Мокшень правданьке» эстокиге полафтозе работанц. «Семботь фронтти, семботь Победать инкса!»—лозунгсь кайгсь эрь номерста, эрь страницаста, эрь колонкаста.

Мзярда тапафоль германскяй фашизмась, газетась ладязе работанц мирнай строительствань задачатнень мяльс сявозь. Мокшень журналисттне старандасть нолямс сембе ширде цебярь газета, стама, кона тушендоль лувихнень мяльс и отвечаль пингть вешфксонзонды. «Мокшень правдать» эзда, кода ваномаста, няевсь республиканьконь эряфоц, кулевсь сонь седиень шавомац.

Газетать заслуганзонды оцю оценка макссь Родинась. 1971 кизоня сон казьфоль «Знак Почета» орденца, а 1981 кизоня—РСФСР-нь Верховнай Советть Президиумонц Почётнай грамотаса.

Тяниень редакциянь коллективоньковок цебярь. Тяса покодихть тевонь содай и тевонь кельги ломатть—журналистт, художественнай редакторхт, операторхт… Сембе синь старандайхть, штоба шиста шис мокшень газетась улель сядонга мазы и мялень салай, сяда мала ломанти. И тянкса тиендьсазь семботь эздост ащить. Газетать лопанянзон эса объективнайста и шарьхкодевиста няфневихть миньцонк тяниень социально-экономическяй и духовнай процессне, ся, кода ётафневихть эряфс    национальнай         проекттне. Шарьхкотьф, инь оцю васта газетаса макссеви национальнай темас материалхненди. Васень заботакс лувондсаськ сянь, штоба ванфтомс и виияфнемс кяленьконь, культураньконь, коеньконь-иланьконь, аф юкстамс сянь, мезьса народоньке козякофневсь векста векс.

Тячи мялезе азомс оцюдонга оцю спасиба лувиеньконди, конат сядот, тёжятть газетатнень ёткста кочксесазь «Мокшень правдать», фалу ляткшнихть мархтонк. Сембонь поздравляндасайне газетать 99 кизонь топодеманц мархта, арьсян кеме шумбраши, паваз и сатфкст.

Иван Лушкин,

«Мокшень правдать»

главнай редактороц.