…И тага весть мошенникнень колга

Мошенникт. Колгаст тяшнеме аф весть, пачфнеме васькафнемань схемаснон квалма, но кати ни эрсь эздонк арьси, што кда и кие пови синь килькшезост, аньцек тя улян аф мон, кати эсь пряньконь лувсаськ синдедост ёнюкс, но, аф ваномок тянь лангс, мошенникнень лувкссна аньцек касы. И эрь шиня синь тевс ноляйхть мезевок одня.

Тячи мяленьке пачфтемс вов кодама случайхнень колга. Пади, кивок шарфты тянь лангс мяль. Квартиратнень (куттнень) ланга якайхть мошенникт. Квартирать кенкшс гайфти аф содаф. Азорти азсы прянц экологическяй (шумбрашинь ванфты, медицинскяй) кодамовок организациянь представителькс. Ёран, кле, штоба шумбраста-тазаста эряледе сяда киза (да хуш тяла). Вов и мялезе ладямс ведень кранозонт аруяфты фильтра. Ведсь, кона ётай пачканза, инь цебярсь, инь танцтись и инь арусь. Сон тисы сяда шумбракс организмать, кувалгофтсы эряфть и стак тов. А ся ведсь, конань тяни тевс нолясасть, рдазу, пяшксе аф цебярь веществада. Ну квартирань азорсь (сембода сидеста тяфтама килькшненди повондыхть ськамост эряй атятне и  бабатне), кулемок ламос эрямать колга, ушедыхть пилеснон лпнафтома и нолясазь куду аф содафнень. Тя ёткть и ушеды васькафнемась. Кранти  ладяф фильтрать инкса «инжихне» анайхть пяк оцю питне. Кепотьксонди, 45, 50, 60 тёжянь цалковай. Хуш афкукс тя фильтрать питнец (сонь ули кода рамамс мишендеви тяфтама товаронь мишенди эрь магазинца), 600—1000-шка цалковай. Весть Саранскяйса лиссь ёфси рахафты случай. Ськамонза эряй пенсионеркась отвечась, што сонь аш 60 тёжянь цалковаец. Монь, кле, цёрай, аньцек 40. «Шумбрашинь ванфтысь» лисема васта мусь курокста. Отвечась, што 40 тёжянцьке саты, а 20-сь—скидка кода пенсионерканди! Меле Клавдия Васильевна (лемдьсаськ фильтрань путфтыть тяфта) гайфтсь стиренцты. Ся и азозе тядянцты, што сонь васькафтозь, да нинге кода!

И месть аньцек, фильтрада башка, васькафнихне аф латцихть квартиратненди (куттненди). Кепотьксонди, кожфонь аруяфтомат, приборхт, конат бта ункснесазь шуди-аф газсь, ули-аш радиация и стак тов.

Меле тяфтама васькафнихнень сисем пинеса аф мусайть. А кда и мусайть, то синь атказайхть. Мярьгихть, што сяка жа Клавдия Васильевнань няйсазь васенцеда эряфсост, кодамовок прибор теенза ашесть латце, кодамовок ярмак кядьстонза ашесть сявонде. Да нинге мярьгихть, што сяда лац ванома эряфкшу ломаттнень мельге.

Пади, тя тяштьфть морафтомдонза меле кой-кинди удалай аф повомс васькафнемань килькшс.

Т.Альшина.