Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшане о мокшанах

Тяштемань тевса васенцесель

2021 кизонь сентябрьста «Мокшень правда» газетати топоди 100 киза. Тя оцю пингста мокшень кяльса лисенди изданияса работась и работай содаф, асу лама ломаньда. А мзяроль велень корреспонденттонза. Сембонь лемсна афи лятфтавихть. Фкясь синь эздост ульсь Атерень районнай больницянь врачсь В.М.Сиркин. Сон ульсь «Мокшень правдати» цебярь ялгакс ведьгемоньшка киза. Куломозонза тяшнесь аф оцю зарисовкат, репорташт, информацият. Мокшалять пяк пичефтезь кялень, литературань кизефксне. Лама сёрмадсь районнай больницять эряфонц-ащефонц, работас коре ялганзон квалма.
В.М.Сиркин шачсь 15 сентябрьста, а кулось 16 сентябрьста. Тядде теенза топодель 80 киза. И вете кизот ни кода аш мархтонк.
Сон лувондови войнань пингонь идькс. Шачсь странаньконь инь стака пингстонза, 1940 кизоня. Кизоняцоль, мзярда ушедсь Великай Отечественнай войнась. Аляц, Максим Сиркин, войнаса ашель, сяс мес стакаста сярядсь, а меле и кулось. Авань, алянь тефне тядянц, Аксинья Степановнань, лафтувонзон лангсотольхть. Нилецьке идензон трудонь кельги мокшавась касфтозень цебярь ломанькс. Михаил Максимович ульсь военнайкс. Эряфонц ётафтозе военнай частьтнень эса. Пенсияс лисемдонза меле эрясь Краснослободскяйса. Екатерина Максимовна—медсестраль. Трудендась пцтай 40 киза Атерень районнай больницяса. Раиса Максимовна санитаркаль тяка жа больницяса, а Василий Максимович сембе эряфонц, а тя  40-да  лама киза, лемдезе врачень тевти. Аф ваномок сембе стакатнень-сталмотнень лангс, Василий Сиркин аф кальдявста аделазе Атерень средняй школать, поступась тонафнема Рязанень Медицинскяй институту «Врачебное дело» отделенияв. Хуш семьясна эстонь кизотнень эрясь аф козяста, од цёрати мезевок ашесть ужялькшне. Аньцек тонафнеза, араза цебярь ломанькс.
Вузса тонафнемать аделамдонза меле В.М.Сиркин сась Атерень районнай больницяв. Тя ульсь ётай веконь сизьгемонце кизотнень ушетксста. Од специалистть васьфтезь пяк лац. Эста главнай врачекс ульсь Н.С.Кузин. Николай Сергеевич и валса, и тевса лезнесь од врачти. Кодама должностть аньцек ашезь занце Василий Максимович 40 кизоста. Ульсь рентгенологокс, туберкулёзнай отделениянь заведующайкс, Оброчнаень участковай больницяса главнай врачекс, районнай больницянь главнай врачти заместителькс, врачекс-психиатркс. Аш районнай больницяса стама васта, коса афоль труденда мокшалясь. И эрь вастса сафнезе. Вакссонза най ульсь кельгома рьвац, Анна Ивановна. Сон фалу лезнесь, кирнезе мирденц ширенц. Марса эрясть ведьгемоньда лама киза. Эрясть кельгозь, ладязь, фкя-фкянь шарьхкодсть пяле валста.
Анна Ивановна—Пичепулонянь. Школаса тонафнемать аделамда меле содамошинзон касфтозень Саранскяень медучилищаса. Кизода меле группаснон ётафтозь Инсаронь медучилищав. 18 кизоса сась покодема Атерень районнай больницяв. Тяста и васьфтезе Василий Максимовичень.
—Колма ковда меле лисень рьвакс,—азонды Анна Ивановна.—Сон од врачель, мон од медсестралень. Кафцьке тиендеськ васенце аськолксоньконь. Главнай врачть Н.С.Кузинонь пяк мялезонзоль минь тя решенияньке. Арьсесь кувака и пяк павазу эряф.
Афкукс синь эряфсна пяк павазуволь. Эрясть фкя-фкянди лезнезь, фкя-фкянь лангс надиязь. Анна Ивановна фалу кирнезе мирденц ширенц, мзярдовок ашезь моле каршек. Василий Максимовичка ульсь аф аньцек цебярь врачекс, но и кулхцонды мирдекс, павазу алякс. Оцю кельгомаса шачсть колма идьсна. Светлана Васильевна аделазе Атерь велень 2№ средняй общеобразовательнай школать, тусь тядянь-алянь киге. Аделазе Дагестанонь Медицинскяй институтть, получась врачень-стоматологонь профессия. Профессияс коре трудендай колмогемонь киза. Михаил Васильевич—Атюрьевскяй райононь главнай ветеринарнай врач, Алексей Васильевич трудендай связьса. Касыхть кафкса уноксна, колма уноконь идьсна. Ужяль, но вов ни вете кизот синь сатфксснон инкса Анна Ивановна кеняртькшни ськамонза.
В.М.Сиркин пяк лама киза ульсь цебярь ялгакс «Мокшень правдати». Сон аф аньцек пара мяльса сёрматфнезе тядянь-алянь кяльса лисенди изданиять, но и сонць сёрматкшнесь, макссесь мялень салай материалхт. Содазень редакциянь сембе журналисттнень, ванць газетань коллективть эряфонц-ащефонц мельге. Терневсь газетать юбилеензонды, лия иланзонды. Кепотьф мяльса сашендсь, азонкшнезень эсь мялензон-арьсеманзон газетать колга.
Аф мяляфтсы, мзярда васенцеда сявозе эсь кядезонза газетать. Но тя ульсь пяк и пяк кунара, нинге школаса тонафнемста. А мзярда сонць ушедсь работама врачекс, эрь кизоня сёрматфнесь газета.
В.М.Сиркинонь районца лемнезь краеведокс. Сон кочксесь лама материал районть историянц, содаф ломанензон колга. Макссесь материалхт «Мокшень правдаса», районнай газетаса. Башка мяль шарфнесь районца шачф-касф писательхненди. Кочксесь материалхт А.С.Малькинонь, Р.Р.Федькинонь, Иван Надёжкинонь, Фёдор Костяйкинонь колга. Пяк кельгозень литературнай илатнень, мушендсь пинге якамс тяфтама мероприятияс.
2015 кизонь 15 сентябрьста В.М.Сиркин аноклась 75 кизонь юбилеенцты. Пуроптсть куду инжихть. Састь Дагестанцта раднянза, лия мала ломаненза. Арьсекшнесь молемс больницяв, васьфтемс врач ялганзон мархта. Ила-васьфтема ёрасть ётафтомс районнай библиотекаса.
—Кальдявонь колга ашеме арьсекшне,—мярьгсь Анна Ивановна.—Арьсеме петемс-кеподемс эряфкшу ломанть мяленц, пяшкодеськ сембе эняльдеманзон, указоваманзон. Апак учсек теенза арась кальдяв, ускоськ Краснослободскяи больницяв. Тозк и кулось.
Вете кизот ни аш мархтонк Василий Максимович. Тя пингста тиевсь лама полафткста цебярь шири районца, Атерь велеса. Аф кржа полафткста тиевсь и семьясонза. Ёмла уноконза тусть школав, оцюфне аделазь школаснон, тонафнихть вузса, вузда меле кярьмодсть работама.
—Василий Максимовиченди эрямаль да эрямаль,—шумордазе эсь корхтаманц А.И.Сиркина.—Но алянь вексь аф сяшкава кувака. Лядсть аньцек лятфнемат. И, конешна, сёрматфонза, конатнень эзда пяк лама, конат разнай пинкнень, кизотнень лисендсть «Мокшень правдаса».
И.Вешкин.


01.10.2020 №38
 
 
 

 
НОВОСТИ
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020  № 48
 

«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин